السلبيات أحب أنبّه الى حاجتين:



الأولى:انا لا أقصد أي جامعة أو كلية محددة فهذه السلبيات في أغلب الجامعات الحكومية والخاصة.
الثانية:الغرض منذكر هذه السلبيات مش من باب اليأس والنقد لمجرد النقد وإنما محاولة لتشخيص المرض عشان نستخدم العلاج السليم.
*آخر الصرعات والموضة



أعتقد مش من المبالغة اذا قلنا ان الزي الجامعي الموحد أصبح ضرورة!! لأنه اللي نشوفه في الكليات من آخر الصرخات في الموضه المتعلقة بالزي والتسريحات وأشكال الحلاقة، يجعلنا نفكر بهذه الطريقة.


والله عجائب تشوفها والكل يعرف هذا حتى أن أحدهم كتب -ساخرا- : اذا حبيت تتابع آخر أخبار الموضه كل اللي عليك انك تخبط زيارة لأقرب كلية!
وهذا لايخص الرجال فقط لأن البنات أكثر وأكثر.. عبايات الوان وأشكال فاضحة..
يعني أنا مش عارفه ايه اللي تفكر فيه البنت لما تلبس ملابس ضيقة تفضح ما تظن أنها تستره وفي الكلية في المكان اللي من المفترض يحتوي على نخبة المجتمعات ومفكريهم.
في حاجه كمان تخص البنات وهي العطور اللي تشم ريحتها من مسافة أمتار! يابنات تذكروا قول الرسول عليه الصلاة والسلام «أيما امرأة استعطرت فمرت على قوم ليجدوا ريحها، فهي زانية. وكلُّ عينٍ زانية».




أنا مش ضد الموضه بس ياجماعه في حاجات عييب تلبسها وخصوصا في الكلية وقد سُميت الجامعة بالحرم الجامعي..ليه؟ لأن لهذا المكان حُرمة وهو مقدّس عند البشر كلهم.





*دكاترة ولكن…!




في نوع من الدكاترة والمحاضرين عنده استعداد أنه يدرّس أي مادة سواء كانت تخصصه والا مش تخصصه وياما شفنا حالات كثيرة جدا الدكتور تخصصه حاجه واللي يدرّسه حاجه ثانيه خااالص! وفي دكاترة يكونوا فاهمين بس مافيش عندهم القدرة عشان يوصلوا المعلومة للطالب بطريقة صحيحه وهذه منتشرة بشكل كبير جدا خصوصا في الكليات العلمية والعملية.


ياجماعة ليه مش بيعملوا لهم دورات في طرق التدريس وتأهيل ماباتكلف كثير.
وفي نوع ثالث لافاهمين ولاعندهم القدرة أنهم يوصلوا معلومة وتلاقي خبرهم عندالطلاب كلهم وفوق ذا كله تلاقي عندهم عدم الثقة بالنفس يخاف الطلاب يسألوه في القاعة..
بعدين في البعض يالله يجيب لك داتاشو ونسخ الكتاب والا البوربوينت ويقعد طوال المحاضرة يقرأ مجرّد قراءة فقط من الكتاب ايه الفائده؟؟خلينا نقرأ واحنا بالبيت أحسن!



*الجلوس في الممرات

بعض الطلاب والطالبات يعني مايلاقوش مكان يجلسوا فيه الا في الدّرَج والا في الطريق. طيب روحوا غلسوا ودردشوا لكم بأي مكان بعيد عن الطريق بعيد عن القاعات لأنه أحيانا ما تقدر تركز في المحاضرة وانت تسمع الضحكات من براع القاعة أكثر من صوت الدكتور.



