مين قال لك يا مصر إنى

**fagrmasr01** · 16-03-2009, 12:10 AM

مين قال لك يا مصر انى
فى بكايا للاحزان بأغنى
مين خدع قلبك يا غالية
وقال لك إن فات ومر زمنى

مين يا مصر يقول نسيتك
واللا البيت مصبحش بيتك
يالى بفرح عمرى اشتريتك
انا عمرى ابدا ما اشتكيتك

اوعى تظنى ان الولد يا أمنا باع الارداة
مش هتنازل عن كرامتى عن السيادة
حتى لو يتحكموا ف الهوا ودور العبادة
انتى انتى يا مصر انتى ..أحلى عادة

**fagrmasr01** · 22-03-2009, 03:34 AM

اتمنى الاطلاع عليها والنقد

**lionking** · 22-03-2009, 11:05 AM

حلوة اوى يا استاذ جمال
وكلها حب للوطن وشجن ,,,
انا هرد بس بطريقتى ومحدش يزعل منى بقى
عشان انا مخنوقة منها

ليه سببتينى من غير اسباب
ولا بقينا خلاص اغـــــراب
دا الدمعه اللى ف عينى دارتها
وقصورى بنتها وهدتـــــــــها
ليــــه قلبك ما عملشى حساب
ولا عمرى هرجعلك تانــــــى
وهداوى جراحى واحزانى
دا طريقك كان كله عذاب

**fagrmasr01** · 23-03-2009, 02:24 AM

الف شكر على اهتمامك يا ليون
وحلوووو اوووى الرد بتاعك
فعلا ابداع جميل
وعلى فكرة يا ليون ...
ردك هو تعبير برضه عن حب الوطن

والمهم اننا كلنا لسه برضه بنناجيها

.. حتى لو بكلمة عتاب أو بالشجن
.. حتى لو بكل أحزان الزمن
.. لانها هى السكن
.. هى الوطن ..
كل الوطن ..
وبصراحة مهما تعبت فيها او عليها
كلمة بحبك ليها .. تتفهم معانيها
و لسه برضه بحبها وباغير عليها

**خلود** · 23-03-2009, 11:16 AM

ياعينى على الابداع

تسلم ايادى الثنائى لان العضو الثالث بطل ينتج وينقل ويعمل اى حاجه

اشعارك جميلهاستاذ جمال وانتى ليون برضو بنحبها ومش هنبطل نحبها

تسلم الايادى