بسم الله, أعود إليكم بعد انتهاء موسم التزوير الذي شابه بعض الانتخابات بقصة تقصها عليكم أختي الكريمة, والتي كانت في يومٍ من الأيام عضوة يهذا المنتدى, ويشهد بثقافتها وصدقها المتنافسين معها في هذا الركن من باقي الأعضاء القدامى, وتركت المنتدى في ظل سياسة الرأي الواحد التي انتشرت في الركن برهة من الزمن حتى فقد الركن ثلة من الأعضاء ذوي الفقه السياسي الرائع مثلها ومثل الأخت (مشمش), وهي الآن تقص عليكم بطريقة غير مباشرة قصتها في أحد الدوائر التي كانت مندوبة أحد المرشحين الغير منتمين إلى جماعة (الإخوان المسلمين) , وذلك بسبب تعنت السلطات إخراج التويلات الخاصة بالمناديب,و حتى لا نُطيل عليكم, نستمع إليها:



بسم الله الرحمن الرحيم

نزلت من بيتي الساعه السادسة ونصف صباحا ودخلت اللجنه الخاصة بي الساعه الثامنة واظهرت التوكيل للمرشح الغير اخواني وبالطبع ادخلوني اللجنه بكل سهولة ويسر

القيت السلام على كل من معي واخبرتهم اني مندوبة المرشح الفلاني وسلمت التوكيل وجلست انتظر بدأ فتح اوراق التصويت
اتصاحبت على المناديب الموجودين للمرشحين التانيين واتفقنا مايبقاش في تزوير

فتحت الاصوات وبدأت انا بالتصويت لان اسمي مسجل في هذه اللجنه وبدأت الاصوات تأتي ومر السيد المستشار ليطمئن على استتباب الامن وكل شيء كاان تمام حتى الساعه الثانية عشر ظهراا يحاول رئيس اللجنه والوكيل ومعه اربعة مساعدين جس نبض المندوبين

جائت الساعه الواحدة ظهرا والامور تسير على مايرام وناداني رئيس اللجنه على جنب وقال لي انتي مثل اختي ويبدو عليك الاحترام وهما الي عايزينه هينجحوه فاحنا نخليها بارادتنا احسن ماتكون غصب عننا ايه رايك؟!

فكرت شوية وقلت هو ليه اختارني انا عشان يقولي الكلام ده فسالته هو حد قالك حاجة ؟ قالي اه الظابط ناداني من شوية وقالي الكلام ده قلت له طيب خد عندك الاجابة دي : انا مش موافقه انها تكون بارداتي ورضايا عارف ليه ؟ قالي ليه ؟ قلت له عشان لما ربنا يسالني يوم القيامة اقوله خدوها غصب عني وانت خير الشاهدين على ماحدث . اتصدم رئيس اللجنه من الرد وقالي خلاص كأني مقولتلكيش حاجة انتي زي اختي قلت له ماشي حصل خير

ضربت البوز التمام في اللجنه وكل شوية رئيس اللجنه يقولي متخافيش مش هيحصل حاجة فكيها وانا طبعا البوز خلاص ضرب معايا ومش هيتعدل

الساعه جت اربعه وبدات مندوبة من المناديب تتلاعب حوالي خمسة او سته دخلوا تبعها وصوتوا وبعد ساعه رجعوا يصوتوا تاني باسماء تانية وبطاقات شخصية تانية فقمت وقفت وقلت لها الناس دول دخلوا قبل كده وقلت لرئيس اللجنه اعملي محضر دلوقتي
راحت المندوبة قالت لي خلاص الي مزعلينك دول هخرجهم وطلعت الناس دول برة

جه البيه الظابط بدا يلف في اللجان وطبعا لجنتي اتكهربت لما عرفوا اني مشدده على رؤية صور البطاقات الشخصية فجاء الظابط وزعق لي وقالي انتي ماسكه اللجنه ليه انتي كده بتكرهي الناس في التصويت . قلت له لو انت عملت شغلك بضمير محدش بيلومك فسيبني اعمل شغلي بضمير

فجأة لقيت رئيس اللجنه بيقولي انتي اخوان مسلمين ؟؟ قلت له لا هو مفيش غير الاخوان هما الي محترمين ومش بيزوروا؟؟!!
في ناس كتير زيي اهلهم ربوهم كويس على حفظ الامانه

