الحــلم ...
وان يوم قالولك إن انا ...
فى الحب ... خياله الكبير
ما تصدقيش ...
عمرى ما كان لى أى دور
كومبارس تايه فى الزحام
جوايا ميت ألف انهيار
كل اللى حيلتى فى الحياة ... حبة كلام
ودموع كتير
والحلم ... حتى الحلم جوايا بسيط
عمرى ما باحلم إنى أكون
بطل الرواية أو أكون الشهريار
أو حتى باحلم إنى اكون
واحد من الشطار على باب بنت الأمير
طول عمرى باحلم ...
أنى أملك فى السهول الواسعة بيت
باحلم ببيت من خيش وقش وفرشة صوف
وعيون حبيبة تضمنى ...
فى الليل ما احسش أى خوف
وهناك ...
بعيد عن أى ناس وزحام وصوت
باحلم أعيش وياها فى حضن السكوت
وبعدها ...
ودونما أى انزعاج أو خوف كتير
باحلم أموت
المفضلات