مدارس 6 اكتوبر

[loly_loly]

انا ابنى فى مدرسة بدر تايجرز
قضى فيها كجى وان و كى جى تو اهو خلاص امتحانته الاسبوع القادم
هما كويسين و بيهتموا بالطفل و ابنى بقى كويس فى الحساب و العربى
و الدين بيروح من المدرسة حافظ السورة و الحديث اللى واخدهم
بياخدو انجليش كمان و ماث بس يعنى عيبهاانها مش لغات و هما بيقولوا فى اهتمام بالغة بس مش شايفة ده اوى
و هياخدوا فرنساوى من سنة رابعة ابتدائى
انا بصراحة عايزة احوله مدرسة لغات كويسة
و قريت الموضوع هنا من اوله احترت جدا لأن باباه كان عايز يقدمله فى رويال ،و انا كنت سامعة عن مدرسة بفرلى هيلز تقريبا نفس مصارف رويال
مش عارفة بقى اعمل ايه و ميعاد التقديم لبرايمرى وان بدء
ممكن حد يفدنى لو عنده تجربه مع رويال او بفرلى هيلز
كمان مدارس نيو فيجن او الرؤية الجديدة
بصراحة محتارة اوووووووووووووووووى
ناس هنا شكرت فى القاهرة للغات بس انا شيفاها كشكل مش حلوة لكن قريت ناس شكرت فيها هنا و ناس على فيس بوك بتذم فيها
حيرتونى و الله

[Omelbanat]

