تعالوا معايا رحلة لشرم الشيخ

[fagrmasr01]

كنت نفسى احجر معاكوا
لكن
يظهر الرحلة مشيت خلاص
ياللا ترجعوا بالف سلامة باذن الله
ليون المتألقة دائما ...
تحية كبيرة اوى لموضوعك .. ولكل تفانينك الجميلة

[الفارس]

ايه الجمال دا انا لسه فى الغواصه

ومنتظر نكمل الرحله

بصراحه واضح انها رحله جميله اووووووى ياليون

[lionking]

ايه يا جمال بس يلا مستنينك تيجى معانا الرحلة دى هنروح نعمل سنوركلينج مش عارفة اترجمها ازاى بس هيا كده ومش هتتفهم لو قلتها حاجة تانية

فاااارس انت لسة فى الغواصة يا ابنى

تعالى تعالى رايحين على السنوركلينج وهيعجبك مووووت

بص بئه

برده من عند نادى الرياضات المائية

بس المرة دى بتحجز سنوركلينج وتقريبا المبلغ للفرد 250 جنيها مصريا وانا مش فاكرة لان جوزى هو اللى بيدفع انا مليش دعوة انا بتفسح وبس

المهم يعنى زى ما احنا عارفين الاطفال تحت 6 سنوات

المرة دى هنركب

ده مخصص للرياضتين اللى هما الغطس والسنوركلينج بس بيطلع بحاجة واحدة منهم بس
يعنى كلنا لازم نكون حاجزين غطس او سنوركلينج

وطبعا شايفين الجزء الخلفى من اليخت اللى لونه ازرق ... المكان ده مخصص لنزولنا للبحر وصعودنا

وكالعادة بيحفظونا اسم اليخت وانا شخصيا كنت راكبة يخت اسمه سميرة

بنحفظ ليه بئه

عشان لما بنبدا السنوركلينج بيكون فى يخوت تانية حواليك والناس بتعوم وبتدخل على اماكن بعض .... فلما يحين وقت التحرك يقوم الجارد اللى معانا ينادى على اسم اليخت نقوم نتجه لليخت بتاعنا

المهم
الجولة دى بتاخد اليوم كله

وقبل ما نطلع اليخت بنروح ناجر الزعانف والنظارة


الرحلة دى بتكون لاكتر من جزيرة واشهرهم جزيرة تيران وراس محمد وطبعا المبلغ ده شامل الذهاب والعودة والغداء على اليخت السياحى


طبعا اول ما طلعنا اليخت كان برده مليان اجانب وكانوا كلهم المان الحمد لله
وكاناو بيبصولنا بخوف فظيع والرعب كان مموتهم لدرجة انهم سالوا الغطاس اللى معاهم هما المحجبات دول هينزلوا الميه والراجل مشكورا جه بلغنا ....
المهم اتحرك اليخت الساعة 9 صباحاً ومشينا مشوااااااااااااااار طويل وبقينا فى عرض البحر وطبعا الجو تحفة والشمس تجنن ولما قربنا من اول جزيرة وجزيرة هنا مش اللى بنشوفها فى الافلام الاجنبى اللى هيا رمل ونخل ..لالالا الجزيرة هنا يعنى تجمع كبير من الشعب المرجانية وبيكون موجود مجموعة كبيرة من الاسماك الملونة اللى مش هتشوفوها غير فى شرم

وقف اليخت ونزلوا الغطاسين وربطوا الحبل فى اماكن معينة والناس لبست الجاكيت والزعانف والنظارة وانطلقنا فى البحر
طبعا السنوركلينج هو عملية طفو على الميه يعنى بتفرد جسمك على الميه وبما انك لابس النظارة اللى فيها انبوبة للتنفس بتنزل وشك فى المية وتبدا تظبط النفس وتعيش بئه مع السمك والشعب المرجانية وصدقونى مفيهاش خوف خالص ولا حاجة اسمها هنغرق والكلام ده
ولما الناس بتزل البحر الغطاسين بيكونوا متواجدين حوالينا واللى مش عارف يتحرك بيساعدوه وبنفضل فى كل جزيرة حوالى نص ساعة او ساعة مش فاكرة بالظبط لانى مكنتش بحسب الوقت
على فكرة الاطفال سهل جدا نزولهم السنوركلينج مدام لابسين اللايف جاكيت والنظارة

ولا يخلص الوقت بينادوا علينا ونرجع لليخت تانى ونتحرك تانى
ونوصل لجزيرة تانية وهكذا لغاية وقت الغداء .. والوقت ده بيكون فى على الساعة 2 ولما بتكون المسافة بين الجزيرة الحالية والتالية بعيدة وهتاخد وقت

انا عمرى بصراحة ما تخيلت انى ممكن اشوف السمكة اللى اسمها نيمو عارفين كلنا الفيلم ده انا بئه شفت نيمو ده فى الحقيقة ومكنتش مصدقة ....

ودى صور للاسماك اللى ممكن تشوفوها هناك








وعلى فكرة ممكن تشتروا كاميرا للتصوير تحت الماء وهيا كانت بحوالى 70 جنيه بس هيا استعمال مرة واحدة بس



وبعد ما خلصنا رحلة السنوركلينج كنا الحمد لله اتصاحبنا على الاجانب وقعدنا واتكلمنا معاهم عن الاسلام ووريناهم ان احنا ودودين جداا ومش كل المسلمين اسمهم بن لادن

اجهزوا بئه عشان بالليل هنروح نقعد فى مكان تحفة اسمه
الميركاتو

[محمود التهامي]

ليون ليون

هو مش السنوركيلينج هو الغطس ؟؟؟
واللي بيجي منها Snorkeler يعني غطاس ؟؟؟
وللا ايه بالظبط عشان مش فاهم

[محمود التهامي]

وللا دا نوع يعني والديفينج Diving نوع تاني