دي مدونة كده عجبتنى بطريقة فظيييعة

ونقرآها بقــي


كنت أعمل الفشار وأمسك أوى في الغطا ليوارب
للحظة بحس إني بطلع غل الدنيا فيه
وهو بيحاول يخرج من تحت الغطا وأنا مش رحماه
وأتخيل كل الناس اللي بكرههم محبوسين تحت الغطا
حتى لما أحب أحسسهم بالحرية
كنت بشيل الغطا وأتفرج على الفشار وهو بينط من الحلة
ويقع تحت رجليا
كنت بدوس عليه ...
وافتكر وجيه عزيز وهو بيقول
(مش كل ما تفتح إيدك تبقي بتحضن بني آدمين )
أدوس ع الفشار أكتر
إزاى خلونى أتغاظ ع الفشار كدا !!





كنت اضلم الدنيا جامد وآخد طبق الفشار اللى خلصت نصه في المطبخ
وافتح الكمبيوتر وأتفرج على فيلم The holiday
وأضحك أوى على كاميرون دياز وهي بتحاول تعيط
وأموت من الضحك وهي بتقول
" أرجوك يا إلهي دعني فقط اذرف دمعة واحدة ! "
أصل عمرها ما دمَعت وهي كان نفسها فعلاً بجد
ومحتاجة تعيط
كنت بعيطلها
ما هو أصل الدمع عندي زي السواقي
بعيط زى الهبلة على كل حاجة
كان نفسي في يوم ابقي زيها
كان نفسي ابقي زي منير لما قال
انا عمر عيني ما دمعت الا على كل شىء غالي
يعنى أنا عندي كل حاجة غالية ؟ !!
إشمعني منير ؟




كنت أجمع العيال ولاد اخواتي وأحكيلهم حدوتة الأسد
اللى كانت دايماً بتبدأ
بكان في مرة أسد في الغابة وكان كل اصحابه بيخافوا منه ... عشان هو قوي
ما هو لازم كدا !!
لازم تعودهم يكونوا أسود
قصص سندريلا وسنو وايت والجميلة والوحش متاكلش معاهم
مش زمنها
طب والنبي حد يقولي
ممكن ولد دلوقتى يلف القاهرة بحالها يدور على صاحبة الجزمة ؟؟؟
حتي لو لقاها
بعد سنيتن هيديها فوق دماغها بنفس الجزمة
طب علي إيه بقي ؟؟
الأسد أرحم



كنت أموت م الضحك على شروق بنت أختى
لما تبقى عايزة تنام ومخلصتش الواجب
وتفضل تسرح في الشقة بحالها وهي بتعيط وبتتحايل على حد يعملها الواجب
ولما أقرر اعملهولها
تنام ع المخدة جنبي وتحط وشها في البطانية وتقولى
" إكتبي بخط وحش "