ازيكو يا معلمين

المصريين بيتعاملو مع بعضهم بفلسفة واضحة .. "ابن مين في مصر" .. مش سؤال غرضه التكبر .. لكن كأنه هيعرف كل مواصفاتك من السؤال د ..

و كل محافظة بقا ليها صفات و بقا ليها .. مثلا

القاهرة و الجيزة : مفيش حد اصوله من الجيزة , دي قناعة ثابته , و لو قولت لحد انك من القاهرة , هيقولك انت أصلك منين ؟؟ , و بكده هترجع 14 مليون نسمة لأصولهم في المحافظات علشان تعرف صفاتهم !!

الأسكندرية : "مية مالحة و وشوش كالحة"
الأسكندرية بلد جميلة جدا .. و من اكتر البلاد اللي الفنانين غنولها في بدايات مصطفى قمر و شباب علي الحجار و تترات محمد الحلو , و اشعار سيد درويش , بس برده بعد كل مش مغير فكرة المصريين عن الإسكندرانية

دمياط : "تتعشى ولا تنام خفيف .. تشرب شاي ولا مانتش كييف؟"
أو "صاحبي ع القهوة"
المواطن المصري اوي ما يعرف انك دمياطي بتلاقيه انتبه , او حتى اول ما بينزل دمياط .. عمره ما يفكر يعزم الدمياطي علشان عارف ان عزومته مش هتترد , دايما و هو بيكلمه بيحاول يكلمه ف أمور الفلوس و كده علشان يشوفه و هو بيحاول يداري هو بيقبض كام .. و لو سألته انت مرتبك كام مايردش عليك , مع ان انا اعرف 4 من الجيزة لو سألتهم مرتبك كام مش هيردو عليا !!

المنوفية : "المنوفي لا يلوفي ولو أكلته لحم الكتوفي"
طبعا المنوفية كلها .. اتأثرت بعقلية منوفي واحد بس حكم مصر 30 سنة .. ف طلع عليهم سمعة وحشة !!

الشرقية : "اللي عزمو التروماي"
جوه الشرقية هيعتبرو المثل دا دليل الكرم .. بس بره الشرقية بيعتبرو المثل دا دليل السذاجة !!

الغربية : "صاحب حاوي ولا تصاحب محلاوي"
المثل أمرك بأنك ماتصاحبش حد من المحلة .. بس ماقلش ايه السب !!
مع ان سبب المثل هو ان كان فيه واحد قاعد علي قهوة و لما اكتشف ان فيه سجع بين حاوي و محلاوي .. قام مطلع المثل ..
و علي فكرة الوضع كان هيختلف كتيير لو كان قاعد في جرجا مثلا
كان المثل بقا "صاحب حاوي ولا تصاحب جرجاوي"

البحيرة : "ميت نوري ولا دمنهوري"
واضع المثل برده مايعرفش اي حاجة عن دمنهور البلد الجميلة .. واضع المثل علي الأرجح كان تباع علي عربية نقل , و لما استقر في البحيرة لاقى سجع بين نوري و دمنهوري .. ولو كان في المنصورة برده كانت بقت "ميت نوري ولا منصوري"

سيناء و البحر الأحمر : "قيراط عداوة ولا فدان جار البداوة"
المثل دا بصراحة دمر نصف مصر جغرافيا .. بجد و الله .. يعني استثمر في الصحرا ازاي الوقتي و انا شايف ان قيراط العداوة احسن بكتيييييييييييييير اوي من قيراط عند البدو , هو ميزة المثل انه بيحافظ علي الزحمة في الدلتا و الوادي , علشان الدفا و كده

بني سويف , المنيا , اسيوط , سوهاج : "الصعايدة وصلو"
أو "مرة واحد صعيدي"
المفروض الصعايدة مايزعلوش من "مرة واحد صعيدي" .. الصعايدة اصلا بينهم و بين بعضهم بيتعاملو بتحيز .. يعني كل قبيلة او عيله بتبص للتانية علي اساس انهم صعايدة .. فما تزعلوش بقا لما مصر كلها تقول مرة واحد صعيدي

قنا : "يا قلل" !!
رغم ان القلل بقت عملة نادرة .. و مع ذلك لسة المصريين رابطين بين قنا و القلل القناوي , مش هيغير المثل دا الا لو القناويين صنعو المربى مثلا او السكر !!