*بلوتوث

هذا حكايته حكاية! في طلاب وقت المحاضرة يجلسوا في مؤخرة القاعة ولأنه القاعات حقنا الكراسي ورا بعض أقصد مش مدرجات يعني الدكتور مايشوف ايه اللي يحصل من منتصف القاعة والخلف،المهم الطلاب يشغلوا البلوتوث ويتراسلوا بينهم نكات ومقاطع ومش عارف ايه وهذا إسم من؟وذا حق من؟ ياخي اذا المحاضرة مش عاجبتك أخرج براع وبلتِث براحتك.
والى جانب حكاية البلوتوث في برضه المكالمات أثناء المحاضرة سواء من الطلاب أو الدكاترة يعني صار من الطبيعي أنك لو جت لك مكالمه وأنت في مؤخرة القاعة رد عالإتصال مافي مشكلة! أيضا في دكاتره يجزّع نص وقت المحاضرة وهو يستقبل مكالمات ! الوقت اللي ضاع لحساب من؟؟



*الطالب يتحمّل أخطاء الكلية والجامعة

اتخيلوا معي طالب يدرس أربع والا خمس سنين يتخرج فرحان يروح يسحب بيان درجات يلاقي نفسه فاشل في أربع مواد بالرغم أنه كان ناجح فيها ويمكن كان فيها إمتياز! يقلك مافيش معك حل غير أنك تمتحن هذه المواد من جديد لأنه قد رفعنا الكشوفات للجامعة ومانقدرش نعملك حاجه!!
بالله عليكم حاله زي كذا من المسئول عنها؟؟؟ الطالب المسكين هو في النهاية من يتحمل أخطاء موظف أو موظفه في قسم التسجيل!
المشكله الكبرى أن مثل هذه الحالة تتكر كثيرا وكثيرا.
هذا مثال فقط عن أخطاء أقسام التسجيل وفي حاجات مشابهه بلاحساب.




*التدخين في القاعات الدراسية




دخّن ما تدخنش أنت حر بنفسك وصحتك لكن أنك تدخن في الكلية داخل قاعة دراسية وانت تشرح محاضرة للطلاب هذا غلط ومليون غلط هذا بالنسبة للدكاترة برضه الطلاب المفروض يتجنبوا التدخين في الممرات عشان في ناس عندهم أمراض والأهم أنك تحترم هذا المكان.
جامعة عدن مشكورة عملوا قرار لمنع التدخين في الكليات والمكاتب والممرات وكل مباني الجامعه لكن للأسف لم يتم تطبيق هذا القرار من الدكاترة أنفسهم مابالك الطلاب!.






*الموظف وعدم الإلتزام بالوقت والدوام

كذا مره يكون عندك معاملات في الجامعة والا في الكلية تروح تلاقي الموظفين يوصلوا المكتب الساعه تسع، تسع ونص يجلسوا يفطروا لما الساعة عشر، عشر ونص يالله معك معك ساعة ساعة ونص تمسك طابور وتنتظر ورقتك لما تخرج بعد كم ساعة لأنه الموظف والا الموظفه مشغول يتكلم تلفون مع واحد صاحبه لا وكمان بعض الموظفين يقفل مكتبه ويجلس داخل كأنه مش موجود والا يروح يجلس له مكتب ثاني وجا وقت صلاة الظهر قالوا راح يصلي لمدة ساعة ورجع المكتب يشل أوراقه الساعه واحده وروح.. وانت المسكين يكون معك معامله مستعجله والا انت مسافر كل واحد معه شغلاته تجلس تجري وتعامل لمدة أسبوع على حاجه ما تأخذ أكثر من 3 دقايق!






* تسريب الإمتحان

كثيرا ما سمعنا وعايشنا حالات تسريب أسئلة الإمتحان من بعض الدكاترة لطلاب والمشكلة أن بعضها تتسرب بمقابل حبه جنيهات!! وكيف نشتي تطور التعليم؟؟؟




*الكتابة على الجدران والكراسي




ادخلوا أي قاعة وركزوا بس عالكتابات اللي عالكراسي والجدران اللي يكتب ذكريات واللي يكتب برشلونه يجي أصحاب ريال مدريد يمسحوها وكتبوا النادي حقهم واللي يكتب رقم تلفونه واللي يكتب ايميله واللي يرسم يعني شخبط شخابيط!! نفسى اعرف هو مرض نفسي والا ايه الحكاية.



