.gif){kind=icon}
اللي فات اللي جاي .... مش فارقة
يسعدني قرائتكم وتعليقكم علي مقالي الاخير "اللي فات اللي جاي ... مش فارقة "
ونحن نودع عام 2010 بحلوه ومره وبكل انتكاساته ومحدش ينتظر إنى أقول وانتصاراته، على "المستوى الشخصي" بالنسبة لى أتعس أعوام حياتى منذ وجدتنى أمى فى الدنيا، حيث فارقتنى معشوقتى إلى جنتها وتركتنى أعانى آلام الفرقة وأبكى على الأطلال وأرثيها فى كل صباح ومساء، أما على "المستوى العام" فحدّث ولا حرج مصائب ونكسات لا حصر لها، ومن "الشوري" لـ"الشعب" يا قلبى لا تحزن ولا عزاء للبرلمان الموازي، وأهو الموازى أحسن من المنحنى، وكأن الشيء الوحيد المفرح هو فوز منتخبنا الهمام بكأس الأمم وما كدنا أن نفرح إلا واتغلبنا وتمرمط بكرامتنا الأرض فى النيجر، وبعد البحث والتحرى عن أسباب الهزيمة طلع "معزة" بس السؤال كان ذكر ولا "أنثى"؟.. يسألنى الكابتن "لطيف": تفرق؟! أقول له: طبعًا تفرق لو "ذكر" يبقى "جدي" ولو "أنثى" تبقى "عنزة".. ما علينا ننتقل بكم سريعا عبر الأثير إلى لقاء الأجيال والتعصب والتطرف، وبعد اللى عمله المختل لما اقتل إخوتنا فى عيد الميلاد وشجبنا ونكرنا طلعوا إخوتنا قبل المسلسل بتاع الساعة تمانية اللى اسمه "نزيهة الشفافة" وتجمهروا وهاتك يا ضرب طوب كل ده عشان نبنى كنيسة ويقولوا "وحدة وطنية" واجتماعات وحوارات وأفلام واللى فى القلب فى القلب يا كنيسة ما اللى عايز يبنى يبنى "زمان وانا صغير كنت مابحبش أذاكر غير عند صاحبى "رامي" وكانت والدته ربنا يديها الصحة عليها حتة ساندوتش كفتة، ولساه فاكر الواد أمير كان بيصوم معنا رمضان، دلوقتى بقى ممكن مسلم فى البطاقة فى نهار رمضان تقابله بيشرب سيجارة تقول: إيه يا عم يقول لك: أنا حر، يا الزمن اتغير أنا بقيت قديم أوى " كل دا بيجول فى مخيلتى أثناء توقف المباراة وأسأل سؤال مباغت للكابتن "جمال" هو حدف الطوب وتعوير الحكم يلغى الماتش؟ يقول لي: لو قطنة وشاش ممكن نستأنف بعد حكم أول درجة، وبعد شد وجذب يتم الافراج عن المشجعين المشاغبين بضمان العبد، وفى جولة سريعة على الملاعب الأوروبية يعنى من الآخر من إسكندرية لأسوان وجدنا أن أهم ما ميز 2010 هو الأنفلونزا بعد ما أقالوا طيور ودبحت فرختى طلع علينا النور قالوا بكل غرور "اقتل يا بطرس خنزيرك لحسن الإنفلونزا تجيلك" ومن الطيور للخنزير والضحايا ما تعدش، روحت ماسك الريموت ومغيّر القناة قولت أجيب حبيبى عمووورة لقيته راح ولا رجعشي، ندبت حالى ودريت دموعى فى جورنالى وقولت لقراءة مقال أبوالشناب الغالى "هيما" الشديد وهو "حمررررررا" لتفكرنى باللحمة ما اللحمة حمرا أتصدم ويصيبنى تشنج، غدروا بحبيبى وقالوا له ارحل.. من هنا بفلوسنا نصنع الخبر ويكش غيرك يعتبر، يعنى ولا "عمورة" ولا "هيما" طب مش لاعب وهنحرف وهشرب سيجارة بنى بس للأسف وما أنا نويت الانحراف والحشيش بقى فستك والأخضر ملأ السوق وأنا صاحب مزاج ومسقط بنطلونى وبوكسرى كاروه.. فكك يا عم، أنا هعتبر وهتفرج على القنوات الدينية توبة من المشى البطال، وتوّك ما نويت والنية لله قفلوا كل القنوات الدينية وكأنهم بيعندونى طيب يسبوا واحدة ويعنى كل قنوات الرقص والمسابقات والأغانى بتتبع التعليمات؟ على رأيك "هزها تجيب رزقها"، وإحنا شعب يهيص فى الهيصة ويزيط فى الزيطة نطلع للسما لما نكسب ماتش ولا يهمنا لما ما نلقيش عيش "مرفهين" ، ومن مظاهر الترفيه الملحوظة إن كل الشباب معها فلوس ايوه قاعدين على القهاوى وبيتكلموا فى الموبايلات يبقى فى فلوس واللى معاه قرش محيره يجيب كارت ويطيروا، العربيات بقت مالية البلد وكأن لا يوجد مصرى غيرى معندوش عربية عشان كده بوصل قبلهم كلهم.. لو قعدت احكى وقول كل اللى فى قلبى صفحات الوورد هتخلص والكى بورد هتبوظ ، وعلى إيه أتعب نفسى ما الكل عارف ودارى وهى 2010 أكيد هتبقى أحسن من 2011 ودى مش نظرة تشاؤمية لا سمح الله ولكن اللى شوفته فى "الشعب" و"الشورى" ما تتوقعوش أحسن منه فى "الرئاسة"، أنا مش عارف ليه وجع الدماغ ما عم الشيخ أفتى إن البلد تمام وأى واحد هينادى بالتغيير دمه حلال فاسد ومارق وخارج على النظام، وعلى رأى حمص وحلاوة وعم حسن كامى لحفظ الحقوق الفكرية "أنا وطنى وطنى وبطنطن" واللى مش "وطنى" يخبط..... ولا بلاش عشان محدش يتخانق معايا عشان أنا مسالم وماشى جوه الحيط، كان نفسى أخرج منها بس لو هدتها وطلعت الأسمنت غالى والحديد أغلى وربنا يخلينا "حمادة" ويتربى فى عزو ، والسلام ختام لكل حبيبنا فى الكفر والكفور اللى حوليه ومتنسوش تربوا العيال وتقولوا لهم إن أبوكم مات "جبان".. مردتش أكمل كل الحكاية عشان مبقاش بايخ ودمى اتقل مما هو تقيل ، والعاقبة عندكم فى المسرات ولا عزاء لتحت الـ80
رد مع اقتباس
رد: اللي فات اللي جاي .... مش فارقة
المفضلات