عايز تبقى رئيس جمهورية

[اميرة حبى انا]

والله لو أتانى الله حكم مصر فسوف أنفذ ما قلتيه يا أميرة بالحرف
كتبتى بكلماتك ضمير مصر .. كتبتى امنية كل شهيد .. وأتعهد أن يكون الإعدام علنى لكل من قتل اولادى

شكرا على تأييدك لكلامى
ولو انى كنت احب اشوف كلامك لو بقيت رئيس

[اميرة حبى انا]

موضوع هايل و رائع يااميرة
بجد عجبنى الموضوع و اغلب مقترحاتك
شكراااااااااا
بس فيه شوية اعتراضات معلش بقى ثورة
ديمقراطية و ميدان التحرير موجود
اولا ليه حل مجلس الشعب ده مجلس منتخب من الشعب
ده معناه اللف على ارادة الشعب
لو حضرتك واخد بالك هتلاقى اكتر الشعب عرف انه غلط لما انتخبهم
ومعلش دى وجهات نظر
ثانيا : تأميم كل رجال الاعمال اى من تصل ثروته مابعد المليون

ده مش منطقى و حرام لان فيه ناس محترمة و تملك الاموال
بطرق مشروعة و لديها مشروعات رائعة
بل العكس يجب ان ندعم الشرفاء منهم و بقوة
ماشى بس ده مش وقت مشروعات
ده وقت الناس اللى مش لاقية شوية ميه تشربهم
ولا رغيف عيش حاف تاكله
ابقى اتفرج على برنامج واحد من الناس وانت تشوف عجايب فى مصر
العدل ثم العدل ثم العدل

كل الباقى انا معاكى فيه و ادعم حملتك
تحيا مصر الى الابد

لا انا منتظرة اعرف لو انت بقيت رئيس مصر هتعمل ايه

[اميرة حبى انا]

موضوعك جميل اوى يااميره ومقترحاتك اجمل وربنا يبعت لنا اللى يحققها فعلا
بس انا مش عايزه اكون رئيس لمصر

دى مسئوليه جامده جدا وحمل كبير اوى

انا بقول تخيلىىىىىىىىىى
تهيؤات يعنى

[الحمد للالوميتال]

السلام عليكم اولا
ثانيا اختلف مع حضرتك بخصوص مجلس الشعب للاسف غير الاسلاميين 90%منهم منافقين وافاقين كانوا بيمسحوا جوخ ويدللوا للسابقين وصور كتيير وفديوهات اكتر بتبين هدا والنهاردة بيتكلموا على الثورة دول اللى هما المتحولون ندى المجلس فرصة وانشاء الله حيعملوا وعندى ثقة فى دلك بصفتى رئيس للجمهورية
القرار الاول والاهم حنقفل جميع منافد البلاد اللى يجى اهلا وسهلا لكن مافيش حد يخرج من البلد قبل ما نرتب بيتنا وبعدين نفتح كل المنافد على البحرى

[اسامة22]

موضوع حلو اوى وانا شخصيا هعمل لكم شويه قرارات وهوريكم لو بقيت رئيس جمهوريه هعمل ايه

اولاً هطالب برجوع كل العلماء المصريين اللي عايشين في الخارج علشان يرجعو يطورو مشروعاتهم هنا وطبعا هأمر بعمل معامل على اعلى مستوى علشان نحقق النتايج المرجوة ومساعدة كل عالم صغير او مخترع لتطوير اختراعه والاستفادة من هذا الاختراع لخدمة البلاد ويبقى خيرهم لبلدهم مش لحد تانى.

ثانيا هعيد بناء وتجهيز معامل ومدرجات جميع الكليات والجامعات علشان تليق بمستوى ادامية الدارس المصري وهنديها شويه لاب توبات واجهزه حديثه تساعدهم فى تجاربهم .

ثالثا هعيد تشكيل الحكومة بنظام الانتخاب العادل لكل من رئيس الوزراء واطالبه بتشكيل وزارة عادل لا تخضع للمحسوبية والا الوساطه انما للكفائة والامانة وعلى شرط ان كل وزير يقدم بيان حقيقي لممتلكاته للتأكد انه في خلال فترة خدمتة محققش مكاسب غير شرعية من منصبه وطبعا مع التأكد من ان هذا البيان فعلا حقيقي مش مضروب ومش بنضرب على قفانا .

رابعا هدي احقية الرأي الحر للصحافة والكلمة الصادقة بدون اي حجر على رئي احد مدام انه لا يمس الدين او كرامة المواطن المصري

خامسا هخصص مساحات واسعة من الاراضي الصحراوية لزراعة القمح والرز والقطن والفول لتحقيق الإكتفاء الذاتي بدون الحاجة للإستيراد من الخارج مع امكانية نظر تصدير منتاجاتنا للخارج

سادسا هأمر بجدولة ديون مصر وهأمر كل رجال الاعمال الكباراللي عليهم مخالفات وضرائب بإنهم يدفعو الغرامات اللي عليهم لهذه المخالفات في حساب بنكي معين لسد ديون مصر المتلتلة مع الامر بمحاكمة كل من يخالف القوانين بتعويض مادي وكمان حبس

سابعا هنزل قرار بتخفيض تكاليف الحج والعمرة وهنعمل حملات حج وعمرة تابعة للحكومة بأسعار في متناول الجميع خلى الغلابه تكمل فرائض دينهم .

