انشد ياقلبى غنوتك للجمــــــــــــال
وارقص فصدرى من اليمين للشمال
مهو مش بعيد تفضل لبكرة سعيـــد
دا كل يوم فيه الــــف الــــف احتمال
وعجبــــــــــى
:::5:::5:::5
خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه
وعجبــــــــــى
:::5:::5:::5
مرغم عليك يا صبح مغصوب يا ليل
لا دخلتها برجليا ولا كان لى ميل
شايلنى شيل دخلت أنا الحياة
وبكره ح أخرج منها شايلنى شيل
عجبى !!
:::5:::5:::5
يوم قلت آه .. سمعونى قالوا فسد
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
عجبى !!
:::5:::5:::5
ليه يا حبيبتى ما بينا دايماً سفر
ده البعد ذنب كبير لا يغتفر
ليه يا حبيبتى ما بينا دايماً بحور
أعدى بحر ألاقى غيره اتحفر
عجبى !!
:::5:::5:::5
ورا كل شباك ألف عين مفتوحين
وانا وانتى ماشيين يا غرامى الحزين
لو التصقنا نموت بضربة حجر
ولو افترقنا نموت متحسرين
عجبى !!
:::5:::5:::5
إقلع غماك يا تور وارفض تلف
إكسر تروس الساقية واشتم وتف
قال : بس خطوة كمان .. وخطوة كمان ..
يا اوصل نهاية السكة يا البير يجف
عجبى !!
:::5:::5:::5
وقفت بين شطين على قنطرة
الكدب فين والصدق فين يا ترى
محتار ح اموت .. الحوت خرج لى وقال
هو الكلام يتقاس بالمسطره ؟
عجبى !!
:::5:::5:::5
الدنيا أوده كبيره للإنتظار
فيها ابن آدم زيه زى الحمار
الهم واحد .. والملل مشترك
ومفيش حمار بيحاول الإنتحار
عجبى !!
:::5:::5:::5
يا طير يا عالى فى السما طظ فيك
ما تفتكرشى ربنا مصطفيك
برضك بتاكل دود وللطين تعود
تمص فيه يا حلو .. ويمص فيك
عجبى !!
:::5:::5:::5
:بوكيه اعتذر للاطاله لكن رباعيات صلاح جاهين شئ مميز يستحق العرض:بوكيه
:فلور اميرة بدون مملكه:فلور













منقـــول


...