ضحكة المساجين أقوى وأجمل كلمات الابنودى غناء على الحجار

**fagrmasr01** · 21-01-2012, 03:30 PM

ضحكة المساجين
أقوى وأجمل كلمات
تعبر عن احساس الوطن والثوار والمساجين

كلمات الرائع المتمكن المصرى الأصيل
عبد الرحمن الأبنودى
غناء على الحجار

**fagrmasr01** · 21-01-2012, 03:34 PM

تغازل العصافير قضبانها

زنزانة لأجلك كارهة سجانها
دوق زينا حلاوة الزنازين
على برشها بتمدد أطرافك
سجانك المحتار في أوصافك
مهما إجتهد ما هيعرف إنت مين
طوبى لكل المسجونين باطل
في زمن بيخدعنا وبيباطل
يا شموس بتبرق في غرف عتمين
أما إللي خان ناسك وأوطاني
م الهيبه حاطينه في قفص تاني
يصحى وينعس والجميع واقفين
ومصر عارفة وشايفة وبتصبر
لكنها في خطفة زمن تعبر
وتسترد الإسم والعناوين
يا دي الميزان إللي طلعت لفوق
بينزلوك بالعافية أو بالذوق
دول مش بتوع الصدق في الموازين
الثورة نور وإللي طفاها خبيث
يرقص ما بين شهدا وبين محابيس
والدم لسه مغرق الميادين
الحزن طابع في قلوبنا بجد
مافضلش غير الشوك في شجر الورد
غلط الربيع ودخل في أغبى كمين
وفي إنتظار تياس مع الأيام
غيرك في قفصه بيضربوله سلام
وأنت الجزم قبل الكفوف جاهزين
ومصر عارفة وشايفة وبتصبر
لكنها في خطفة زمن تعبر
ومصر عارفة وشايفة وبتصبر
لكنها في خطفة زمن تعبر
وتسترد الإسم والعناوين
ياعم أقعد بس وإشرب شاي
الدنيا ماشية وشعبنا نساي
والبركة في الشاشة وفي الجرانين
وإذا هوهو قوم إعلن الأحكام
وكل بق تلجمه بلجام
ومش هتغلب تطبخ القوانين
يا مصر هدي وإنت بتفوتي
الصوت في صمته أعلى من صوتي
أدي السجين إللي مبتش حزين
وإللي يقف في وش ثوارها
ما هيورث إلا ذلها وعارها
وإللي هيفضل ضحكة المساجين
ومصر عارفة وشايفة وبتصبر
لكنها في خطفة زمن تعبر
ومصر عارفة وشايفة وبتصبر
لكنها في خطفة زمن تعبر
لكنها في خطفة زمن تعبر

**اسامة22** · 07-02-2012, 02:05 AM

جميله اوى ياجمال وخلى بالك انا بحب اوى على الحجار

يااهلا بيك وبمواضيعك ياجمال ومتنساش الشاى بتاعنا او ياسمين

ههههههههههههههههه

**fagrmasr01** · 07-02-2012, 12:34 PM

يا ألف مرحب يا أسامة

يارب يخليك .. شكراعلى التشجيع

وأتمنى ان كل اختياراتى تعجبك باذن الله

انما الشاى بالياسمين

لا لا لا

أنا باشرب قهوة .. ونسكافيه

نورتنى يا أسامة .. رببنا يطمننا عليك بخير باذن الله دايما يارب