ثامنا هشوف دخل مصر من السياحة ومن قناة السويس ومن الضرائب اللي هتكون عادلة جدا جدا وهعين وزارة جديدة اسميها ادارة التطوير الداخلي اللي هتكون مهمتها بالتعاون مع وزير الاقتصاد لبحث وعمل خطة لتطوير مرافق البلد من مواصلات ومساكن ومرافق مياة ونظافة بجد وتجميل حدائق وميادين وشوارع الجمهورية وايضا ادخال الكهرباء لجميع النجوع والكفور التي لم تدخلها الكهرباء لحد الان.

تاسعا هقوم بتعديل الدستور بأن اقرر مدة واحدة مقدراها خمس سنوات لكل رئيس جمهورية مع امكانية زيادة هذه المدة لخمس سنوات اخرى بناء على الانتخاب الحر .

عاشرا هقرر شراء 10 سفن لنقل الركاب من و الى جميع موانئ مصر على ان تتوفر في كل سفينة كل عناصر وعوامل الامان .

البند الحادي عشر هقرر اعدام جميع القطارات القديمة اللي بقالها في الخدمة سنين واقرر بناء سكك حديد جديدة وشراء قطارات جديد من والى جميع محافظات الجمهورية بحيث ان القطار يتوفر فيه جميع وسائل الراحة والامان ايضا.

البند الثاني عشر هعمل خطة لكي يتم تمديد محطات مترو الانفاق الى جميع مناطق القاهرة وايضا عمل مترو انفاق جديد على غرار مترو انفاق القاهرة في كل من محافظات اسكندرية وسوهاج وقنا

البند الثالث عشر هقرر نقل جميع الوزارات الي مكان مخصص منفرد لها في مدينة 6 اكتوبر للقضاء على الزحام في مناطق وسط البلد والقاهرة الكبرى بحيث تكون جميع الوزارات والمرافق التابعة لها كلها في مكان واحد تيسيرا على المواطنين وتكون مباني شكلها جميل وهأمر الموظفين بتسهيل اجراءات جميع المواطنين بكل سرعة وهمة ونشاط دون المساس بكرامه اي مواطن وتكون جميع الوزارات والمرافق مربوطة كلها بشبكة كمبيوتر واحدة بحيث لا يحمل المواطن اي اوراق بل تصدر جميع الاوراق من مكان واحد ايضا تيسيرا على المواطنين يعني اللي يعمل بطاقة في السجل المدني يستلمها في نفس اليوم وكمان اتوماتيك تظهر كل بيانات المواطن وصحيفة حالته الجنائية عند نفس الموظف بدال الفه وكعب داير اللى بيشوفه .

البند الرابع عشر زيادة اجور جميع العاملين في القطاع الحكومي بحيث يكون الحد الادنى للمرتبات في القطاع الحكومي 2000 جنيه مصري شهريا وياريته يكفى .

البند الخامس عشر دعم جميع السلع الاستهلاكية من زيت وسكر وشاي ورز ودقيق وتخفيض الاسعار على كل السلع المعمرة والغير معمرة لمواجهه الغلاء

البند السادس عشر تخفيض تعريفة البنزين لتعود كما كانت قبل الغلاء

البند السابع عشر وضع اشارات ضوئية مرورية في الطرقات العامة وعمل غرامات مادية فورية لكل من يقوم بمخالفة قوانين المرور.

البند الثامن عشر احلال السجون وعمل عنابر خاصة للمساجين بحيث يتم معاملتهم بأدمية وعمل ورش عمل مخصص داخل السجن لتعليمهم حرفة وبيع منتجاتهم للغير بحيث ان الثمن يكون نصفه من حق المسجون ونصفه من حق الدولة وعمل مكتبة داخل كل سجن لمن اراد الاطلاع وايضا صالة رياضيه مع امكانية اشراك المسجونين المتفوقين رياضيا في مسابقات بطولات الجمهورية وايضا تأهيل المساجين من الناحية الدينية والتعليمية لمن اراد ان يكمل دراسته.

البند التاسع عشر اقامة حدود الله على كل من يخالف القانون بحيث ان السارق تقطع يده والزاني يجلد وهكذا ليكون كل من تسول له نفسه بالقتل او السرقة عبره لغيره من الناس.

البند العشرين الغاء قانون الطوارئ الذي من الممكن ان يجحف او يهين المواطن في الطريق او في البيت او في اي مكان اخر

البند الواحد والعشرين تأمين وظائف ومشروعات صغيرة للشباب وتسهيل الاجراءات لهم ليزاولوا عملهم بدون اي تعقيدات

البند الثاني والعشرين تطوير المناهج الدراسية لجميع المراحل التعليمية وتطوير المدارس مع امكانية عمل تبادل طلابي ومعسكرات في بلاد اخرى شقيقة لطلاب الجامعات

ها هتنتخبوني ؟ انا هختار رمز الطشط


هههههههههههههههههههههههه