تسريبات .....وكسه ليكس ....


في صبيحة أحد أيام السنه التي تعاني من إضطرابات و سوء في الأحوال الجويه ،وقف موكوس إبن متدهول أمام شاشة الكمبيوتر الضخمه ، نظر ببلاهه إلى الخرم الموجود في سقف الحجره متسألآ من أين لك هذا ؟؟ فقفزت صورة عضو من أعضاء الحزب الوطني من الشبكه العنكبوتيه لتخرج على هيئة مارد من الجهاز و تصرخ فيه، نعم ...وحياة أمك ..مهو مش ناقص غيرك إنت اللي تسأل من أين و لأين ...إتهد لأخلي يومك كوبيه و خليك في أحوالك العاطفيه يا ...."تيتتتتتتتتتتتتتتتتتت" .
نزلت قطرات الماء على الجهاز لتغسل تلك الغشاوة من على عينيه، خرج شعاع أزرق قوي ليفرقع في الغرفه محدثآ دويآ .
أدي كمان الجهاز باظ ، جر موكوس الكرسي ببرود ، نظر إلى الشاشة التى يحيط بها دخان أزرق من كل إتجاه و بدأ يقراء ...
أمسح قزاز النظاره يا زفت علشان تفهم ، و إبقى قابلني لو فلحت ، الحمار بيفضل ...أستغفر الله العظيم هتخلونا نشتم خلقة ربنا .
موكوس : إنت إخوان ..
الجهاز : لأ أنا إنسان و ركز و خلصني ما أنا عارف بنفخ في قربه مقطوعه.
إحم ..إحم ..
نقدم لكم ...تسريبات وكسه ليكس...
بيان رقم 1 : عزيزي الموكوس ..في بعض الحالات يجب أن تلفع البقيه الباقيه من روحك على كتفك و تطلع تجري بأقصى سرعه و تلوذ بالفرار قبل أن يدهسك حبيبك و يمصمص شفتيه قائلآ ....أقدار.
بيان رقم 2 : عزيزي الموكوس ..لما حد بيخبطك على دماغك بيجيلك تربنه ، و لو حد خبطك على قلبك يجيلك سكته قلبيه " و نخلص منك إن شاء الله " ، إنما لو حد خبطك على روحك بيجيب أجلك الروح لما تخرج مش بترجع تاني و لا بالطبل البلدي ، علشان كده لم الدور و يلا يا بابا أخرج من أول دوووور بالسلامه ، و السلامه هنا تعني أقل الخسائر" مجدي يعقوب موجود و دكاترة المخ و الأعصاب على قفا من يشيل" .
بيان رقم 3 : الحكومه بتدي تراخيص للبناء و عدد الأدوار ، إستوعب أن لنفسك ترخيص بعدد معين من الأدوار و أنك لن تستطيع أن تبني ناطحة سحاب على ترخيص و أساسات أربع طوابق ، النتيجه أنك ستسحق روحك تحت الألم و لن ينقذك أحد تمامآ كإنهيار الدويقه .
بيان رقم 4: لكي يعرف الأخرين قيمتك الحقيقه ..يجب أن تعرفها أنت أولآ .." إنما طول ما إنت مفهمهم إنك موكوس و لا حد حيعبر اللي جابوك "
بيان رقم 5: روحك ليست ملك لك ، فهي ملك للي خلقها فلا تضعها في يد بشر لأنه لن يقدرها ،و هتداس يعني هتداس هنقفل القوده بالترباس و تداس يا عباس .
بيان رقم 6 : طبعآ يا حبيبي هتعيش الألم ، و يكون صباحك زفت و قطران ، و تعدي عليك أيام سوده ما يعلم بيها إلا ربنا ، لكن في يوم هتقوم الصبح و تكتشف أن الألم مش موجود ، ساعتها أقف قدام المرايه و إستحمل منظرك المهبب خمس دقايق و قول لنفسك .....حمد الله على السلامه .
نفسي كلامي يحوق فيك و تفهم منه حاجه ...و حتى لو مش فاهم أنا هكمل و أعمل اللي عليه ..كفايه عليك النهارده كده و غور من قدامي بوكستك جبتلنا الفقر ... أشوفك وقت ما أحب علشان أكمل عليك ...قصدي أكملك الباقي ...قشطات