فيـ الجامعهـ :: إنتـ مينـ فيـ دولـ ::


كلنا فى الجامعة بنشوف طلبة كتير
خصوصا لو كنت فى كلية من كليات القمة
( التجارة - الحقوق - الاداب - معهد خدمة اجتماعية )
تلاقى الطلبة هم ما يتلم والعدد فى الليمون


كل واحد منهم له الاستايل الخاص بيه

^ ^
-


الشاب الكول البيس



الشاب الروش الطحن اللى مفسى دماغه ومنفض للدنيا
مأنتخ أخر حاجة ولا فارقة معاه محاضرات ولا سكاشن
بيتكلم لغة غريبة عربى على انجليزى على الشكرمون طاخ فى الترلولى
لما يقولك بيس يا مان اعرف انه بيقولك السلام عليكم



تلاقى شعره مضروب فى الخلاط وبنطلونه ساقط منه
الجزمة الكاوتش لازم تبقى بلون الحظاظة



كل اللى فارق معاه انه يزبط البنات لانه طبعا واد مخلص ومن الاخر
مقطع السمكة وديلها ولا فارق معاه رنات
طبعا لازم يستلمك تريقة لو عرف مثلا انك معندكش اى بود
انت جاهل ومتخلف - فى نظره - لو مكانش عندك اكونت على الفيس بوك
يعمل خناقة لرب السما لمجرد ان 2 بيتكلمو مين الاحسن عمورة ولا تمورة
لان طبعا حماقى هو البوب ومفيش زيه


************************************************** ************************************************** ************************************************** **********

الشاب المناضل الثورى



هتلاقيه لابس بنطلون جينز مقطوع من الركبة
تى شيرت اسود واسكارف المجاهدين الفلسطينين



لما يتكلم معاك هيتكلم عن الامبريالية والليبرالية
الاشتراكية احسن من الراسمالية
الحرية والتغيير والقهر السياسى
هتلاقى مثله الاعلى جيفارا ودايما يتكلم عن الثورة الفكرية
وان شجرة الحرية لا تروى الا بالدماء
دائم الصدام مع الامن كثير الاعتصام والاضراب
المواطن المصرى المطحون تلاقيه هو كله همه
دائم الاعتراضات وكلمة لا دايما على لسانه
مش عاجبه مبارك ولا البرادعى ولا ايمن نور لان جيفارا هو الحل



************************************************** **********************************


الشاب المثقف الكلاسيكى




غالبيتهم لابسين نضارات ( زى حالاتى يعنى )
تلاقيه دايما مهتم بانشطة اتحاد الطلاب
مقرب جدا من الدكاترة ودايما قاعد فى البينش الاول
وكلمة كلمة ورا الدكتور بيكتبها ولما الدكتور يسكت
يحط القلم بين شفايفه قال إيه بيفكر
كل كلامه اعتقد ، أنا أرى ، يجب أن
ياخدها مشى من الجامعة للبيت طبعا ماهو المشى رياضة
كتبه تحت باطه وبالايد التانية يمسح النضارة
تلاقيه فى اول محاضرة بيسال الدكتور عن ميعاد الامتحانات


************************************************** **********************************

الشاب الملتزم دينيا



السلام عليكم يا اخى كيف حالك ؟ كدة بيسلم عليك
مشمر البنطلون لغاية ركبته مطلق للحية وحالق للشارب
عايش دور الواعظ الدينى وان الناس كلها بعيدة عن ربنا
بيروح الكلية علشان يقعد فى مسجد الكلية
صلاة الظهر اهم من المحاضرة اللى شغالة
( ما انت ممكن تصليها بعد المحاضرة )
ياسلام بقى لو مشغل اغنية على موبايلك بقيت زنديق
يفرق دمك على القبائل لو قلت انك مبتسمعش لمشايخ السلفية
دائم العداء مع الاخوان المسلمين لانهم بيتاجرو بدين الله من اجل المنصب
مبيحضرش محاضرة لدكتورة ربنا امرنا بغض البصر
لو جات طالبة وعايزة تقعد جنبه على البينش
يرفع حاجب ويبصلها بامتعاض ويقولها دور المرأة فى المنزل








دول نوعيات بنشوفها فى الجامعة بس أكيد فى غيرهم كتير

بس السؤال

فيـ الجامعهـ :: إنتـ مينـ فيـ دولـ ::

ولا إنتـ ليكــ استايلــ خاص بيكــ

ولا الأمور معاكــ عاديـــ




منقـــول