بسم الله الرحمن الرحيم
فخامة الرئيس:
تحية طيبة وبعد ......
أعلم تماما ان سيادتك تحمل على عاتقك مهام جسيمه من
أجل مستقبل من أجل مستقبل أفضل لأحفادنا , وأعلم ان
ليس لدى سيادتكم الوقت لقراءة رساله من انسانة
مثلي ...... مجرد مواطنة عادية وابنة مواطن عادي وساكنة
في حي عادي ..... وبأركب مواصلات عادي وبأقف في
طابور العيش عادي وبتضرب على قفايا عادي ومبعترضش .
المهم هدخل فى الموضوع على طول عشان وقت سيادتكم
الثمين .انا ياريس من غير لف ولا دوران بصراحه كده
بحبك .. بجد بحبك .. متستغربش .. وهكرهك ليه يعنى ؟؟


هو انت عمرك قصرت معانا فى حاجه .. ويعدين سيادتك
عشرة عمر ، انا كل يوم بصطبح بصورة سيادتك على
الصفحه الاولى فى الجرايد كلها .. لدرجة انى بقيت مغرم
بيك وصورتك دايما فى بالى انا بعتبرك زى جدى ، اكيد
حضرتك بتقول عليا رغاية دلوقتى انا اسفة خلاص هخش
فى الموضوع ...انا مش باعتة الرساله دى عشان اشتكى و
اصرخ زى الشعب المطحون .. لا خالص مالص انا مش
بتاع الكلام ده انا طول عمرى اعصابى جامده ، انا باعتة


الرساله دى عشان بحبك .. ايوه عشان بحبك هو سيادتك
مش مصدقنى ليه ..يعنى مش متخيل ان فى حد فى الشعب
بيحبك غيرالحكومه، اعتبرنى مجنونه انا بحبك بجد وعشان
كده ببعتلك استفسر منك عن شوية مواضيع كده محدش
هيفيدنى فيهاغيرك وعشان خاطر ربنا ابعتلى الاجابه بسرعه قبل
ما اتجنن اصل انا زى كتير اوى من الشعب عندنا شعره ساعه
بتروح وساعتين تلاته تيجى عشان الزحمه مانت عارف
فخامتك بنتعطل قد ايه واحنا فى انتظار مرور موكبك .



وعلى فكره لو عرفت تجاوب على اسئلتى صح يبقى بجد
تستاهل حبى الكبير ليك وانا هبقى اكتر واحده فى الشعب
بحبك وهدعمك وابايعك واغنيلك علشان كده احنا
اختارنااك وممكن كمان اعملك جروب ع الفيس بوك
(فخامة الزعيم لافرز) .



ندخل في الجد بقى ونبدا الاسئله عشان وقتك .......

1- سيادتك تعرف كام واحد في شعبك بينام من غير عشا ؟

2- طيب تعرف كام واحد اتخرج ومش لاقي شغل " عاطل " ؟

3- تعرف الفساد الاداري وصل لحد فين ؟

4- تعرف في كام مليون مصري عايشين تحت خط الفقر ؟

5- تعرف ان التعليم فاشل وبيتدهور كل سنه اكتر من اللي قبلها؟

6- تعرف كام مليار جنيه بيتصرفوا على الحفلات والمؤتمرات والمهرجانات وماتشات الكوره والناس مش لاقيه تاكل ؟
7- تعرف كام مريض بيموت بسبب الاهمال في المستشفيات الحكوميه ؟

8- تعرف أزمة الاسكان وصلت لفين ؟ وكام أسره مش لاقيه مكان تعيش فيه ؟

9- تعرف ان اللى عنده 3 او 4 ولاد وبياخد 200 جنيه في الشهر بيصرف عليهم ازاي ؟

10- تعرف كام واحد اقترضوا من البنوك من غير ضمانات مليارات الجنيهات وهربوا بره مصر؟؟ طب تعرف ترجعهم تانى ؟؟

11- تعرف الجهل في مصر وصل لحد فين ؟

12- طيب تعرف كام واحد في مصر بيحبك وكام واحد بيكرهك ؟

13- طيب تعرف انا ليه باعتلك الرساله دي ؟









أقولك انا يا ريس
عشان اشرف الخلق صل الله عليه وسلم قال
" كلكم راع وكلكم مسئول عن رعيته "
وإحنا من رعاياك يا ريس
خلي بالك مننا شويه عشان نحبك بجد