يوميات اميرة

[فريد]

انا لله و انا اليه راجعون
الفراق صعب جدا
لكن هيه ددى الدنيا
مهما حاولت التجمل
هذه نهايتنا جميعا
اللهم ارحم اموات المسلمين
و ارحمنا يارب
البقاء لله

[اميرة حبى انا]

الفراق صعب
صح
الفراق صعب
هحكى اللى حصل
او الليلة العجيبة اللى قضيناها انا واهلى
واللى ................اوصف اقول ايه
اسمحولى الاول بس اعرفكم
انى من الناس اللى الموت اكبر من مستوى عقلها واستيعابها بكتير اوى
وصلت البيت عند ماما
كنت متخيلة هلاقى بابا نايم ع السرير عادى يعنى
لكن شوفته متغطى بملاية
مكنش فى بالى خالص او نسيت ان اللى بيتوفى بيغطوه لحد وجهه
ماما قالتلى ادخلى بوسى راسه وقالتلى كأنه نايم زى الاطفال
انا دخلت الاوضة
كنت عايزة اقوله ازيك يا بابا ويقولى ازيك يا حبيبتى زى ماكان بيقول
بس منفعش
مش هخبى عليكو خفت شوية اشيل الملاية من على وجهه لانى مش عارفة الشكل تحتها ايه
بس شلتها لقيته نايم عادى خالص
بابا نايم ع السرير وكلنا قاعدين حواليه ومحدش خايف
كان نفسى يفضل نايم ادامنا كده حتى لو تعبان
كنا هنشيله العمر كله والله
الصبح عملو اللى بيعملوه
بس انا دخلتله الاول قلتله النهاردة اول يوم رمضان
كل سنة وانت طيب
وقلتله كمان الله يرحمك يا بابا وقلتله لما يسألوك جاوب صح يا بابا
بابا خارج من اوضته ملفوف فى كفن
وياه على المنظر ده ياااااااااااااااااه على الوجع يا ناس
الناس شيلاه ونزلوا حطوه فى صندوق وغطوه
و شفته بعينى وهما بينزلوه تحت الارض وبعدين حجارة وبعدين تراب
وده اصعب المشاهد فى الدنيا على الاطلاق
لا حول ولا قوة الا بالله العلى العظيم
انا اللى عمرى ما استوعبت فكرة الموت وربنا يسامحنى
اشوف ابويا ميت من بالليل للصبح واشوفه بيدفن تحت الارض
واقسم بالله انى لسه لحد دلوقتى مش عارفة استوعب مع انى شوفت بعينى
معلش
دى مجرد فضفة
ومحدش يقولى الموت علينا حق وهو الحقيقة الوحيدة فى حياتنا
لانى ببساطة
عارفة
الله يرحمك يابابا ويرحم اموات المسلمسن جميعا
نفسى مشوفش حد مات تانى
اموت انا الاول
اموت انا الاول

[خلود]

لا حول ولا قوه الا بالله

ربنا يديكى الصحه وطول العمر يااميره وتشوفى ولادك زى ما بتتمنى وتطمنى عليهم

لحظات صعبه جدا اللى حكيتيها دى واكيد مكنتيش تتخيلى تمرى بيها ولا حد يحب يمر بيها

احنا بنوصل بعض والدنيا عامله زى اتوبيس راكبينه كلنا واللى بتيجى محطته بينزل

اصعب حاجه هو الفراق والبعد عن ناس متتخيليش تبعدى عنهم ابدا

ربنا يخلى ماما يااميره واخواتك واولادك ويصبركم

[دعاء الكروان]

لا حول ولا قوة الا بالله
مواقف صعبة
لكن هو ده اللى بيحصل
البقاء لله
وربنا يدخله فسيح جناته
آمين

[فريد]

فعلا الموقف صعب و خصوصا من يحدث له لاول مرة
ربنا يصبركم و يسكنه فسيح جناته
و يرحمنا برحمته الواسعة