احنا الشعب

[يحيى مطرواى]

(احنا الشعب)
موضوع الغرض منه عرض وجهة نظر كل مصرى بيحب الخير لمصر
فى أى شئ(سياسة/إقتصاد/....)
بس أهم شئ هو الصراحة بدون لف ولا دوران .على أن تكون وجهة النظر خاصة بالكاتب وليست منقولة وأنا هبدأ بنفسى.وأتمنى من الله عز جل أن أشاهد مشاركات تفوح منها رائحة ذكية أن كل عضو لا يتجمل ويكتب كلام من قلبه وأرجو من الإدارة التثبيت للموضوع إن شاء الله لو صارت المشاركات قوية وجريئة من الأعضاء .
والسلام عليكم ورحمة الله وبركاته

[خلود]

اهلا بيك يايحيى وموضوعك الجميل واللى اتمنى يتملى مناقشات من كل الاعضاء

ولو فعلا خد حظه من المناقشات هيحصل ويتثبت ان شاء الله

انا بالنسبه لى هتكلم فى موضوع مهم جدا وهو امتحانات الثانويه العامه وتعب الاولاد فيها وفى انشغالهم بمتابعه اللى بيحصل فى التحرير دلوقتى وانه مؤثر بشكل فظيع عليهم لدرجه الاولاد والبنات مافيش اى تركيز خالص فى المذاكره

وده طبعا لانهم شباب ومصريين طبعا وبطبيعه الحال البيوت كلها متأثره باللى بيجرى فى مصر والتخبط اللى عايشينه فى اختيار رئيس لمصر

وحقيقى انا معرفش هى مشكله ولا شغلانه اختيار رئيس لمصر فيه قنوات شرعيه للاختيار يعنى انتخابات وصناديق انتخاب

انا بقى صعبان على بجد طلبه الثانويه العامه جدا لانهم اصلا بيبتدوا الدراسه قبل الناس كلها يعنى من قبل الدراسه بشهر بتبدى دروسهم وكل الناس تخلص وهما يخلصوا اخر ناس حتى بعد الجامعات ويجوا فى الاخر ويزهقوا اخر زهق ويزهقوا اهاليهم وياهم طبعا

مكنش ممكن يلاقوا حل لامتحاناتهم دى اللى عماله تتاجل بسبب الانتخابات يااما ياجلوا الانتخابات لبعد الامتحانات او يقدموا مواعيد الانتخابات شويه
ربنا معاهم يارب وينجح كل اولادنا يارب

[lionking]

فكرة الموضوع حلوة وجديدة

بس انا عن نفسي عايزة اتكلم عننا كمصريين


ممكن تسموا الحوار ( لـــيــــــــــــــــــــــه )

هسال اسئلة بتدور فى ذهنى ولو حد عنده اجابة ياريت يجاوبنى


هو احنا ليه كده ؟؟

ليه الجهل هو الاساس فى كل حاجة ؟؟ ليه الفهلوة فاهمين انها شطارة وصفة لازم تكون فينا ؟؟

ليه مش عندنا ادب الحوار وحسن الاستماع والاختلاف مع الاخر ؟؟

وبليز محدش يقول الثورة السبب

لانى بسمع الرد ده كتير

نراجع نفسنا كده وهنلاقى ان دى صفات موجوده ومتأصلة فينا بس إحنا بنطنش

ليه ذاكرة الشعب المصري زى ذاكرة السمكة بالضبط ؟؟

ليه نسينا اهانة المجلس العسكرى وفظاعاته وبقينا بنمدح فيه ؟؟ كل ده عشان يسلم السلطة ويخرج !!! ليه لسة فينا ناس بتحب الذل وبتعشقه كمان ؟؟

ليه ادينا المجلس شهاده نجاحه في تفريقنا الى شيع واحزاب ؟؟

[fagrmasr01]

وانا هسأل .. لحد امتى الخضوع للعسكرى اللى بيألف قوانين ومواد دستورية وبيحكم مصر بالحديد والنار .. ومتى يستقر فى قلوب الناس ان الأعمار بيد الله وان الخوف من وجه الله .. هو الأولى وهو الأحق حتى بالحياء منه سبحانه وتعالى .. لحد امتى هنخاف على عمرنا وعلى رزقنا .. ولحد امتى هنفضل نطلب نجاح من غير مجهود

[يحيى مطرواى]

بصراحة شديدة أنا كنت سأنتخب أحمد شفيق لأننى أرى هو الذى يصلح لإدارة مصر فى السنوات القادمة وبعد ذلك أعطى صوتى للإسلاميين. وقد كنت فى درس علم قبل الإنتخابات فى المسجد وخاض الشيخ فى موضوع الإنتخابات وحدث جدل بين الناس والشيخ حول المرشحين للرئاسة وأثناء هذا الجدل تذكرت أية من القرءان (أفمن كان مؤمنا كمن كان فاسقا) ورفعت يدى للشيخ لأتكلم وقلت له إن القرءان حسم قضية الإختيار وقلت له الأية الكريمة فضحك الشيخ وقال لى أحسنت وأنهى الدرس على هذه الأية والعجيب يوم السبت 16يونية2012عندما فتحت المصحف لقراءة الورد وجدت السورة التى سأقرئها هى سورة السجدة والتى يوجد بها هذه الأية الكريمة وقلت لنفسى الأن أذهب للجنة وأنتخب الدكتور محمد مرسى وقد فعلت.