رئيفة وخروف العيد
رئيفة قالت له يا عبدالرؤوف
زهقت وطهقت من كتر الوقوف
تعالى المجمع معايا وشوف
منايا أشوفك داخل لى بخروف
كفاية إن عمرى مادقت الحمام
وخايفة أقولك تقولى بكام
ونفسى فى أكلة ترم العظام
بمشوى ومحمر ولو كل عام
فراخ اليومين دول محدش يطيقها
تحمر وتسلق ما تقدر تدوقها
وحالفة إن عمرى ما أعدى فى طريقها
ولو جابوا ديكها وقالوا دا فوقها
عيشتنا يا روحى بجبنة وزيتون
وراضية وكله فى حبك يهون
ونفسى فى أكل تزينها الدهون
بكورع وشوربة وفص اللمون
كفاية إنى عايشة وحامدة وشاكرة
وشايفاك يا روحى معندكش فكرة
لا لك فى الحاجات دى ودايماً بتكره
ولو قلت لحمة تقول ألف بكرة
منايا أشوف الخروف لو رومانى
لصبرى يقلب ويصبح جنانى
وقولى لإمتى ح أعيش على الأمانى
وعمرى مادقتش معاك ربع ضانى
يمين بالتلاتة إن ما جبت الخروف
نهايتك يا روحى تكون بين إيديه
تقولى العلاوة تقولى الظروف
ما ليش أى دعوة حتبقى الضحية
ح أجيب الساطور ودستة كياس
وأسلخ وأقطع فى جسمك حتت
وأكسر ضلوعك بهمة وحماس
وتبقى حياتك يا روحى انتهت
منقولة من المصرى اليوم
للشاعر محمد إبراهيم سالم
الفجر الساطع
الفجر هو الأمل
رد مع اقتباس
المفضلات