انا مش اسف ياريس
ارجع ياريس انا اسف حقك ياباشا عليه
ارجع ياسيدى الكل ياورد و فل ارجع ليه
و انا استاهل كل الا عملته و الا هاتعمله فيه
انا مش مستحمل فراقك ارجع و دوس بالجزمة عليه
مش قادرياريس اعيش من غيرك
يامعذبنى صبحك و مسهرنى ليلك
ياسقينى المر ارجع على دماغى هاشيلك
مانا مش قادر اعيش من غيرك
يامعيشنى فى زل العيش
يامكيفنى ببانجو و حشيش
يامهددنا بشرطة و جيش
ارجع عشان اقدر اعيش
مانا ياريس اتولدت لقيتك
و كنت ساكن زمان قرب بيتك
و فى احلامى و منامى ناجيتك
مش هاقدر انكر اننا حبيتك
اصلك ياريس انسان ودود
حنين قوى و منتش حقود
و منغنغنا على قد الموجود
هو انت ياعينى فى ايدك حاجة
و لا ياضنايه فيه ناس محتاجة
ده انت مقطع من لحمك لينا
دنتا مبتكلش ياعينى علشان تغنينا
دنتا بتشحت من كل العالم علينا
انت هاتعمل ايه و لا ايه
ولا هاتعمل ايه و لا ايه
مترو و انفاق و طرق و كبارى
جمبرى و سمك و كابورية و كاليماري
خرفان و عجول وفتة و كفته بالكارى
شعب ميتمرش فيه معلش ياريس
ارجع عشان نفرح شوية ونهييص
ياريس من بعد فراقك مضحكناش غير على القذافى
الراجل الاهبل العبيط ابو توك توك و شمسية الحافى
و بصراحة عرفنا قيمتك دنتا كنت
اهو حتى كنت بتعرف تقرا الفونت
الكلام الجاهز الا كان بيجيك من الهتيفة
وكنت بتشوف عليه التصقيف من الصقيفة
ياخونا ده كان حلم و لا انا كنت بجد بحلم
الريس مشى وخد معاه جمال و الست ياريس تسلم
اوعى تصدق ياريس انى عاوزك ترجع
اوعى تصدق ياريس ان العين عليك تدمع
اوعى تصدق ياريس ده السجون عليك شاهدة
اوعى تصدق ياريس ان ايامك تانى عايدة
ولا انى هانسى يوم مالبست الكلابشات فى ايدى
و ساعتها ياريس مكنش فى حاجة فى ايدى
بس ياريس حسيت بالظلم مانا كنت برىء
لكن كلابك كانت شغالة على الناس تشنيق
عارف ياريس كان يوم طويل جدا عليها و صعب
اليوم الوحيد الا كرهت فيه مصر رغم كل الحب
اليوم الوحيد الا حسيت فيه انى فى بلد بيحكمها كلب
مش هاقدر اوصف لك يامبارك ياريس وقتها احساسى
بس ان شاء الله هاتشوف قد ايه الناس كانت بتقاسى
و انى دعيتلك وقتها تشرب من نفس كاسى
لما يجى عليك اليوم وتخش نفس السجن و نفس السجان
و لما تحس رغم انك بنى ادم من واحد ملوش لازمة تتهان
الله اكبر سبحان الحى الذى لا يموت لم تفهم ايها الانسان
معلش سامحنى ياريس انا بجد بجد عليك مش اسف
معلش سامحنى ياريس الناس بتكرهك زى مانت عارف
و عشان كل ايامك ياريس السوده
و عشان كل كلابك الا لسه موجوده
اوعدك يوم ياريس ماتشرف
و بيك السجن ياريس يتشرف
و كل العالم عليك ياريس يتعرف
ساعتها مش هاكون واحد بيخرف
هاقولك من كل قلبى انا مش اسف ياريس
وفى الحقيقة انت ماكنتش تستاهل كلمة ريس
مستنيك ياريس بس يارب ماتموت و تغيس
قبل ماتشرف فى مكانك و نفرح و نهيص
و نقولك مع السلامة ياريس مع السلامة ياريس
وفى النهاية انا مش اسف ياريس
رد مع اقتباس
رد: انا مش اسف ياريس
المشاركة الأصلية كتبت بواسطة اسامة22
المفضلات