جــيـت اخــتـار عــنـوان لـقــيـتـه سـابـنـي ونـــام
مساؤه عنب
بعد فتره من التوقف عن كتابه مواضيع لسبب ضياع الكيبورد
قررت اني اكتب موضوع بايدي لحد ما اشتري كيبورد جديد
الموضوع هيكون عباره عن فكره برنامج توك شو لكن بمظهر جديد
ايه الرغي ده يلا الهوبا
ع البركه
^^
اهلا وسهلا بيكم في اولي حلقات برنامجكم الاذاعي المرئي الفضائي
جيت اختار عنوان لقيته سابني ونام
برنامجنا رياضي سياسي فني ثقافي بلتجي يعني جامد اخر حاجه
^^
نبدأ باول فقره معانا وهيا فقره الاخبار
***
قام جميع الرياضيين واللاعبين كل من يهتم بكره القدم
بتهنأة الكابتن ابراهيم حسن وذلك لشراءه مفرمه كهربائيه جديده
لفرم اللحوم كما قام سيادته بكتابه اسماء كل من هنأوه
عشان يعرف مين اللي مهناهوش ويفرمه
^^
في اخر تصريح للكابتن حسام حسن
قال سيادته انهم استغنوا عن ميدو
وهو ضوفره بعشر لاعيبه من امثال فتح الله
ولكن خانه التعبير
مش معني ان ميدو وزنه زايد يبقي وزن ضوفره يساوي وزن عشر لاعيبه
^^
صرح المستشار جلال ابراهيم رئيس نادي الزمالك الحالي
بانه فضل التجديد لفتح الله علي دفع رواتب العاملين في النادي
وده يا جماعه عشان زي ما انتوا عارفين فتح الله غلبان ومش لاقي ياكل
وبالتالي اتت التضحيه من العمال نفسهم
زقاموا بالتضحيه باجورهم مرددين شعار
يعيش فتح الله واحنا مش مهم
^^
قام الكابتن زيزو بالمعجزه في المباراه الاخيره
التي جمعت الاهلي بسموحه متذيل الدوري العام
وذلك بالتعادل مع سموحه بعد سلسله من التغيرات القويه جدا
واللي هتجيب مناخير الاهلي الارض فيما هو قادم بعون الله
^^
استكمالا لسلسله احترام اللاعب محمود عبد الرازق
قام سيادته بمناغشه جمهور الاهلي وذلك بوصفهم ب ....
ولكن لسوء نيه الجماهير الحمراء فقد فهمت اللاعب بطريقه خاطئه
واعتبرته يسبها
ومن جانبه قام اللاعب بالتقدم بشكوي ضد جماهير الاهلي وقالهم مش ههزر معاكم تاني يا وحشين
^^
العثور علي سمكه قرش منتحره علي احد شواطئ الاسكندريه
وذلك بعدما اضلت طريقها من شرم الشيخ وذهبت للاسكندريه
وقد وجدت السلطات خطابا من الضحيه تقول فيه
بقي اهلي في شرم مع السحالي والقطط وانا في اسكندريه مع الزباله اللي في الميه
والنعمه منا قاعدلكم فيها غوز "ملحوظه كتبت غوز لحظه ما ضربت نفسها بالمطواه"
^^
انتهت انتخابات مجلس الشعب
وذلك باكتساح الحزب الوطني الديموقراطي بمعظم المقاعد
بعد منافسه شرسه مع نفسه
وقد جرت الانتخابات شريفه نزيهه لا في حد زور ولا حد نجح بالغش
وكل سنه وانتوا طيبين
****
فاصل ونواصل
الاعلان الاول : مدينتي مدينه عالميه علي ارض مصريه وطبعا واخدينها بلطجه والتخين يتكلم
الاعلان الثاني : اتكلم ارضي يابن بلدي سيبك م المحشي قوم وحلي
عدنا
^^
اهلا بيكم مع تاني فقره من فقرات برنامجنا
حوار محصلش مع نجم مش موجود
***
اهلا وسهلا بيكم اعزائي المشاهدين
عاوزكم ترحبوا معايا مع نجومنا اللي كلهم من خيالي وارجوا انكم تستمتعوا بالحوار معاهم
في البدايه برحب بالكابتن اتش اهلا وسهلا يا ابو الكباتن
-اهلا يا خويا
كابتن في البدايه بحب اسأل حضرتك ايه فكرك بالنسبه لفريقك في المرحله الجايه
-انا باذن الله ناوي لفريقي كل خير بس عاوز وكاله الاهرام لا تكيل بمكيالين
ايوه حضرتك بسألك عن فريقك
-اه مهو طول ما وكاله الاهرام ورا النادي الاهلي طول ما في فساد وانا هتقدم ببلاغ للنائب العام
طيب لو النائب العام نفض لحضرتك والوكاله اثبتت برآتها هتعمل ايه
-اعملك ايه يعني اتشقلب
لا يا فندم ما تتشقلبش بس حضرتك مش شايف انك مجاوبتنيش عن فرقتك ودخلت علي الوكاله والاهلي
-ولا انت شكلك مضايقني خد ياض اما افرمك خود دي في قلبك
* وبكده اعزائي المشاهدين يكون ميعاد فقره الضيف انتهت بعد شويه كدمات بسيطه في وجه المذيع وعلي امل اننا نلاقي مناخيره*
****
ندخل علي تالت فقره من فقرات برنامجنا
وهيا اكتب اسم صاحب العباره التاليه
-احنا مش مع حد ضد حد
-انا محايد يا جماعه وبرنامجي مش اسمه الزمالك اليوم
-انا انا انا انا انا برضه
-"صوت زعيق علي الفاضي" سيديهاتك عندي
-واخيرا اعمل ايه يعني اتشقلب
***
اطلع اعلان يابني خلينا اكمل كوبايه الشاي
فاصل ونواصل
**
الاعلان -الفتره اللي فاتت بنينا مدارس ومستشفيات وجوزنا البايريين وعالجنا العيانين "الحزب الوطني مصلحتك اولا"
انت فاكرني اجنبي ولا ايه
عدنا
^^
معلش اعزائي المشاهدين عارف انكم عمالين تشتموا وتلعنوا في المذيع
عشان قرفكم بالبرنامج الطويل ده بس الكبت بقي بعيد عنكم
ندخل علي اخر فقره في البرنامج وهي
يعني ايه كوك زيرو؟
***
-يعني الدايره كلها تنتخب مرشح المعارضه ومرشح الحزب يكسب
-يعني مصر تساند قطر في التصويت لكأس العالم وقطر تطلع تشتمنا
-يعني امريكا تعترض علي تنظيم قطر كأس العالم قال يعني قطر مش تبعهم
-يعني الزملك يتصدر الدوري حتي الان وبرضه الاهلي ياخد الدوري
-يعني ترشي حكم عشان يخليك تكسب الاهلي يقوم مازمبي يرشي الحكم ويكسبك
-يعني افتح الموضوع ده واقعد ساعه اكتب فيه وفي الاخر يتخفي
وهيا دي العيشه مع كوك زيرو
****
وبكده اعزائي
تكون انتهت فقرات برنامجكم الجديد جيت اختار عنوان لقيته سابني ونام
اتمني تعجبكم ولو ما عجبتكمش مش مشكله يعني
كل سنه وانتم طيبين جميعا
عام هجري سعيد باذن الله
رد مع اقتباس
المفضلات