عشان انت مصرى

[اميرة حبى انا]

انت اللي مصري ... استحمل بقي !!!!!

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله



بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق



هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

منقول

[خلود]

ههههههههههههههههههه

جميل اوى يااميره

حرام عليكى وبعدين علشان انت مصرى دى يعنى سبه ولا ايه

ايوه مصرى وهعيش مصرى واموت مصرى

ومسيرها حالها يتعدل بس قولى يارب

احمد فؤاد نجم ده شاعر ملوش حل ولسانه صعب اوى فى كل اللى بيكتبه

[fagrmasr01]

هههههههههههههههه
.. بس بصررررراحة ..
الراجل دا بيتكلم صح اوى

اللى معاه الجنسية المصرية .. لازم يعانى .. ويتقرف بكل المعانى .. هانعمل ايه يعنى .. دا حالنا ودا قدرنا طول ما الشعب ساكت وراضى .. يستاهل اللى يجرى عليه
ما هو احنا بجد لازم نتحرك
لازم نرفض
لازم يطلع لنا صوت

[اميرة حبى انا]

خلود
فجر مصر
شكرا على تعليقاتكم الجميلة

[فريد]

صحيح ده بيحصل بكل الطرق
و صحيح الطريق مفهوش مفترق
بس انا مصرى و هافضل مصرى
اعانى امانى اغانى وهرشة دماغ ووجع ف ودانى
مصرى و هافضل مصرى لوحتى الكون كله اتحرق

شكرا يااستاذة الكلام صح
بس بحبك يامصر