*بطاط وشبس في القاعة

أحيانا تدخل قاعة المحاضرات تلاقي القاعة ريحتها كلها بطاط وشبس وحُمَر ومش عارف ايه…وكمان اللي يشرب ببسي ويرمي بالفاضي يعني تتحول القاعة الى كومة من القمامة.. يا إخواني هذه قاعة للمحاضرات مش مقصف.




*مافيش حمامات بالكلية

كثير كليات بدون حمامات لا للرجال ولا للنساء! طيب فين تروح والا فين تروحي؟؟ في بعض كليات قالوا كان في عندهم حمامات بعدين بسبب عدم الإهتمام بنظافة الحمام من قِبل الطلاب أنفسهم وتكسيرهم للحنفيات والمغاسل رجعوا قفلوا الحمامات!



*دكاترة يتحرشون بالطالبات!

قصص كثيرة حصلت في بعض الكليات مفادها أن بعض الدكاترة أو المعيدين أو المحاضرين يتحرشوا بالطالبات بشكل مباشر أو غير مباشر.. ياجماعه عيب هذا الكلام والله..أنا شخصيا مش قادر أكتب أي تعليق حول هذه النقطه.



*طلاب فاهمين الكلية غلط..!

بعض الطلاب والطالبات ما يدخل الكلية الا عشان هارب من شغل والا عشان يبحث له عن بنات، يعني خلوني أقولها بكل صراحه ” صياعه” وكثير ما نشوف طلاب وطالبات يعملوا حركات عيب الواحد يذكرها.. حركات ناس المفروض ما يكونوا في الكلية..





*أمن الكليات وحراسة البوابات

شي رائع وجود حراسة في بوابة الكليات وأمن لكن المفروض أن يكونوا ناس مثقفين مؤهلين لأنهم من المفروض أن يتعاملوا مع أرقى ناس في المجتمع مش تجيب لي حارس للبوابة واحد “أُمّي” ولايفم ولايتفاهم مع حد وكل يوم يعمل له مشكله ناهيك عن أنه بعض الحُراس دايما ما يتحرشوا بالطالبات.



*التمييز بين الطلاب البلد والطلاب الأجانب

الطلاب الأجانب على عيونا وروسنا نرحب بهم في بلدنا وفي جامعاتنا لكن كلنا من المفروض أن نكون تحت القانون وخصوصا في الجامعات كلنا سواء.. لكن للأسف الشديد بعض الدكاترة يُميّز الطلاب الأجانب ويعاملهم بطريقة أكثر لطفا وليونة رغم حتى لو ارتكبوا مخالفات كبيرة.. مش عارف أنا ايه السر!



*كراهية بين الدكاترة

تستغرب لما تشوف اثنين دكاترة يتصايحوا ويتساببوا قدّام الطلاب! والا دكتور يقطع محاضرته ورجع يسب ويشتم في دكتور ثاني! ياترى ايه بايكون تفكير الطلاب؟موقفهم؟ رأيهم؟ الله يستر.





*أماكن للصلاة في الكليات

أضيف هذه النقطة بعد أن نبهني عليها الكثير من الإخوة والأخوات
كثير من الكليات لايوجد فيها مُصلى ولو بسيط ولذا يضطر الكثير للصلاة في الممرات وهذه مشكلة مهمه خصوصا بالنسبة للبنات فين يصلوا؟؟
… … …






هذه بعض النقاط اللي قدرت أجمعها يمكن نسيت حاجات كثيرة.ذكروني بها في تعليقاتكم.
هذه الحاجات كلها محتاجه وقفة جادة وتعاون بين الطلاب أنفسهم وبين الجهات المسئولة في الكليات والجامعات وكذلك الدكاترة.. ومتى إحترمنا الحرم الجامعي وحرماته نستطيع أن نتجه الى نقاط أخرى مثل تطوير المناهج وتصحيح بعض جوانب التقص والخلل في مسيرة التعليم الجامعي.
ولايفوتني في النهاية أن أشكر كل المخلصين الذين يعملون بأمانة وإخلاص ويسعون لتلقي ونشر العلم والرّقي بمجتمعاتنا نحو التنمية سواء من الطلاب أو المدرسين والدكاترة والموظفين..