غمضت عنيا شويه شويه شوفت حجات فرحتنى ولما فتحت شوفت حجات صعبت عليا
السلام عليكم ورحمه الله وبركاته
ابتدى منين ولا منين احكى واقول ولا اسكت بس ده هيبقي معقول ؟؟؟؟؟؟؟؟
بجد هو انا محتاج اتغير ولا انا لسه صغير ولا ده حال كل شخص متحير
احنا عايشبن في بلد ولا في غابه ولا وسط حراميه بيسرقونا ويأكلونا زى الديابه
ولا النصب على الناس الفقراء التعبانه الشقيانه ولا شغل افلام ومسلسلات هابطه وتعبانه
بصيت للاهرمات بطرف عنيا وغمضت شويه شويه شوفت حجات فرحتنى ولما فتحت شوفت حجات صعبت عليا
شوفت الشموخ والكبرياء شوفت العظمه للاقوياء شوفت تاريخ ناصع وجميل مليان حب بدون تمثيل
شوفت صدق وشوفت تعب شوفت جهد مبذول بعرق شوفت طيبه وشوفت حنان شوفت رجاله بجد جدعان
فرحت بجد لما شوفتها عرفت ان بلدنا مفيش زيها تاريخ عظيم وطويل بيحكى قصه ملهاش مثيل
شوفت قاده كان همهم بلدهم تكون الاولى عندهم شوفت رمسيس وهو بيقول انا القائد المسؤل
شوفت بلد الانبياء وجبل موسي في الطور لما كان بيكلم ربه من هناك على طول محستش وقتها بنقص
عرفت اننا كنا عايشين في قصر مكنش فيه محسوبيه ولا نغمه نفاق وكام تمثيليه بجد دى حقيقيه
شوفت الفراعنه كانو ازاى عباقره ومكنوش في حب بلدهم بيستخسرو من العرق اى قطره حتى لو من دمهم
كان فيه وقتها انتخابات اه تشريعيه مفيهاش رقابه بس كانت ماشيه بطريقه شرعيه لان اللى بيكسب كان همو البلد ديا
وفضلت مغمض شويه شويه بعنيا مكنتش عايز افتح عشان افرح باللحظه ديا ولقتنى بشوف بعنيا
نهر النيل وهو بيجرى بالميه حواليا
شوفت الميه ازاى جميله بيضه من جواها بطريقه طبيعيه مكنش فيها مواد صناعيه ولا محتاجه تنضيف كل شويه
هى دى اللى ارتوى منها اجددنا وبنو منها الاهرامات وتماثيل وشويه حجات بيقولو انها اثار فرعونيه
ميه حلوه تروينا تريح عطشنا ومنها تغذينا وتراعى ظروفنا وقتها عشان كنا بنحطها في عنينا ومستغنيناش عنها
عشان كده طلعت العباقره والعلماء وقدمت لمصر شويه فرسان شجعان وروت كمان الارض بدقه وامعان
وزرعنا من الميه الخضره والفاكهه والقمح من غير كيماوى ولا غازات مصنوعه بطريقه ملتوويه؟؟؟
وفتحت شويه شويه عنيا لقيت
لقيت
الاهرامات مسروقه ومفيش حاجه من اللى كان بالحلم محطوطه ومفيش عدل وديمقراطيه بطريقه مظبوطه
وكل فلوس البلد على البنوك برا منهوبه ومن الغلابه والمساكين مأخوذه وللكبار بالاسم منسووووبه
ومفيش تنظيم ولا ادوار تحكم البلد وتبعدها عن الدمار بجد ده كان شئ خلانى منهار وبجد فعلا محتار
فين اللى بيبقو خايفين على البلد زى زمان ويقدمو لمصر تاريخ مشرف وعبقرى كمان
فين اللى كانو على الشعب خايفين وللشموخ والكبرياء محافظين وحتى في الانتخابات مظبوطين
ولقيت كمان
نهر النيل تعبان وزباله في كل مكان وميه مليانه كرول متلوثه بشكل مش معقول بنشربها وبنتعالج
وبناكل قمحها وفاكهتها من غير ما نفارق ومفيش حتى تموين للغلبان ولا حتى رحمه لأى حد تعبان
لقيت زرعها مليان كيماوى بجد شئ غريب يا جدعان وسألت نفسي هو ده نهر النيل بتاع زمان ؟
قلت اغمض تانى شويه
غمضت عنيا شويه شويه
بس رجعت لزمن قريب من المرحله ديا لقيت ناس زمان كلها طيبه وحب ومليانه كتير قلوبها حنيه
لقيت عم حسين الغلبان بياخد اجر تعبان بس منه بيربي العيال وبيعلمهم حب البلد وازاى يكونو شجعان
هو بياخد مرتب بسيط بس هو في حاله وكمان على الفلوس حويط بيقدر ازاى يستغلهم في مصروف البيت
ولما الشاب اتقدم لجواز بنته كان طلبه كويس وخفيف شهاده وانه يقدر يصرف ويتحمل مسؤليه بيت
كان فيه كتير شباب بيعانى بس مكنش بيقعد في البيت وكان بيدور على شغل وبيتعب بس بيلاقي
شوفت كمان زعماء كبيره سعد زغلول ابو طربوش له هيبه حتى مراته كانت دوافعها كتير كان بيخاف
على مصر وكان بجد مستنى يوم النصر ويلاقي بلده عايشه في حاله امن ومن غير تربص او قصف
شوفت كمان اغانى جميله وطنيه ومحترمه وليها رساله بجد حاجه مش طبيعيه شوفت ام كلثوم
