اوعى يوم تزعلى علشانى

أو تشـتاقى فى يوم لحنانى

اوعى فى مرة تشوف أسايا

أو يوم تحزنى على احزانى


وعيشى الفرحة جوه الفرحة

قيدى النور فستان مع طرحة

باللى رموشك عيونها سارحة

افرحى بأغانى وانسى زمانى

و اوعى تدورى على احزانى



واسهرى فوق جنب النجوم

مش راح تفتكريتى فى يوم

ارواح وقلوب حواليكى تحبك

وانا دقة قلبى تزيدنى هموم

لكن هفرح لو قلبك ينسانى

وهادعيلك تنسينى باحزانى


اوعى تحاولى تشوفى دموعى

وانا قلبى مخبيها فى ضلوعى

مش راح اكتب تانى حروفك

اسمك مش عنوان موضوعى

عمرى ما حكتب اسمك تانى

و اوعى تسألى عن احزانى


سيبنى اعانى .. وانا وحدانى

طول عمرى الاحزان واخدانى

عيشى الفرحة زهور وأغانى

عيشى كلامى عطور وأمانى

مع حب جديد فوق قبر حنانى

و اوعى تشوفى يوم احزانى


لكن .. لو سألتك الحيرة

عن قلبى و دقات الغيرة

قولى ان حروفى أسيرة

وأشعارى مكانتش مثيرة

واعملى عيد أفراح سجانى

مع زغروطة ف عيد أحزانى


وانا هدعى لربى يسامح قلبك

كنتى طبيبى ف يوم وانا جنبك

كنتى زمان أحلامى فى قربك

وكنتى منايا .. وكنت أنا طلبك

مسامح قلب فى مرة داوانى

ياللى ابتسامتك .. دوا أحزانى