أسوان : "بكار"
مش غريبة ان الواحد و هو صغير اول ما يروح اسوان كان بيدور بين الناس على رشيدة و بكار .. و لو حد شاف واحد من اسوان و قمحي خفيف .. مايصدقش انه من اسوان فعلا !!

الفيوم : "يا بطة"
منها لله فاتن حمامة بعد فيلمها مع عماد حمدي "موعد مع السعادة" .. لما كانت بتبصله و قالتله "كاك كاك كاك" .. يعني "بحبك بحبك بحبك" .. فالمصرين لسة فاكرينها علي بتوع الفيوم لحد الوقتي .. مع ان فاتن حمامة تقول لعماد حمدي "كاك" .. ارحم بكتيييييير من انها تقوله "بحبك" !

الدقهلية : "يا مخلط"
أو "ياولاد لويس"
علشان اهالي الدقهلية و المنصورة تحديدا شديدين البياض .. و المعظم بشعور مصفرة او شقراء او عيون ملونة .. فطلع عليهم انهم من احفاد لويس التاسع و متهجنين .. و الدليل المزعوم ان حتشبسوت مثلا عمرها ما كانت بشعر اصفر او عيون زرقا

مطروح : "يا مملح"
اللب الأبيض المطروحي أثر على باقي المصريين .. دا علشان احنا من اكتر الشعوب استهلاكا للب و انتاجا له .. و ليها معنى تاني .. انك لو مشيت مع واحد مطروحي هيعطشك !!

كفر الشيخ : "مايوهات بلطيم"
برغم ان 90% من المصريين ماراحوش العجمي او شرم الشيخ او حتى جمصة !! .. بس بيبصو لبلطيم علي اساس انها مصيف بدون مايوهات .. فيه الناس بتنزل بهدومها علي طوول للأستحمام و لغسيل الأطباق برده !!

السويس : "بلد الغريب"
مبقاش فيه سوايسة ف السويس ... دي قناعة عند المصريين الوقتي من بعد قصة الغريب لمحمد منير .. و كل السوايسة في مدينة نصر الوقتي من بعد التهجير .. علشان كده فيه ناس لو قولتلهم انك سويسي .. هيقولولك : طب احلف !!

الإسماعيلية : "ما تمصش دمي"
الناموس ف الاسماعيلية اشهر من المانجة .. و اكبر حجما منها في بعض الأحيان .. علشان كده صورة الأسماعيلاوي المستنزف لسة قي دماغنا لحد الوقتي حتى بعد انتهاء حروب الاستنزاف

بورسعيد : "ابو العربي"
اجمل تعليق سمعته عن برنامج الحلم بتاع عمرو دياب بعد الحلقة الأولى و التانية كان من شخص قال وقتها .. "انا اسس ان عمرو دياب هيطير زي سوبر مان في آخر البرنامج" .. و بعدين قال "آدي آخرة لما تجيب واحد بورسعيدي و تقوله اتكلم عن نفسك" !!

بقيت 3 محافظات مالهمش صفة مميزة .. هم حلوان و 6 اكتوبر و الأقصر .. علشان لسة جداد .. فنناشدهم ياريت يحاولو يلاقو حاجة مميزة بسرعة


و انت بقا .. ابن مين في مصر ؟؟
و هل فعلا احنا صفتنا من محافظتنا !!
ولا دا كلام و خلاص ؟؟
مش عايز حد يقول اني بتتريق انا مش غرضى التريقة خاااااالص و الله و المصريين كلهم حلوين و جدعان و خير شعوب الأرض رغم كل اللي بيتقال عنهم .. او اللي بيقولوه علي بعضهم !!


تحياتي ,
الفكرة مقتبسة من كتاب مادة 212






منقول