رحلة مع .. رغيف العيش وأنبوبة البوتاجاز
نصائح كتير كنت باقدمها لأهل الحى الشعبى اللى انا عايش فيه .. كانت اهمها .. النظام والتنظيم .. وياما قعدت انصح فيه بأهمية النظام .. وحلاوة النظام .. وجمال النظام .. وكان اكبر مثال باشرحه لهم .. طابور العيش بتاع الصبح
وبينى وبينكم .. كنت مقتنع اوى جدا خالص بان اللى باقوله صح الصح .. وانه مش مجرد نظريات
مثلا مثلا .. فى الدول المتقدمة.. كل شئ بيكون له دور ولو فيه اثنين واقفين مستنظرين خدمة من مكان .. بيقفوا طابور .. وعلشان كدا كل شئ منظم ومرتب وكلهم بياخدوا طلباتهم بسرعة وبيوفروا وقت كتير
والمشكلة انى فى الفترة اللى فاتت .. كنت كل ما اشرح للناس النظرية دى الاقيهم بيغيروا الموضوع باى طريقة...
ولما سألت صاحبى .. هم ليه بيغيروا الحوار زى ما يكون الموضوع مش مهم ليهم .. فاجئنى بطلب غريب اوى..
قاللى .. ايه رأيك نروح الصبح انا وانت نجيب عيش م الفرن ....طبعا غريب الطلب دا .. لان الراجل بتاع الفرن بعد لما بيخلص شغله براحته بيبعت لى العيش لحد البيت... يبئا ليه بس اروح ازاحم الناس فى الطابور بتاعهم .. انا اصلا مش مسعجل .. واقدر انتظر لحد لما كلهم ياخدوا العيش ويروحوا بيوتهم او اشغالهم .. وبعد لما كلهم ياخدوا طلباتهم ... يبئا ييجى لى انا العيش براحته .. ليه الاستعجال
رحت الصبح مع صاحبى .. لقيت ثورة عرابى مشتعله قدام شباك الفرن .. عشرات الناس وزحام وزعيق وخناق ...
بالعافية اقنعتهم انهم يقفوا طابور ... بس هم كمان من حقهم انى اقف فى اخر الطابور ..
وفعلا وقفت فى اخر الطابور ......
من 7.00 ص .. الى 10.30
وقبل ما اوصل للشباك ... لقيت الشباك بيقفل .. والفرن بيعلن انتهاء الطريحة بتاعة النهاردة.......
ولما صاحب الفرن خرج من الباب شافنى ... لقيته بيسلم بحرارة .. وبيبلغنى العيش هايوصل للبيت بعد ربع ساعة... بعد الزحمة دى ما تروح بيوتها ..
فورا ... اقسمت بالله ... ان محدش يبعت لى العيش للبيت تانى ...
وبنشترى الرغيف ابو ربع جنيه
فى طريق العودة .. شفت مخزن الأنابيب .. البوتاجاز .... وياريتنى ما خرجت من بيتى ف اليوم دا .... مشهد لا يمكن نسيانه .. طابور مئات الستات والعواجيز والاطفال والرجالة والبنات وكله كله واقف .. وكلهم بيحلفوا انهم اليوم التانى .. ومنهم لليوم التالت .. فى حرب الكفاح للحصول على الانبوبة ...
ووصلت عربة الانابيب .... ومحدش شاف مين اللى واقف جنبه من التراب والزحام والخناق ...
ورجعت البيت ...... يحيا الطابور .. يعيش النظام
رد مع اقتباس
المشاركة الأصلية كتبت بواسطة خلـود
المفضلات