حوارات زوجية

[خلود]

مناكشات زوجية .. وصول الزرافة

كان الزوج وزوجته وبينهما ابنهما يشاهدون في التليفزيون إحدي القنوات المتخصصة في عالم الحيوان ,, وكان الحوار
الإبن : بابا إنت مش وعدتني نروح جنينة الحيوانات ؟
الزوجة : أيوة يا حبيبي فكر بابا أصل بابا بينسي كتير اليومين دول , وأخر حاجة نسيها كانت ماما , بذمتك يا راجل بقالك أد ايه مخرجناش سوا.
الزوج : أولا يا حبيبي أنا وعدتك إننا نروح جنينة الحيوانات , بس يا حبيبي جنينة الحيوانات مفيهاش الزرافة دلوقتي , والزرافة يا حبيبي أجمل حيوان ممكن تشوفه ويعجبك اوي ,وانا مستني بمجرد لما ادارة الجنينة تستورد زرافة حنروح علي طول .
الزوجة : علي فكرة يا حبيبي نسيت أقولك أني قرأت أمبارح أن إدارة الجنينة أحضرت زرافات .. مش زرافة واحدة , متهيألي دلوقتي خلاص ملكش حجة .
الزوج : ليه يا حبيبتي شايفاني اني بحاول دايما أهرب من متطلباتكم , ده انا لو أطول أجيب لكم كل اللي تحتاجوه قبل ما تطلبوه . ده انتم اللي منورين دنيتي , بس كل ما هنالك ان مينفعش بردوا نروح الجنينة دلوقتي .
الزوجة : ليه إن شاء الله ؟؟ الزرافة اللي كنت متكل عليها عملتها فيك واحرجتك ووصلت مصر .. ناقص ايه ان شاء الله ؟
الزوج : دايما ظلماني ومخلية صورتي وحشة ادام الولد , دلوقتي انتي لما تكوني جاية من سفر بعيد , ينفع الاهل والاقارب يخبطوا عليكي ويقلوا راحتك ولا يسيبوكي تاخديلك كام يوم الاول تستريحي في بيتك الاول ؟
الزوجة : وأيه علاقة السؤال ده بموضوعنا دلوقتي ؟
الزوج : جاوبيني الاول ؟
الزوجة : طبعا يفضل ان الاهل والاقارب والاصدقاء يستنوا لحد لما استريح من تعب السفر , وبعدين اروح ازورهم او ييجوا يزوروني .
الزوج : الله عليكي يا حبيبتي .. تمام اهو إنتي زي الزرافة بالظبط.
الزوجة : نعم .. وليه الغلط .. أنا زي الزرافة .. ليه كنت أطول منك ولا مش طايل رقبتي ان شاء الله .
الزوج : يا حبيبتي دايما ظلماني وفهماني غلط .. اه والله .. أنا قصدي ان الزرافة لسة جاية من سفر طويل , وأكيد تعبانة وعاوزة تستريح في مكانها الجديد , ومينفعش زوار الجنينة يروحوا ويتهافتوا عليها بالشكل ده لازم يسيبوها كام اسبوع تستريح وتاخد علي المكان الجديد.
الزوجة : والله انا مش عارفة اعمل معاك ايه علي طول غالبني , المهم يعني حتفسح الولد إمتي ؟
الزوج : أكيد قريب , بس انتي اصبري يا زرافتي يا حلوة إنتي .
الزوجة : زرافتك .. طيب اشوف وشك بخير يا حبيبي انا حروح ازور ماما لانها وحشاني وبقالي سنة مشفتهاش .
الزوج : سنة ايه يا هانم .. إنتي مش كنتي عندها الاسبوع اللي فات ؟
الزوجة : أنت بتنسي ولا ايه يا روحي , أنت مش لسة قايلي يا زرافتي .. نسيت ان الزرافة لسة جاية من السفر

[خلود]

ايس كريم ( حوار بين زوج وزوجته )

