..بقلم / هشام صلاح

هذه العبارة " ممنوع الاقتراب أو التصوير" موجوده على لافتة متكرره فى اماكن كتيره بتصادفنا واحنا ماشيين او حتى واحنا سايقين ..وبتلفت نظرنا من واحنا صغيرين واعتقد كلكم بتاخدوا بالكم من العبارة دى ,,وهى فى رأىَ الشخصى عبارة مستفزة جدا ومضحكة جدا وقمة فى الغباء..استطيع ان افهم ان الهدف منها هو عدم الاقتراب ومنع التصوير ولكن النتيجة بتكون عكس كده تماما..فانا أعترف بأننى -منذ طفولتى وحتى الان - اول ماشوف اليافطة دى واقرأ العبارة دى ..اجدنى أدقق النظر واقترب وابص واتجول ببصرى واعمل سكانر للمنطقة دى واللى حواليها وأرسم ليها خريطه فى دماغى وطالما تمنيت وجود كاميرا بحوزتى لاقوم بالتصوير..واقول ياترى فيها ايه مش عاوزينا نصوره..وليه مش عاوزينا نقرب..وتثور تساؤلات عجيبه جوايا ..ده نابع من ثقافة الفضول وحب الاستطلاع اللى اتربينا عليها وبتبقى جوانا ..
وانا ماشى باكلم نفسى وسرحان فى ملكوت الله وطقهان من ضغوطات الحياة وبفكر هنعمل ايه لو قابلنا الجزائر فى الدور قبل النهائى ؟؟؟ طب وهو بس ماخدش ميدو ليه..وضارب اخماس فى اسداس ..الاقى اليافطه دى فى وشى وكأنها بتقولى: استوب ..رايح فين ..؟؟ سيبك من اللى بتفكر فيه دا كله ..اوعى تقترب ..(الكلام ده كله من اليافطه ليا) فاقترب..طب أوعى تبص..فأدقق النظر ..والنبى اوعى تصور..الاقى نفسى باقول فى نفسى :اقول ياربى هو مافيش كاميرا هنا..!!!
وبعدين ياجماعة ...اصور ايه..؟؟ وليه؟؟؟...دايما اليافطه بتبقى على ارض فضاء او مساحة فاضية او مبنى مهجور تعبان ...عمرى ماكنت هاخد بالى من وجود ايا منها الا بسبب هذه اليافطة الجهنمية ..اموت واعرف مين العبقرى اللى اخترعها.. مش عارف ..!!!
مش عاوزنى ابص ولا اقترب ولا اصور...؟؟ ياسيدى ماتقولش والله ماهاخد بالى ..الا اذا كنت عاوز تلفت نظرى وتخلينى ابص دى تبقى حاجة تانية.. ولا دى جزء من ثقافة الغباء (حتى الغباء بقى ليه ثقافه).

طب جرب كده وشيل اليافطة المستفزه دى والله ماهناخد بالنا منكم خالص ولا هنبص اساسا ولا هندور على كاميرا عشان نصور ..وايه اللى جاب فكرة التصوير اساسا فى دماغنا انتوا ليه بتوجهونا كده ..؟؟ هو يعنى الاماكن اللى مش موجود عليها اليافطه دى بنصورها وبنقترب منها ..ما تفكروا شوية..
فكرتونى بالذكاء الشديد اللى كان موجود زمان بتاع محطة المطار السرى ..محطة المطار السرى ..الله.. سرى ازاى ايه بقه.. من الفضيحه اللى الكمسارى عاملها دى ..

واليافطة الكوميدية اللى موجوده على المحور - مازالت موجوده على فكره - ولو حابين تروحوا تتصوروا جنبها للذكرى روحوا - اللى بتقول احذر – بخط كبير- الرادار على بعد واحد كيلو- وكل ماأشوفها اضحك بشده وكانها برومو لقناة موجه كوميدى وأتمتم فى سرى.. متشكرين ياسيدى ..وابطء السرعه وبعد الكيلو ده مايعدى اجرى بالعربيه فوريره ,,طيران عشان ألحق اكرفر(جاية من كارفور) او أهيبر (جاية من هايبر وان ) حسب الاحوال ..

بجد بجد ..اليافطه دى مش ناقصها الا شريط كاسيت يشتغل جنبها ويكون بيطلع صوت واحد بيعمل بس بسسسبس انت..ايوه ياللى ماشى ..خد بالك..دى منطقة مهلبيه..أوعى تبص..بلاش والنبى ..بقولك منطقة مهلبيه..طب كفاية البصه الطويلة دى ..امشى بقه..هتعملها اسكانر ولا ايه...طب بلاش تصور..المره الجاية ابقى هات كاميرا واعمل حسابك..اقول ايه بس تانى ..مش لاقى غير :اللهم لا تؤاخذنا بما فعل السفهاء منا

ملاحظة هامه: قمت باستبدال الكلمة الاصلية بكلمة مهلبية وذلك لاغراض رقابية ولكنى واثق انكم عرفتم الكلمة الاصلية ايه




منقـــول