طبعا سكت بعدها فلفت نظره الى السبورة نظرا لاننا كنا في فصل ومكتوب قسم الجمهورية وقلت له ايه رايكوا في القسم ده اظن الي حطوه مش الاخوان المسلمين

جائت لي المندوبة وقالت لي الحياة فرص وشوفي انتي عايزة ايه ؟؟! قلت لها عايزة ميحصلش تزوير ومش هيحصل تزوير في لجنتي ولو عايزين تزوروا خدوا الصندوق على جثتي

فجأة اللجنه اتقلبت ودخل ثلاثة ظباط غير الست موظفين والمرشح واتنين ستات معاه وبدأوا يزعقوا لي ويشتموني في وقت واحد وانا بستغفر الله ومبردش عليهم عشان محدش ياخد عليه فرصة ويخرجوني من اللجنه قلت لهم مش من حقكم تزعقوا لي والي هيتكلم معايا هعمله محضر دلوقتي فبدأوا ينقسموا ناس تهدي الوضع وناس تشعلله وانا مش هممني وشغالة ذكر ودعاء

جه الظابط وقالي مش هتروحي تصلي العشاء؟؟ قلت له لا . قالي الي مبيصليش بيروح النار ! . قلت له ربنا اعلم بالعباد

اصبحت الساعه السابعه الا ربع وبدأوا يعيدوا التفاوض معي بالرشوة والتهديد وانا مصرة على موقفي دخلت سيدة اختارت مرشح الاخوان ومعاه مرشح الوطني فلقيت الظابط ماشي وراها وشاف ورقتها وقال لرئيس اللجنه غير الورقة دي !! . فقمت من مكاني وقلت له يغيرها ليه ؟؟ قالي الحجة مختارة اتنين فئات وده مينفعش ؟ قلت له لا ينفع. قالي انا ظابط وبقول مينفعش . قلت له وانا مندوبة وبقول ينفع لو عايز تبطل الورقة هعمل بيها محضر . قلت لرئيس اللجنه ينفع اتنين فئات ولا لا قالي اه ينفع رحت خطفت الورقة من ايديهم ووضعتها في الصندوق

اشتد الوضع جدا وبدأ يشتموني ويتهموني بالرشوة . قلت لهم لو انا خدت منكم رشوة يبقى خدت من غيركم انا مش هزور عشان خاطر ربنا وعشان مضيعش الامانه وذكرتهم ان هو يوم ممكن يعيشوا بعده مرفوعي الراس او منكسي الراس امام انفسهم وامام رب العباد لكن طبعا لا حياة لمن تنادي . وبدأوا يشدوني من ملابسي عشان يلهوني, وقام واحد منهم قام بتطبيق مجموعه من الورق وبدأ يحطهم في الصندوق وبالفعل حط ورقة منهم فجريت على الصندوق وخطفت الباقي من ايده وبعثرته في اللجنه والورقة الي حطها في الصندوق لم تكن نزلت في القعر كان لسه في جزء منها خارج من حافة الصندوق. فوضعت يدي وطلعتها برة وقلت لهم مفيش ولا ورقة هتدخل الصندوق طول ما انا هنا !

الساعه جائت السابعه وبدأ تشميع الصندوق وخرج المرشح واقاربه خارج اللجنه يهددوني بالمياه الحارقه والذبح وانهم ينتظروني خارج اللجنه

نظرت في نهاية الطرقة فوجدت سلم خلفي فخرجت منه ونزلت الى فناء المدرسة ثم الباب ووجدت الاخوات لارتمي في احضانهم وبعد ذلك تركتهم وذهبت للبيت وجاءوا عندي جميعا وحكيت لهم ماحدث والجميع اطمئن عليه والحمد لله انتهى اليوم على ذلك

ملحوظة : موبايلات الاخوة كلهم كانت قد فصلت شحن لذلك لم يستطيعوا الصعود لي بالاضافه الى هواتف الاخوات ايضا وتذكرت وقتها انه لعل الله قد قطع كل الاسباب الارضية التي ممكن ان تحميني ولم يكن هناك سواه سبحانه والذي ظللت متعلقه بالدعاء له والذكر طول الوقت وهو من انجاني واعطاني هذه القوة التي اتعجب منها حتى الان ... أختكم