سكودا أوكتافيا A4 1.6L 8v A/T 2006

[Bahi2]

ا. محمود

أشتريت السيارة الأسبوع الماضى بحالة ممتازة عاملة 58500 كم تقريبا فى أربع سنوات بعد أوبل فيكترا B المانى موديل 1996 كانت معايا من سنين. بجهز نفسى لصيانة ال60000 كم وأتصدمت بأرتوك أوتو بيقولوا لى من 4000 - 5000 جنيةعلشان يعملوا الصيانة العادية وعبارة عن:

• تغيير زيت وفلتر محرك
• تغيير زيت وفلتر جيربوكس (أوتوماتيك)
• تغيير فلاتر بنزين وهواء وتكييف
• تغيير طقم تيل فرامل أمامى وخلفى والكشف على الطنابير
• تغيير شداد وسير الكاتينة والدينامو
• تنظيف سيرود فلف (!!!)
• كشف كهرباء وأنوار
• تربيط عفشة
• مراجعة مستوى السوائل

ممكن تنصحنى بأفضل وسيلة للمحافظة على العربية من غير التكلفة الجنونية دى وأعمل الصيانة الدورية فين؟ على فكرة أنا أصلا من اسكندرية وعايش فى 6 أكتوبر من 8 سنين وبروح اسكندرية مرة كل شهر تقريبا يعنى ممكن أعمل الصيانة فى القاهرة أو اسكندرية.

للأسف المالك السابق ضيع Owner's Manual وServices Manual ومش لاقيهم على الانترنت على موقع الشركة أو أى موقع تانى. :ل ما أدور الاقى بتوع A5 و Fantasia لكن مش لاقى بتوع عربيتى فى أى حتة. ممكن أعرف الاقيهم فين؟

مع الشكر

هشام باهى

[Bahi2]

سألت عن أسعار قطع الغيار فى طريقى للبيت عند محل واحد (بدون بحث ومقارنات) وعرفت أنها:
شداد كاتينة..........................320 جنية
شداد دينامو.........................350 جنية
سير كاتينة..........................150 جنية
سير دينامو..........................110 جنية
تيل فرامل أمامى.....................350 جنية
تيل فرامل خلفى......................280 جنية
فلتر زيت موتور......................50 جنية
فلتر زيت جيربوكس (أوتوماتيك)........70 جنية
فلتر بنزين...........................60 جنية
فلتر هواء...........................70 جنية
فلتر تكييف..........................60 جنية

المفروض كلها أصلى ما عدا فلتر التكييف تركى. يبقى مجموع قطع الغيار تقريبا 1870 جنية وطبعا لسة زيت المحرك (موبيل 1) وزيت الأوتوماتيك والمصنعيات.

[محمود عبد الله]

بص يا استاذنا

اولا انت مجبر على الصيانة فى التوكيل خلال فتره الضمان بس
يبقا طالما انت خارج الضمان ممكن تعملها بره عند ميكانيكى متخصص اسكودا

هتلافى منهم كتير فى الحرفيين و المصنعية مش هتتعدى 300 جنيه و انا كدة ببالغ

احسن واحد للسكودا فى الحرفيين هجيبلك رقمة و مكانه فى الحرفيين يوم الاثنين لما اروح هناك

طبعا انت هتشترى قطع الغيار اللى قولت انت عليها

اما عن دليل المستخدم ف ممكن ادورلك عليه انا على النت

اما عن دليل الخدمة فا ده انت مش محتاجه الا اذا كان ده مجالك اصلا عشان تفهم ايه اللى مكتوب فيه

عموما اللى هلاقيه فيهم هبعتهولك على الميل بتاعك اللى انت هتسيبهولى فى الرد الجاى

طلب اخير ابقا وضح انك حاطط سؤال فى عنوان الموضوع

شكرا لتواصلك و اتمنى اكون فيدتك

[Bahi2]

شكرا يا أستاذ محمود

[Bahi2]

شكرا يا أستاذ/ محمود على المساعدة وأتمنى أن الميكانيكى يكون فعلا كويس لأنى دخت عقبال ما لقيت ميكانيكى وكهربائى عدل يفهم فى الأوبل لما كانت معايا. كل واحد أشتغل فى التوكيل كام شهر ولا سنة يقولك "أنا خبير الأوبل" ويفتح ورشة ولا مركز خدمة صغير ولما تتعامل معاة يوديلك العربية فى خبر كان ويسرقك بكل الطرق الممكنة. بصراحة الصنايعية فى اسكندرية أحسن وأأمن وأرخص مليون مرة ولكن المشكلة أنى لما بنزل هناك مبيكونش عندى وقت لأنى يدوبك بشوف أهلى فى ويك أند واحد كل شهر.


الأيميل هو [email protected]