جهز هدومه وشنطته
قلتله استنا دى ازمه وتعدى
قالى سنين القحط دامت
بقت تلاتين سنه ياوالدى
قلتله هنا نيلى وارضى وزرعى
وهنا اندفن جدى
ضحك وقالى نيل الذوات
اللى ميته هرت كبدى؟!
يابنى لما تتفرج وقت الاصيل
على شمسك والمركبه تعدى!
قال الاصيل يابه هو اللى
يحمينى انا وعيالى من بردى
قلتله هنا سكن خالك حسن
وجرجس وصبحى واخوك حمدى
قال يابه نسيت انهم ف المعتقل
وضيف عليهم عم شمندى
يابنى ترابها شم التاريخ
تحس انه عزوتى وسندى
يابه انا عايز اشم الطبيخ
واحط الهدمه على جلدى
بص يابنى على القلعه وشموخها
زيارتها ياه !!يوم سعدى
يابه انا مراتى قلعه هدومها
ومش لاقى استر انا عرضى
انا عايزك يابنى هنا حارس
تصونها وتكون لها جندى
قالى جندى بخيشه ومقشه!!
اكنس بيت النقيب رشدى
قلتله شوف خيرها اللى ماليها
ومساها وصبحها المندى
قال نفسى يابه اشوف خيرها
ومحسش انى بكستانى اوهندى
يابنى هنا نيلى وزرعى
هنا نخلى وهرمى وميتى وسدى
يابه ضحكتوا علينا بصخر وصنم
ومعابد وهرم وورق بردى!
رفعت ايدى للسما ادعى
واقول يارب ربنا يهدى
قالى مهما دعيت مش هتنصلح
ولو مسكوها حتى لغاندى
انا ماشى ومش راجع واعود
الابشرط لما ترجعولى بلدى