والعنديب واسمهان ام صوت حلو جميل واغانى كان ليها طبع ثقافى بتدخل القلوب بشكل خرافى
حتى الافلام والمسلسلات مكنتش مبالغها كبيره بس كانت هادفه وكلها دقه وامكان وبتحكى واقعيه
وممثلين محترمين ومخرجين فاهمين ومنتجين للعمل الناجح منتظرين وللجماهير بعرضها ممتعين
حسيت انه بجد حلم جميل عجبنى فعلا ولقيت انه جو مثالى من اجواء الربيع وفجاة
فتحت تانى عنيا ولقيت حقيقه صعبه عليا
لقيت
مفيش طيبه والحب اصبح خدعه غريبه والكدب بقي مصدر بطريقه شنيعه والشباب بتفكر تهجر بلدها
ومفيش جواز وطلبات الاب للزوج بقت معقده ومصيبه والشباب في البيوت قعدتهم من غير شغل غريبه
وحاله احتقان في الشوارع ومجازر وقتل وقذف بالمحاجر حتى عم فؤاد الغلبان بيبقي بيتخلص من
ولاده وعاوز يرميهم في البحر تخيلو المصيبه دى يا جدعان ومش لاقي لبنت عريس ولو لقى ياعينى
مفيش عنده ليها تجهيز وطول اليوم هو وزوجته عراك وخناق على رغيف عيش ناقص في البيت
ولقيت ناس بمناصب كبيره معرفش ايه هى شغلتهم بس بيعظموهم وبيقول ان دول حاجه في البلد كبيره
ولقيت الاغانى هابطه بطريقه عجيبه واسماء مطربين واصواتهم مريبه وافلام خليعه وقله ادب
ومفيش رقابه وكلو في العنب ولقيت مخرجين بيهربو من الرقابه ومنتجين عاوز البنات عرايا
ووصلنا لحجات بقت زى القهوة الساده وقنوات بتحب الدين عشان تعرض تامر وشرين
هربت بسرعه وقلت لا انا لازم اغمض عنيا شويه
وغضمت من تانى عنيا بس بردو بشويه شويه
لقيت الكوره والجماهير بين اهلى وزمالك عاشقين ومتحيرين وفي حبهم بجد مخلصين
لقيت لاعيبه كبيره وبمهارات جميله ونظيفه وجمهور خايف على بعضه حتى لو التانى
مشجع لنادى منافس بس كان بيحترمه ولقيتهم خايفين على الاعبين وكان في اعلام مثقف وصادق بجد
لقيت الخطيب بيمتع الجماهير والكل بيغانيلو بيبو بيبو الله يا خطيب من كتر حبه الناس للعبه منتظرين
وكان بياخد يدوبك ملاليم بس كان مخلص في لعبه قبل النادى كان للجماهير بيلعب بجهد وتعب مكنش عنده دلع
كان معاه كمان شحاته وابو خليل ولاعيبه بمواصفات جميله مختارين الكوره بدقه و وبينفذو كل حاجه في التمرين
كانو لاعيبه قدوة بجد في الاخلاق ومشريف البلد في كل مكان وكانو بيحبو الكوره بشكل خرافى ومش تعبان
وجماهير بتحب بعضها وبيصنعو الفرحه اه والله من قلبها ومع بعض في المدرجات من غير تعصب ولا شتيمه كمان
كان فيه فعلا معنى للتشجيع وان الكوره مجرد رساله للطيبه والفرحه والاخلاق وكل ده كان دليل
لقيته كان وقت جميل حسيت انى عاوز اعيش فيه ؟؟؟؟؟؟؟؟؟؟؟؟؟؟
وفجاة فتحت عنيا شويه
لقيت لاعيبه للعب عاوزة ملاين والجماهير لكل فريق متعصبين وجو اعلامى مليان نفاق ومفسدين
ولاعيبه بتهدد نوادى والتانى مش عاوز يلعب قبل ما ياخد الموانى ومش هيمضى قال ايه خايف يعانى
وبيتشرط في الكوره وعامل نفسه لاعب فلته وشطوره وكل شويه يكلم وكيل ويقول انا موجودا هو الصوره
وجمهور بيتوعد للتانى والاخر بينتظر عشان يشوف ويعانى وكلو للتعصب بتقوده الامانى
ولقيت سب وشتيمه حتى اننا وصلنا في انحطاط اخلاقي خلانا في صوره بجد مريبه
وكراهيه في مكان ولكل جمهور هناك عنوان اقتل اخوك لو كان اهلاوى او زمالكاوى كمان
وابتدى لفظ اشطه يا مان بيستخدمه اعلام بتاع مساطب وشويه عطر ومكياج وللرياضه اسلوب هابط
عمره ما كان اعلام مفيش مصداقيه وكلو كدب واشطه يا مان واللى بيهمو الفلوس وبيعمل قنوات ده منحوس
مش مهم يعمل فتنه المهم ان في قرش جاى في الزحمه وياخد سبوبته والناس تعيش في حاله احتقان وازمه
ولاعيبه للاخلاق مفتقده ومفيش فيهم قدوة الا كام لاعب هما اللى بيحلو اى افتقاد اتوجد في الازمه
بقي ده اعلام يا جدعان مأجور وكل شكل فيه تعبان وال ايه بيقولو انهم مصدر للعلم والبلد في كل مكان؟
وقلت ياريتنى كنت عايش مغمض ومكنتش فتحت ؟
فضفضه اخوكم اسامة اللى في حال البلد حيران
ومعاكم قاعد بيفكر في كل حاجه ومش لاقى امان
اهو قلنا نخرج اللى جوانا جايز يوصل لأى مكان
بس وحياة غلاوتكم محدش يبلغ عنى يا جدعان
رد مع اقتباس
المفضلات