كيف اتعامل مع ابنتى كى احتويها من الصغر

[الطاوس الحزين]

السلام عليكم ورحمة الله وبركاته

الموضوع رائع جدااا ومهم اوووى واعتقد اننا كلنا بنعانى من هذه المشاكله

بصفتى ام لبنت عندها 10 سنوات

اى نعم هيا لسة صغننة بس مش اوى برده

انا هتكلم عن المحاولات اللى بعملها من اول ما بدات تدخل المدرسة

انا واعوذ بالله من كلمة انا حاولت ونجحت فى انى اكون انا وهيا اصحاب بالعكس كمان صديقاتها كمان بقوا صديقاتى

كل ده كويس (مش كده)

دايما بخرج معاها وبتكلم معاها فى كل حاجة وبحاول احسسها اننا من سن بعض وزى بعض

يعنى انا نزلت لسنها لانى مش كبيرة فى السن وبلعب معاها وبعمل كل اللى ممن يتعمل


لكن :::::::::::::::

هيا دلوقتى فى الصف الخامس

لقيت انها ابتدت تقلد البنات التانيين وبقت علطول بتقول فلانة قالتلى سر وعلانة قالتلى مش عارف ايه

وحلفونى يا مامى انى مش اقولك

اشتريتلها اوتوجراف من اللى طالعين اليومين دول

وبنت عمتها كمان جابت واحد

مكتوب فى شوية اسئلة مش زى ايامنا

من ضمن الاسئلة::::

يعنى ايه حب؟؟

ايه اللحظة اللى مش ممكن تنسيها؟؟

ايه اللى بيعجبك فيه؟؟

وبالصدفة البحتة وقع فى ايدى الاوتوجراف ده

وقريت اللى اتكتب فيه طبعا هو مش منطقى انهم بيحبوا او حتى يعرفوا يعنى ايه حب

بس هو ده اللى مكتوب

ومن وقتها بحاول استدرجها فى الكلام وهيا وبنت عمتها مصرين
مفيش حاجة واللى غايظنى انهم بينكروا ومستمرين فى الانكار

اكتشفت بقى

ان انا لوحدى مش كفاية والصحوبية والحب والحنان مش كفاية

لازم نكون كلنا بنفكر بنفس الطريقة لان ده بنتى اتعلمته من بره البيت


ممكن حد يقولى انا ممكن اعمل ايه عشان اخليها تحكى بس

هذه مشكلة احدى العضوات وتريد ان تعرف كيف تتعامل مع ابنتها .......؟؟؟

[lionking]

جزاك الله خيرا

بس فعلا محدش رد يمكن هما كمان بيعانوا من نفس الموضوع ومش عارفين يتصرفوا

[إبراهيم البشبيشي]

واضح انها مشكلة كبيرة ومحتاجة للتعامل بحذر وعمق وأنا بقترح على أم البنوتة الصغنونة اللي فاضلها سنتين تلاتة وتبقى آنسة انها تاخد بالها من كل ال محيطين ببنتها عشان تقدر تعرف مدى التغير الحاصل في نفسية بنتها بفعل اصحابها او قرايبها من سنها وتكون جهزة للتدخل في اي وقت بحنان وحزم وحسم لتضمن عدم انحراف الامور عن سياقها الطبيعي وارى ان البنت في السن الصغيرة دي مؤهلة لتعيش خيالات الحب التي قد يتوهمها الأطفال في مثل سنها وربما في سن أصغر تحت تأثير ما يحدث في وسائل الاعلام المختلفة عموما والموجهة للطفل خصوصا وقد كنا عرضنا في منتدانا الكريم قبل سابق إحدى الصور التي تظهر في مشهد بأحد أفلام الكارتون - الذي من المفترض أنه موجه للأطفال - وكانت صورة عارية إباحية , لذلك وجب الحرص والحذر حتى تمر عملية التربية على خير بإذن الله .

[lionking]

شكراااا جدااا على ردك وع النصيحة

بس والله انا بحاول والله الموفق

[محمود التهامي]

المشكلة الاكبر انك شايفاها صغيرة
لكن زي ماقل عم فجر دي فاضلها كام سنة وتبقا انسة مش طفلة زي مانتي شايفاها

جربي تحترمي احساسها ومشاعرها مهما كانت صغيرة

افتكري نفسك وانتي في سنها
هتلاقي الموضوع مش مشكلة ومش كبير زي ما البعض متخيل
حب الطفولة دا حاجه جميلة قوي كلنا جربناها وبينتهي بمجرد البلوغ وتطور مرحلة المراهقة

ايها فرصة تعيش حياتها زي ما غيرها عاش حاولي ما تخنقيهاش بالاسئلة
حاولي انتي كمان تحكيلها اسرار
متتعامليش معاها زي مفتش المباحث لأ عايزة تسمعي منها لازم انتي كمان تسمَّعيها