المسحـــــــــــــــــــــراتى مهداه للصحفى (وائل الابراشى )

[lionking]

المسحــــراتى : ( الصحافـــة الحــــرة صـــوتنا )

شعر : عبد المجيد راشد



مسحراتى

بصرخ ليلاتى

على طبلة صوتها

أنين ناياتى



اصحوا و فوقوا

لكل آتى
أوجاعنا جارحة

و دموعنا سارحة

أوضاعنا شارحة

من غير ما هاتى

مسحراتى

عاشق بنادى

الله أكبر

على كل جبار

على كل عاتى

على كل ظالم ما يعرف

غير طريق الشيطان

عميل

أو ذليل

للصهاينة و الأمريكان

مسحراتى و فى الميدان

الدق على طبلى يهز

و الكلمة من قلبى تفز

زى الصحافة الحرة

تقطع رقاب و تجز

تقطع خيوط و تنز

الصحافة الحرة صوتنا

بعد قهرتنا و سكوتنا

تصحى روحنا بعد موتنا

الصحافة الحرة نور

تكشف العتمة ف سطور

تنتفض

تنهض

تثور

الصحافة الحرة فيها

كلمة الحق تلاقيها

ساطعة زى الشمس طالعة

نورها سابح فى الغيطان

فى الحوارى و الميدان

فى المصانع و الديوان

فى الكفور و فى النجوع

كلمتها أقوى من الدموع

كلمة طالعة من الجموع

كلمة بتعبر و تحكى

ع اللى شاكى و اللى مشكى

ع اللى موجوع و اللى يبكى

الصحافة سلطة رابعة

للرقابة و للمتابعة

تكشف المستور تحارب

كل فاسد كل ناهب

و اللى بيحاول ينولها

تحرقه و لا يوم يطولها

حتى لو قفلوا الجرايد

كل حر جريده وحده

صوتنا مش ممكن يموت

حتى فى عز السكوت

مش هنستسلم لشلة

مهما كان السجن عتمة

مهما كان الظلم أعتى

مهما حاصرونا فى بيوتنا

الصحافة الحرة صوتنا

فى الحضر

أو فى البوادى

مسحراتى و أنادى

على كل صوت من بلادى

الأمة محتاجة الضمير و الفعل

محتاجة حركة

تعدل الموازين

و تبدل الأحوال

يا كل عم وخال

المعركة ع الأمة

خطها واضح و معلوم

تفتيتها غاية

تقسيمها حلم العدو

تقطيع خريطتها

هدف مرسوم

مكتوب علينا

نصحى م النوم

نفوق و نقوم

نقاوم عدو مهزوم

و متوحش

و كل ما زادت هزيمته

فى العراق

و فى فلسطين

و فى لبنان

و الصومال

و السودان

و فى الأفغان

يزداد جنان فى جنان

و يضغط على حكام عميلة

بينطقوا حروفنا

و محسوبين مننا

و هما اخطر علينا

من عدونا

و مش عاجبهم صراخنا

فى الصحافة الحرة

لكن الصحافة الحرة

مرة

صوتها سيف

صفحاتها عنوان للكفاح

حسها نبض و سلاح

و يوم حساب الفاسدين

الصحافة للجميع أرشيف

محسوبة كل الخطاوى

للى ظلم

و اللى فسد

و اللى باع البلد

و اللى خان العهد

الصحافة الحرة أكبر

من كلاب السلطة و أكتر

من جيوش الشر و أخطر

من ديابة

عايزينها غابة

و لا يهمهم أجداد

و لا أحفاد

مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

وحد الرزاق





الكاتب\\ عبد المجيد راشــد

[محمود التهامي]

طبعا القصيدة جميلة جدا وتشبيهاتها وموسيقاها روعه
لكن ليه الإهداء لوائل الابراشي ؟؟؟
انا عن نقسي مش بحبه فمش فاهم ايه المقصود

[lionking]

مهو عشان انت مش بتحبه
لكن هو بيحبه ومتضامن معاه فى قضاياه

وبعدين ولا يهمك يا محمود اعتبرها مش لوائل ممكن تعتبرها للشعب كله

مرضى يا عم
؟؟؟؟

[إبراهيم البشبيشي]

رووووووووووووووعة

[lionking]

شكرا ابراهيم على مرورك وتعليقك الجميل