هات ودنك فلسفة الزواج

**نجلاء** · 09-12-2010, 02:12 AM

- مفهوم الزواج عند المواطن المصرى الاصيل ( والاصيل يعنى مصرى الاب والام والزوجه ايضا ) يختلف باختلاف المراحل التى يمر بها بدءا بمرحله التعارف والخطوبه وشهر العسل .. ( كما يقال ) والمرحله التى تعقب ذلك الشهر المزعوم ..

- قبل الزواج وفى مرحلة التعارف والخطوبه .. يحاول كلا الطرفين ان يظهر بأحسن صوره .. وابهى مظاهره .. فلسفة الخطوبه تقوم على الرقه والتفاهم .. ويا سلام بقى لو اتنين ميعرفوش بعض .. تلاقى احترامات وادب وزوق وعزومات .. وعشر ساعات البنت تحضر نفسها للقاء العريس المرتقب .. وهو ميشربش كوبايه العصير للاخر مع انه جايز يكون هيموت على الشويه الباقيين ..ويقعد الولد يحكى للبنت عن مغامراته النسائيه الخطيره اللى بتخلى البنت تحس بانها ملكه متوجه لانه ساب كل البنات اللى عرفهم قبل كده واختارها هى عشان تكون اميرته المتوجه .. على الرغم من انه جايز تكون الست الوحيده اللى عرفها فى حياته هى الست والدته ..

- وتقع الطوبه فى المعطوبه ويتحدد معاد الخطوبه وتروح العروسه تختار فستان غالى جميل تدفع دم قلبها فيه .. وهو يروح يتأجر بدله بتلاتين جنيه من عند ابو نسمه اللى تحت الكوبرى .. ويجيب الشبكه اللى طبعا دفع فيها دم قلبه .. وطلع عينه فى كل قرش اتحط فيها .. وبيبقى مصر ان كاميرات الفيديو اللى فى الحفله تفصص الشبكه حته حته عشان الناس تعرف هو جايب ايه مع انه اصلا مش جايب غير دبله ومحبس .. وعلى انغام .. يادبه الخطوبه عقبالنا كلنا ... يلبس الود البنت دبلة الخوبه السعيده .. ويبوس دماغها وكأنه بيصالحها .. وهى تمسك دبلة الخطوبه وتلبسهاله بكل رقه وتبتسم ابتسامه صغيره وساعتها ولاول مره يعرف ان فى سنه من سنانها مكسوره مخدش باله منها قبل كده ويعرف انه معاينش البضاعه كويس لكنه بيعديها ..وبيكبر دماغه .. وتبدأ الحفله برقصه سلو .. وبعدين تخلص الرقصه ويبدأ الرقص على واحده ونص .. العريس وسط اصحابه اللى بيصر انه يرقصهم واحد واحد .. العروسه وسط صاحباتها وتديها عشره بلدى ولا اجدع رقاصه فى شارع الهرم .. والجميع فى سعاده غامره ويروحو و يروح الجميع متنين للعروسين سعاده ابديه .. وتشغل الموبايلات وخدمه احسن ناس .. مهما دول زباين شركان المحمول السقع .. بياكلو عيش على قفا الحبيبه .. وتظل الحياه فى وئام وسعاده وحب وهنا .. وحتى شهر العسل المزعوم اللى بيصمم كلا العروسين انه يأكل التانى بأيده وينسو اسماء بعض ومينادوش غير ياحبيبى ويا حبيبتى .. وهكذا هى الحياه حتى نهاية الشهر المزعوم وبدايه المرحله الاكثر تشويقا وهى مرحله الشهر اللى بعد شهر العسل واللى هاجل الكلام فيها للمقال القادم ... استنونى

**lionking** · 09-12-2010, 01:34 PM

والله يا نوجا انتي سكر لا وتحسي انك متفائله اوووي... بس كلامك جميل واسلوبك مشوق يا يا ستي انا شخصيا مستنيه العدد القادم.. بس متتأخريش

**lionking** · 09-12-2010, 01:39 PM

حذفت مداخلتي للتكرار سامحوني كل ده عشان داخلة من الموبايل

**ام الاء** · 09-12-2010, 05:28 PM

ههههههههههههه
جميلة فى انتظاريا نوجا
وانا فى انتظار المقال التانى
وان كنت عايزة اضيف جاجة
صغنونة فترةالخطوبة كلها احلام وردية
الى ان يفاجىْ الطرفين بالواقع المرير