بعد الزواج بعشر سنوات , المشهد حديقة صغيرة , والزوج وزوجته يجلسان علي كنبة خشبية , ويأكلان الايس كريم , وكان الحوار كما يلي :
الزوجة : فاكر اخر مرة اكلنا فيها ايس كريم هنا
الزوج : ايوه فاكر , كان من حوالي عشر سنوات , كنا لسه متجوزين من ايام
الزوجه: ايوه يا حبيبي , بس كان الايس كريم وقتها , احلي واطعم من كده بكتير
الزوج : طبعا , لان كل شيئ صار من سيئ الي اسوأ بعد ما عرفتك يا حبيبتي
الزوجة: انا , بعد ما عرفتني انا , انت ناسي ان بعد الجواز باسبوع , جاتلك علاوه في الشغل , يعني وشي كان حلو عليك .
الزوج : وانتي ناسيه يوم ما نقلوني , اسيوط بحجة ان مفيش حد بكفائتي هناك , وصرفنا ضعف العلاوه اللي
جت .
الزوجة: انا ياما قلتلك , اسافر معاك انت اللي موافقتش , شوف بقي ليه , يمكن كنت شايفلك شوفة ولا حاجه
هناك .
الزوج : اه , تسافري معايا , اصلها كانت ناقصاكي , ثم ايه شايفلي شوفه دي , شايفلي شوفة في الصحرا يا ست
انتي , ناسية المشروع كان فين , دي حتي الاقامة , كنا بنام وعنينا في وسط راسنا لتطلع علينا حاجة
واحنا نايمين .
الزوجة: انت اتغيرت كتير اوي , مكنتش كده اول ما اتجوزنا .
الزوج : وانتي كمان اتغيرتي اكتر , مكنتيش بالحجم ده لما اتجوزنا .
الزوجه: قصدك ايه يعني
الزوج : لا ولا حاجة , قصدي اني لو رجعتك لابوكي دلوقتي حيدفعلي فروق ميزان .
الزوجة: والله , انا ياما قلتلك اعمل رجيم , وانت اللي موافقتش
الزوج : طبعا كنتي فكراني عبيط , تطلعي عيني في مصاريف البيت والاكل , وكمان تاخدي فلوس علشان
تنزلي وزنك , ده يبقي اسمه ازدواج ضريبي يا هانم
الزوجة: كتر خيرك , انا ياما اتحايلت عليك علشان اشتغل بشهادتي وانت كنت بترفض , اهو علي الاقل مكنتش
سمعت منك الكلمتين الاخرانيين دول
الزوج : اوعي تكوني فاكرة ان الست اللي بتشتغل بتساعد جوزها لا سمح الله , بالعكس يا ماما , دي بتاخد منه
اكتر من الاول , لانها بتضيع مرتبها علي اللبس واللاذي منه , ناهيكي عن شغل البيت والعيال بتهملهم
اكتر .
الزوجة: اه فكرتني , ابنك عاوز ياخد درس في العربي .
الزوج : مش بقولك , انا كنت مستريح من وجع الدماغ ده في اسيوط , كنت ببعتلك المصروف وانتي تتصرفي .
الزوجة: يعني اهو اعترفت اني كنت شايلالك البيت وانت مسافر .
الزوج : اه طبعا يا حياتي , هو انا اقدر استغني عنك انتي عمري كله , ومن غيرك مقدرش اعيش
الزوجة: طيب لما انت عارف كده , ايه لازمته الدبش اللي بتحدفه ده , ده انا تعبت كتير في غيابك
الزوج : عارف يا حبيبتي , وعلشان كده انا مجهزلك مفاجأه
الزوجة: ايه حتعزمني علي بيتزا .
الزوج : مش بقولك انا غلطان اصلا , يعني احنا لسه بنتكلم في ايه , وانتي بردوا اللي في دماغك زي ما هو ,
يلا بينا نروح كفاية كده حرام عليكي .