كلام والسلام(استحملونى)
السلام عليكم ورحمة الله وبركاته
هنا هتكلم وخلاص
هطلع اللى جوايا والسلام
مش منتظرة رد ولا تأييد لكلامى ولا هجوم بصراحة مش طالبة خناق
حاجات كتير جوايا ومش لاقية حد اكلمه ولا حتى عارفة اعبر ولااااااا اى حاجة خالص كله ملخبط ع الاخر
قلتلكو فى اليوميات انى بتفرج على مسلسل بيحكى قصة سيدنا يوسف
كان نفسى اضعه هنا فى المنتدى
كان نفسى الدنيا كلها تتفرج عليه
النهاردة شفت اخر حلقة خلاص يوسف رجع لابوه شافه وجرى عليه وحضنه
بعد ايه
بعد سنين عذاب وحرمان ومعاناه بطريقة فظيعة
معلش يمكن قرأناها كتير بس من غير مانشوف واللى يشوف بيحس اكتر كأنى كنت معاهم
لا
ياريتنى كنت معاهم
ياااااااااااااااه
واحد اخواته ضربوه ورموه فى البير واتسجن والست زليخة عذبته عشان مزاجها
واحنا بنتكلم فى كلام فاضى
ماهو اللى يشوف اللى انا شفته
يبقى مين اللى هيحكم مصر كلام فاضى
والحاجة غالية ولا رخيصة كلام فاضى
وابنى هيدخل علمى والا ادبى كلام فاضى
وهيدخل كلية ايه كلام فاضى
والسكر يالهوى بقى بخمسة وستة جنيه برضو كلام فاضى
اقولكو حتى لو مكنتش اتفرجت على قصة سيدنا يوسف
برضو بقى كله كلام فاضى
ليه لانه كلام ووجع دماغ على الفاضى
حد من اللى بيتكلمو عمل حاجة او غير حاجة
طب فى حاجة هتتغير
يبقى كلام فاضى
تعبت من التفكير فى الدروس والمدرسين
تعبت من التفكير مين بيذاكر ومين لأ
تعبت من التفكير فى امبارح والنهاردة وبكرة
تعبت من الناس وعمايلها
كل واحد عايز اللى فى ايد التانى مش مهم حرام ولا مهم احنا مسلمين ومينفعش نعمل كده فى بعض
لأ
المهم ان اللى عايز حاجة يمد ايده فى جيب اخوه وياخدها
كلام فاضى
بقالى كتير مش بشارك فى المنتدى
كنت بتفرج على احلى مسلسل واصعب قصة شفتها فى حياتى
قلبت حياتى كلها
هتقولولى حرام يجيبو حد يمثل دور نبى ويظهرو وجهه
طب ما احسن ما اشوف مهند بيبوس نور
ولا اشوف تيتو اللى لحد دلوقتى مش فاهمة لزمته ايه وايه الحكمة من وراه
ساعات كتير بفكر فى الحب واقول هو فين
كلنا نفسنا فى الحب وبس
بس بنعرف نحب
بنعرف نتحب
بفكر كتير فى الحب
قصدى كنت
عشان لقيت حب اعلى واجمل وابقى واعظم
شفت حياة نبى اتعذب واتحرم من اهله قرابة 40 سنة
شفته وهو بينضرب وبيترمى فى البير وهو بيتباع عبد لعزيز مصر
شفته وهو مسجون وهو بيتعذب وهو نفسه يشوف ابوه او يعرفه انه عايش ومش عارف
شفته لما كبر شفته لما بقى عزيز مصر
شفته لما مصر كلها بقت بتعبد ربنا بدل امون
دلوقتى بقى
عندى انا
مش مهم العيش حلو ولا وحش
ومش مهم السكر بكام
ولا اللحمة
مش عايزة اكل لحمة اصلا
مش عايزة اعرف مين هيحكم مصر
جمال ولا البرادعى ولا حسنى مبارك برضو مش مهم
انا بقول اللى جوايا لانى مش عارفة ومش لاقية حد اكلمه واللى مش عاجبه الكلام من فضلكو يحرمنى من رده
عايزة اعيش فى هدوء
نفسى اشوف كل الانبياء
نفسى اروح زمانهم واعيش معاهم واكون من اوائل اللى هيأمنو بيهم
نفسى اشوف سيدنا يوسف
وسيدنا ابراهيم
وسيدنا محمد
نفسى اشوفهم حتى لو فى منامى
حتى لو فى منامى
ادعولى
لسه فى كلام كتير جوايا
بس خلاص مش عارفة اكتب تانى
وزى ماقلت
ده كلام والسلام
سلام
رد مع اقتباس
رد: كلام والسلام(استحملونى)
المفضلات