السلام عليكم ورحمة الله وبركاته
أنا مشاركة جديدة فى المنتدى ومبسوطة جدا بوجود المنتدى علشان نقدر نتفاعل مع بعض ونفيد بعض.
اما بالنسبة لموضوع المدارس فى 6 اكتوبر فانا ليا خبرة شخصية مع مدرستين الاولى هيه مدرسة الرضوى الخاصة لغات فى الحى السابع لان بنتى قعدت فيها ثلاث سنوات وبعدين نقلتها لان المدرسين الكويسين اللى كانوا فى المدرسة مشيوا وسابوا المدرسة نتيجة لسوء معاملة الإدارة وصاحب المدرسة لهم.
بعد كده نقلتها لمدرسة القاهرة للغات على المحور المركزى جنب خير زمان وكانت المدرسة بادية بداية كويسة وفيها مدرسين ممتازين ومحترمين واستمرت كده حوالى اربع سنين وبعدين بدأت تتدهور تدهور سريع ورهيب وكل ده برده بسبب سوء معاملة الإدارة ومديرة المدرسة للمدرسين لان مديرة المدرسة عادة ما تتعامل مع المدرسين بالصوت العالى والسباب والشتائم والاولاد فى المدرسة اتعودوا يشوفوها بتهزأ المدرسين وكمان بعض المدرسين تركوا المدرسة بسبب المرتبات الضعيفة وعدم موافقة الادارة على زيادة رواتبهم وكل المدرسين اللى تركوا المدرسة راحوا مدارس تانية فى اكتوبر قدروا ياخدوا فيها رواتب افضل وكمان يتعاملوا معاملة افضل زى مدرسة رويال للغات او معهد الحصرى للغات او ام القرى او دريم انترناشيونال.
بالاضافة لكده فهى بتتعامل مع اولياء الامور بنفس الطريقة ويا ويله اللى يروح يشتكى من حاجة مش مظبوطة فى المدرسة ولازم نعرف ان المديرة احد الشركاء فى المدرسة وبقية الشركاء كانوا مفوضين واحد منهم علشان يباشر امور المدرسة معاها وده كان فى بداية نشأة المدرسة والراجل كان لطيف ومتعاون مع اولياء الامور فى اى حاجة بيشتكوا منها فى المدرسة لكن ده ما عجبش الست المديرة فتخلصت منه بخناقة ومشكلة وبعدين فوضوا واحد تانى من الشركاء علشان يساعدها ولما ما عرفتش تتخلص منه لغت وجوده تماما ومنعت اولياء الامور من مقابلته لدرجة ان لو حد من اولياء الامور راح علشان يقابله بتعرف فى نفس اللحظة وتخرج تسأله انت عايزة ليه وممكن تنكر وجوده او تمنعه من مقابلته والراجل نفسه مريح دماغه ومبقاش يروح المدرسة اصلا.
وعلشان كده انا هحاول انقل بنتى السنة دى بعد الامتحانات لان مستوى المدرسين تعبان جدا فى المدرسة لان معظمهم خريجين جداد اللى بقاله سنة او اتنين بالكتير ومش مدربين على شرح المناهج كويس
بالاضافة إلى انها خلت الزيادة على مصاريف السنة الجاية 600 جنيه مرة واحدة بدل من ال300 جنيه اللى كانت بتاخدهم زيادة كل سنة بدون تقديم اسباب لهذه الزيادة المفاجئة.
واللى اكتر من كده انها عايزة تمضى اولياء الامور على إقرار بعدم نقل اولادهم من المدرسة بعد 30/6/2010 واللى هينقل ابنه بعد التاريخ ده ملزم يدفع لها مصاريف السنة الدراسية كاملة وإلا مش هياخد ورق ابنه من المدرسة وبالتالى مايقدرش يقدمله فى مدرسة تانية وطبعا تصرفها ده حصل نتيجة علمها بان كتير من اولياء الامور راحوا المدارس التانية وسألوا فيها علشان يحولوا لاولادهم بعد الامتحانات.
فهل تتخيلوا ان لو حد حاصله اى ظروف خلال شهر 7 او 8 او 9 مثلا واضطر يسيب الكتوبر ويروح مكان تانى وبالتالى اضطر ينقل ولاده لمدرسة فى المكان الجديد فهو ملزم يدفعلهم مصاريف المدرسة مرتين مرة فى القاهرة للغات ومرة فى المدرسة الجديدة.
انا اسفة انى طولت عليكم لكن ماعرفتش اشرح الوضع باختصار اكتر من كده ومن تجربتى الشخصية لا انصح بالتعامل مع مدرسة القاهرة للغات. وعلى فكرة انا قرأت بعض من الحاجات اللى مكتوبة عن المدرسة على ال facebook وفيها حاجات صحيحة كتير.
واخيرا يشهد الله ان كلامى هذا ليس كذبا او افتراء او مبالغا فيه لاى سبب من الاسباب.

[loly_loly]

مرسى يا ام البنات على ردك و توضيحك لحقيقة مدرسة القاهرة للغات كده هتتحذف من القايمة
كمان حذفت نيو فيجن لأن مصاريفها 36 الف جنيه لبرايمرى وان
بس ياترى هتنقلى بنتك فين؟

[mamet ahmed]

ياجماعة أنا سمعت عن المدرسة الألمانية المتميزة من فضلكم لو حد يعرف حاجة عنها يقولى ( مستوها والمصروفات ) وكمان لو فى مدارس المستقبل التابعة لسوزان مبارك فى أكتوبر حد يقولى فين فى أكتوبر لأن بيقولوا حلوة جداً وبيهتموا بالأولاد ، وأيه المدارس التابعة لرئاسة الوزراء دى فين والواحد يسأل هنعا أزاى

[nogafoda]

انا اعرف ان المستقبل دي مدارس تجريبيه
ومش هي الافضل يعني الطلائع افضل منها بكتير ونتائجها كمان افضل
بس المشكله ان انتي مش من حقك تختاري انتي بتقدمي والتنسيق هو الي بيوزع
اما بالنسبه للالمانيه هي لسه جديده وملهاش نتائج سابقه
بس الي انا اعرفه انها منحه المانيه ولكي حق الاختيار تكون الالماني اللغه الاولي او الثانيه
ومصاريفها تقريبا1500 الي 2000 جنيه