كانت بنت طيبه
ميدو وصاحبته الرخمه رنا ماشيين على الكورنيش .. الجو حار .. الشمس محرقة
رنا: عطشانة
ميدو : وأنا كمان
رنا: يعنى ... عايزة اشرب
ميدو: أكيد مادام عطشانة يبقى عايزة تشربي
رنا : المفروض – بما أن عندك إحساس يعنى – إني لما أقولك عطشانة تجيب ليا حاجة ساقعة
ميدو : ومين اللي هيحاسب ؟؟
رنا : أنت طبعاً
ميدو : منين ياحسرة .. ماانتى عارفة الكانز وغطاه
رنا : ماقلتش عايزة كانز .. كفاية إزازة صاروخ
ميدو : طب لو هاتجيبى اعزمينى معاكى .
رنا : يابنى أنت مابتحسش ، وبعدين بقالنا 3 ساعات ماشيين ، أنت مش ناوي تقعدنا ولا إيه؟
ميدو: عندك الكورنيش كله .. اختاري الرصيف اللي يعجبك
رنا : قصدي تعزمنى في مكان شاعري
ميدو: في الحر ده .. ماينفعش
رنا: بلاش دى .. نأخد مركب عالكورنيش
ميدو: المراكب بتغرق اليومين دول .. خلينا ع البر أحسن
رنا : بلاش المركب تعالى نأكل ترمس .. أظن ده رخيص
ميدو : إنتى تضمني منين إن الراجل غاسل إيده وغاسل الترمس
رنا : أعوذ بالله .. إنت مقفلها كده ليه ؟؟
ميدو : بصراحة معييش فلوس
رنا : يا سلام!! .. ماأنت كان معاك إمبارح
ميدو : إمبارح دخلت السينما مع بنت حلوة كده فالفلوس خلصت
رنا : بنت حلوه ؟؟!! وبتقولها في وشى
ميدو : أكذب عليكى يعنى
رنا : لأ .. تحرق دمى أحسن
ميدو: أنا مش شامم ريحه شياط يعني
رنا : يخرب بيت البرود
ميدو : برود إيه ؟؟ ماهو الجو مولع أهو
رنا : إنت اللي بارد
ميدو : بارد إزاى ؟؟ دا أنا بشُر عرق
رنا : بقولك إيه .. روحنى
ميدو: أروحك ؟! هو إنتى ماتعرفيش تروحي لوحدك
رنا : آآآآه .. طب أنا ماشية
ميدو : ليه يا حبيبتي؟؟
رنا : حبك برص
ميدو : والله البرص بيفهم عشان حبني
رنا : بجد كده كتير
ميدو : كتير إيه ؟؟
رنا : إرحمنى .. واضح إن الحر بيجى معاك بالعكس .. يا بارد
ميدو : يعنى مصممة تمشى ؟؟
رنا : أيوة وحالاً كمان
ميدو : طب استني لما نوصل آخر الشارع
رنا: اشمعنى ؟؟
ميدو: أصل أنا ساكن هناك .. و مايرضكيش أروح لوحدى
رنا : لااااااااااااااااااااااا
ميدو : ينفع كده ترمي نفسك في الميه مين هايوصلني بقى
رد مع اقتباس
المفضلات