أنــــــــــــا ليـــبــــرالــــى

[lionking]

بسم الله الرحمن الرحيم

النهاردة عايزة اتكلم معاكم فى موضوع صعب شوية او شويتين او زى ما تحبوا

بس اتمنى ان محدش ينفعل ولا يتنرفز

أنـــــــــــا ليبرالى

ليه الناس لما تسمع الكلمة دى بتبعد عن الشخص وتتهمة بالفجر والحاجات دى ؟؟

هل الناس فاهمة يعنى ايه ليبرالى ؟

هل يعرفوا مميزات الليبرالية ؟

ياريت تكون اجابة السؤالين دول هما بداية الحوار بينا

وهستنى اجابات منكم

عشان نقدر نتكلم

[fagrmasr01]

موضوع متميز طبعا يفتح الكثير من أبواب النقاش ... شكرا على طرح الموضوع يا ليون
الليبرالية هى كلمة مشتقة من كلمة الحرية الإنجليزية "liberty" وهى مذهب يرى حرية الأفراد والجماعات فى اعتناق ما يشاؤون من الأفكار والتعبير عنها بشكل مطلق

ويرى اليبراليون أن على الدوله تقديم الخدمات الاجتماعية فى مجال الصحة
والإسكان والمعاشات والتعليم، بجانب إدارة أو تنظيم الاقتصاد
كما ان الليبراليه تدعو لإعمال العقل لا النقل .. وكما يقول الإمام محمد عبده إذا تعارض العقل مع النقل أخذ بما دل عليه العقل
وهذا الرأى قد يختلف معى فيه كثيرين .. ولكن ان ناقشنا الأمر بهدوء سوف نرى ان صحيح الدين ان ناقشته فمن المستحيل ان يتعارض مع العقل والفطرة السليمة

وبشكل عام الليبراليه لها أكثر من تعريف فالبعض يعرفها بأنها نظريه سياسيه تزعم أن الحريه أساس التقدم ، فتعارض السلطه المطلقه سواء كانت دنيويه أو دينيه ،، وهناك من يعرفها بانها تفتح الذهن والتجديد وعدم التعصب والبعد عن الإذعان للثوابت.

ويتفق الإسلام مع الليبرالية فى حرية الأختيار .. فى قوله تعالى ( فمن شاء فليؤمن ومن شاء فليكفر ) صدق الله العظيم.
وفى قوله عز وجل ( لكم دينكم ولىَّ دين) صدق الله العظيم.
ويؤكد الإسلام على مبدأ الشورى والديمقراطية والحوار .. بينما الليبراليه تدعو أيضاً
للديمقراطيه
وطبعا هو مجرد استدلال من عندى او اجتهاد شخصى ( قابل للخطأ والصواب ) ولكن من الظلم ان نقارن الليبرالية او أى مذهب وضعى آخر بالإسلام حيث النظره الشموليه والكمال فى الدين وهو أولى بالإتباع ..

ولكن مع غياب التطبيق الحقيقى للإسلام تنشأ النظريات العديدة .. والبعض منها صحيح والبعض غير صحيح .. ولكنى أرى ( بصفتى الشخصية طبعا ) ان الليبرالية مش غلط

[lionking]

شكرا جمال على ردك وعلى توضيح معنى الليبرالية ورايك الشخصى فيها...

انا مستنية اشوف ردود اجمل اعضاء عشان نحاول نوصل للمعنى الصح....

بس انت برده مقولتش ليه الناس لما حد يقول انه ليبرالى بتهرب منه وتتهمه بالفجر

[محمود التهامي]

ولكن مع غياب التطبيق الحقيقى للإسلام تنشأ النظريات العديدة

صدقت والله يا عم جمال

معاك في كل اللي قولته
المشكلة يا ليون إن أي حاجه يحبو يكرهونا فيها يطلع علينا شيوخنا الفطاحل ويكفروها

دا حتى الأزهر بقا حزب وطني شوفتو بقا

والبرادعي يحارب الله ورسوله ههههههههههههههههههههههههههههه

واحنا شيوعيين
او بمعنى أدق زي ما بنتريء أنا واصحابي دايما شروعيين

يعني أي حاجه تدعو للمساواة أو الديموقراطية تبقا كفر بين وضلال مبين
زي الشيوعية ماهي كفر لانها بتساوي بين الناس
مع إن رسولنا قال
"الناس سواسية كأسنان المشط الواحد لا فضل لعربي على أعجمي إلا بالتقوى"


والليبرالية كفر لأننا لازم نطيع أولي الأمر وابن أولي الأمر كمان ههههههههه
مع إن برضه رسولنا عليه أفضل الصلاة السلام قال
(إذا كان أمراؤكم خياركم ، وأغنياؤكم سمحاؤكم ، وأمركم شورى بينكم ، فظهر الأرض خير لكم من بطنها، وإذا كان أمراؤكم شراركم ، وأغنياؤكم بخلاؤكم ، ولم يكن أمركم شورى بينكم، فبطن الأرض خير لكم من ظهرها)
وشوية شوية يقولولنا ان طاعة مبارك وأنجاله مذكورة في القرآن

[fagrmasr01]

بس انت برده مقولتش ليه الناس لما حد يقول انه ليبرالى بتهرب منه وتتهمه بالفجر

الناس بتبعد عنهم لأن الناس تظن ان الليبرالية هى دعوة الى الخروج عن الأديان ..
والتفكير دا بتعمقه الحكومة ووسائل الإعلام بهدف قمع المعارضين ومنع انتشار الفكرة