.بقلم / هشام صلاح

"اللعنه على الابراج " جمله مشهوره جدا قالها العظيم الراحل صلاح ذو الفقار فى فيلم "الناصر صلاح الدين" واصبحت اقولها كل مالتكنولوجيا الحديثه تتحفنا بحاجة جديدة اقول " اللعنه على التكنولوجيا " ده عشان مببقاش بس عارف استخدمها لكن اول ماتعود عليها وابقى " فوريره " تبقى حلوه وجميلة ..والصراحه الناس دى- اللى بره يعنى مش احنا – مش بيهمدوا شغالين كل يوم اختراعات ..اختراعات ..مش ملاحقين عليهم - فعلا احنا مش ملاحقين ما اقصدش لاسمح الله اننا مش ملاحقين نحصلهم ولا نخترع زيهم ولا حاجه - لاطبعا انا اقصد مش ملاحقين نستخدم اللى بيخترعوه لينا ده ..!!!!! ومن اغرب الاختراعات اللى صادفتنى فى حياتى اختراع اسمه "البلوتوث " كنت هتجنن- ومازلت مش فاهم ازاى بيشتغل وبيعرف منين اسم موبايلى وكمان تبادل ملفات وصور وفيديو بين تليفونين حاجة غريبه فعلا..وكنت باتغاظ جدا لما الاقى حد يجى يقولى اقفل البلوتوث بتاعك اقوله عرفت منين يقولى باين عندى وعرفت انك جيت وموجود هنا وفاتح "بلوثوثك" كمان.!!! هتجنن..فاتح "بلوتوثى" يادى العيبه ..يادى الجُرسه ..يادى الكسوف " طب علمنى عشان ابقى تكنولوجى متحضر زيكم..دنا بقول لصديقى..رد عليا وقالى : بص ياسيدى تفتح البلوتوث من هنا ..وكانك عاوز تبعت صوره معينة هيقولك بحث عن اجهزة جديدة هتقوله اوكى هيجيبلك كل اجهزة الموبايل فى محيط قعدتك وتكون فاتحه" بلوتوثها "وتقدر انت كمان تقولهم اقفل يا "س" البلوتوث انا شايفك ... اقفلى يا "ص" انا عارفك ..وكمان مسمياه كوكو ياعينى ياعينى الله ده حاجة جميلة جدااا ...عملية البحث واخبار الناس ممتعه ...اتعلمت كويس... وقلت والله كل شوية هعمل اسكان وبحث واشوف مين هتسول له نفسه وسايب "بلوتوثه" مفتوح كده عادى ..حست انى بقيت محترف تكنولوجيا وجامد اوى وبقيت بمشى شاهر الموبايل فى وش الناس وكأنى جهاز الكشف عن المعادن وعلى الله الاقى حد فاتح "بلوتوثه"..وقلت لابد من تجربه عمليه وأستعرض مفاهيمى وأترسم عالناس شويه ..أمال ايه ؟؟... دنا مصرى وأبويا مصرى و"بلوثوثى" برضه مصرى ..المهم ركبت مترو الانفاق لقيت ناس كتير قاعده وبرضه ناس كتير واقفه ... عادى مش مترو..فكرت أجرب إختراعى وفتحت البلوتوث وعملت بحث عن اجهزة..وجدت جهاز فاتح فعلا..قعدت ابص وادقق واتأمل كل الناس واقول فى سرى ياترى مين فيهم..عامل زى الساحر اللى عاوز يطلع عفريت ...أبُص يمين ابُص شمال..عاوز بس اشوف حد ماسك الموبايل ولا موطى راسه وبيبص فيه ولا حتى بيلعب سناك حتى ..عاوز ابعت له صورة عشوائية كده واكتشفه وابان انى واد مخلص ....وماليش حل ودكتوراه تخصص "بلوتوث" ..اخترت صورة ورده لطيفه وقلت ابعتها للموبايل ده ..ايه جه كمان و مسمى نفسه الناصح ... !!!! قال ناصح قال... دنا هاروشه..ماشى ياعم الناصح ..عشان تبطل "نصاحه"..حد يسيب "بلوتوثه" مفتوح كده ياناصح افندى..طب خد الصوره دى..اقبل..اقبل.. اقبل ....اعمل اكسبت. ايوه ..اوك اهو عمل اكسبت وقبل الصوره ..بصيت بسرعه على كل ركاب العربيه المترو اللى انا فيها مين اللى ماسك موبايل فى ايديه..الله ..هو فيه ايه؟؟.. ياعالم..عاوز اقولهم بصوت عالى مين اللى قبل صورة الورده بتاعتى ؟؟ لاحياة لمن تنادى ..يعنى هايكون عفريت يعنى؟؟ ..فيه حد فاتح "بلوتوثه" وماسك موبايله وبيلعب فيه وقبل صورتى كمان ..أدور واتمحص وأتفحص ملقتوش..هتجنن..ثوانى ولقيت رسالة جايه لى من نفس الموبايل اللى اسمه ناصح بصيت بسرعه ملقتس اى شىء غريب ولا حد ماسك موبايل ولا حاجه..طب اعمل ايه؟ اعمل ايه؟ ..الفضول هيموتنى ..قبلت الملف ..عملت اكسبت.. لقيتنى استلمت ملف ..فتحته..ياللهول تصوروا لقيتها صورتى وانا ماسك الموبايل ومن زاوية قريبه جداااا..وكأنى امام مرايا ..لا ده تحدى بقى ..ده مش عرفنى وبس لا ده صورنى كمان من غير ماحس..بابص لقيت واحد من شباك المترو بعد مانزل المحطه بيشاور لى وبيقولى وهو بيضحك " اقفل بلوتوثك " ياعم الناااصح ....نزلت من المترو وانا باقول اللعنه على الابراج ..اللعنه على التكنولوجيا.. اللعنه على البلوتوث.




منقـــول