المصرى الى على حق

[fagrmasr01]

وجهة نظرى الشخصية
ان الاعلان خسارة فى خسارة وبيضيعوا فلوس السكة الحديد فيما لا يفيد
كلنا شايفين بيعوننا ان السكة الحديد تطورت تطور بسرعة السلحفاة وهذا لا يخفى على احد برغم المليارات التى قالوا انهم انفقوها على تطويرها
وكنت اتمنى ان فلوس الاعلان يصرفوها على تحسين فعلى مش تحسين للتصوير ينتهى بمجرد اذاعة الاعلان
محطات السكة الحديد فى منتهى القذارة .. وهى شكوى عامة تنشرها الجرائد القومية قبل صحف المعارضة
شبابيك التذاكر مغلقة فى اغلب المحطات .. واتحدى ان يدعى مدعى ان محطات الارياف مفتوحة لبيع التذاكر
حالة قطارات الريف تصعب على الكافر ولسا مش صعبانة ع الوزير ولا على رئيس السكة الحديد

ومحطة مصر للسكك الحديدية الرئيسية رمسيس هى خير شاهد لمن يريد ان يعترض .. ولست وحدى المنتقد فهناك كتاب قوميين كثيرين اعترضوا ومنهم احد مصممى الحملة الاعلانية طلع فى قناة الجزيرة وقال انهم متفقين يذيعوا الاعلان بعد تصليح احوال السكة الحديد وانهم كدا ضحكوا عليع وخدعوه
والصحفى الذى رفع قضية على الحملة هو من جريدة الجمهورية ( قومية )

اما الاعلان ... فهو تزييف متواضع المستوى .. لا توجد لدينا هذه القطارات التى يقولون لنا دافعوا عنها

ويبقى الحل .. المقترح .. بفلوس الاعلان دعموا السكة الحديد وشرطة السكة الحديد .. وامنحوهم صلاحيات ومرتبات تجعلهم يمارسون دورهم الرقابى فى الوقاية والحماية .. وقتها الشعب كله هايشارك

رأي شخصى

[الباشا تلميذ]

من المفروض اننا شعب عنده مبادء وقيم
وغيور على بلده وعلى قيمه ومتمسك بالمبادء
بمعنى المفروض اننا بنحافظ على بلدنا وممتلكاتنا وحضارتنا
مش منتظرين ظهور اعلان علشان يعلمنا كيفية المحافظه على بلدنا
لكن مع الاسف والالم ان الناس اصبحت عندها لا مبالاه بشكل خطير
يعنى لوحد ماشى وشاف شوية بلطجيه مستفرضين بفريسه هيعمل نفسه مش واخد باله وهيقول يعم وانا مالى خلينى اروح لعيالى سليم
ولا مجموعة شباب بتطارد بنت كل اللى هيعمله هيقف يقول لاحول ولا قوة الا
بالله (ربنا ينجيها)
ما أكثر النماذج السيئه التى يراها الانسان منا فى يومه ولكن للاسف
اصبح البرود واللامبالاه هى السمه والصفه السائده اليومين دول إلا من رحم ربى
لا بد من العوده الى قيمنا ومبادئنا الضائعين والمتجاهلين
لابد من عوده النخوه عند كل شخص
لابد من العوده إلى الاسلام مره اخرى
حتى نجد الحب والالفه والاخلاص عادوا إلى حياتنا مره اخرى

شكرا على موضوعك الرائع فجر
وادعوا الله عز وجل ان يردنا إلى دينه مردا جميلا
آمييييييييييييين

[fagrmasr01]

جزاك الله خير الجزاء يا باشا
مرورك أضاف قيمة حقيقية للموضوع
البعد الدينى
وضرورة خروج الناس من حالاة اللامبالاة والخنوع التى يعيشونها بسبب بعدنا عن الدين وعن التمسك بالقيم والمبادئ
جزاك الله خير الجزاء
آمين

[اميرة حبى انا]

انا اسفة انى شفت الاعلان ايجابى
اصل انا عمرى ما روحت محطة سكة حديد
دى حقيقة على فكرة
يعنى عمرى ما ركبت قطر
يمكن اكون صدقت الاعلان
يمكن بحاول اصدق ان كل شئ تحت السيطرة
يمكن بحاول وعايزة اصدق ان فى حاجة حلوة وايام افضل جاية
لكن للأسف لما بشوف واقرأكلامكم
بفتكر كل السلبيات والقرف اللى احنا فيه
مش خنوع ولا خضوع زى ماقعدتو تكتبو وتتريئو على اللى كتبناه انا وغيرى
ان الشعب سلم امره لله
لا
ليه مش فكرتو اننا عايشين كل ده فى الواقع
عايشين الغلا والكدب والتزوير والمحسوبية والرشوة والفساد والغش
عايشاه فى الواقع
وكمان داخلة نت عشان الاقيه معمول مواضيع وبيتكب فيها كل اللى بنشوفه
كفاية عليا الواقع
مش هشوفه هنا كمان
مش خضوع ولا خنوع
بس فرصة اعيش من غير كل الحاجات دى الساعة اللى هقعدها على المنتدى
مش انزل اشترى حاجة الاقيها
مش اقرأ الجرائد الاقيها
مش وانا ماشية فى الشارع واسمع الناس واشوف احوالها والاقيها
وكمان على المنتدى الاقيه
للاسف فهمتوا الايجابية اللى بتكلم عليها غلط
فهمتوه خضوع وخنوع وبلاقى ردود بسخرية على رأيى وبسكت
لانى مش هغيره
مش هغيره عشان كفاية البيت
والشارع
والناس
والجرنال
والتليفزيون
والدش
والاكل البايظ المسرطن والفراخ العيانة والخنازير
ومترو الانفاق والاتوبيسات والتاكسيات والميكروباصات
والمدارس والمدرسين
والعيش
والعيشة
واللى عايشينها
انا داخلة المنتدى افيد ولو بحرف واتعلم واستفيد ولو حرف
مش داخلة افتكر كل ده ولا يجيلى اكتئاب كل ما اقرأ السلبيات دى كلها
معلش طولت عليكم
ولم احدد بكلامى اى شخص معين
وسوف امتنع تماما عن دخول اى موضوع سياسى او به ذكر لسلبيات بلدى ينكد عليا
(ده رأيى وانا حرة فيه)

[fagrmasr01]

أميرة
فعلا رأيك وله كل احترام وتقدير
وبكل صدق رأيك هو وجهة نظر لها قيمة حقيقية ولا اختلف معكى فيها
اشكرك على مداخلاتك التى تزيد من قيمة اى موضوع تدخليه يا أميرة
احترم وجهة نظرك وأحييكى ( بقناعة حقيقية )
تحية تقدير واعتزاز بيكى وبرأيك ..
وتحيتى اليكى ليست الأولى وباذن الله لن تكون الاخيرة