مش منقول
السلام عليكم ورحمة الله وبركاته
هدخل فى الموضوع علطول
الحياة اليوم-العاشرة مساء-90 دقيقة-واحد من الناس
وغيرهم وغيرهم وغيرهم
حوادث
قضايا فساد
غلاء
عمارات بتقع فوق دماغ اصحابها
ناس نايمة فى الشارع
ناس البيت اللى عايشين فيه هيقع فوقهم
زوج ام بيعذب ويغتصب ابنها امامها وهى بتقول هعمله ايه بس منه لله وكان بيلبسو قميص نوم وهى شيفاه
العيش وحش ومش موجود والسكر غالى والزيت مافيش فيه بركة واللحمة ب 50 جنيه والبتلو ب 80
والفراخ البيضة الكيلو ب 13 ونص والبلدى ب 16
وشوفت الجزارين زعلانين اوى فى حديث المدينة ويقول لمفيد فوزى من مصلحتى اللحمة ترخص
عشان اللى كان بيشترى كيلو بقى بيشترى نص
واللى كان بيشترى نص بقى بيشترى ربع
تمشى فى الشارع تلاقى ناس بتكلم نفسها وناس بتنقى من الزبالة(للاسف)
وناس راكبة hummer وناس مش لاقية تاكل وفلوسها ع الاد يا دوب ونازلة رغى فى الموبايل
والاحصائية قالت كده المصريين بيحبو يتكلمو فى الموبايل وبيحبو يتمنظرو
عشان كده محدش مصدق ان المصريين غلابة
تمشى فى مكان تلاقى الشرخ فى العمارة بطولها
وتمشى فى مكان تانى تلاقى فيلا لأ لأ قصر
تحب بس تتفرج عليه من برة
ليه بقى كل كلامى ده
اقول ليه
عشان احنا اقصد احنا كشعب
عمالين نشجب وزعلانين اوى من الحكومة ومش عايزين حسنى ولا جمال ولا البرادعى(طب اروح انا ياعم)
وعايزين فلسطين ترجع
طب ازاى ياعم
اهو ماليش دعوة لما امشى فى مظاهرة واكسرلى كام عربية يمكن ترجع (احتمال برضو)
عايزين اللحمة والفراخ والسكر والزيت والسمنة وكل الحاجات ترخص
واحنا بنكتب ان فى مقاطعة فى الجرايد
طب حد ينزل كده عند الجزار ان لقيتو مكان تقفو فيه ليكو الكلام(ال مقاطعة ال)
ده مافيش عيد عندنا مالوش علاقة بالاكل
نشوف الست الكبيرة وحالتها حالة فى برنامج واحد من الناس معاشها ستين جنييييييييييه
وبتقول الحمدلله نقعد نعيط ونقول لا حول ولا قوة الا بالله
طب عملنالها حاجة (مااحنا عيطنا نعمل ايه تانى)
بلاش اكمل
بلاش
طب معلش
مين اللى ولع القطر ومين اللى عمل الزلزال اللى اكل البشر
ومين اللى عمل انفلونزا الخنازير(معلش اصلى قريت انها معمولة تفصيل)
ومين اللى جاب المواد المسرطنة ومين اللى جاب المبيدات
والفرخة الاول ولا البيضة
عمالة اشوف كل ده
ومعرفش مين السبب
مابيقولو عمرنا ماهنعرف زى مااحنا مش عارفين كده طلعت مصطفى والسكرى قتلوها ولا لأ
هنكتب بس
ماشى نكتب
نحتج
حاضر
نعترض
ماشى جدا
بس فين طيب
بعد الكلام والكتابة ايه
حد يرد
فلسطين رجعت
لأ
اللحمة رخصت
ولا هترخص وحياة امى
يبقى لما اقول تسكتو
تسكتو بقى
وكفاية الدش والقنوات الفضائية
كفاية
الضرب فى الميت اصلا اصلا حرام
ولا هو يعنى اشوف كل حاجة لايف ع الهوا
وآجى هنا كمان الاقيها مكتوبة
شوية رحمة
وعلى فكرة اللى عنده حل
بس ايه
حل بجد مش كلام وخلاص
يقولهولى وانا اعمله
مش منقول على فكرة
عشان فى ناس بتقول اننا مش بنكتب غير حاجات منقولة
رد مع اقتباس
رد: مش منقول
المفضلات