ازيكم
معلش اتأخرت شوية
انا افتكرت انى نسيت فى البداية اعرفكم بنفسى
زى ما الناس بتعمل يعنى
اسمى: مش اميرة ههههههههههههه عادى بقى عدوها
سنى:34 سنة و3 شهور و19 يوم
الحالة الاجتماعية :متزوجة وعندى ولدين

بحب اوى اقرأ روايات الحب الجميلة بس بصراحة مش اى حب
يعنى مش بحب الحب بتاع عبد الحليم حافظ والتنهيدات بقى والكلام ده
لا بحب الحب اللى يجى بعد عذاب يعنى ومطاردات لذيذة وخلافات زى العسل وبعدها الاعترافات بقى وتبدأ القصة
كنت بحب الاغانى ولما عرفت انها حرام حاولت بجد وبطلت بس للاسف بحب اوى اغنيتين
بتوحشينى وغريبة الناس لوائل جسار
بحب برضو الافلام الاجنبية جدا بحس فيها بتفكير فى حاجات غريبة وعجيبة مش بكون مجرد حد قاعد يتفرج على فيلم
خصوصا افلام الخيال العلمى والخيال
زى هارى بوتر مثلا
بموووووووووووت فيها ههههههههههههههههه
محدش يتريئ
وبحب العربى برضو زى مثلا افلام احمد عز واحمد حلمى
وبحب فيلم اكيد فى ناس كتير مش عارفاه اسمه دموع فى ليلة الزفاف
حياتى بسيطة جدا تبدأ بذهاب ولادى للمدرسة وبعدين انام شوية لانى للاسف الشديد بنام متأخر ومش عارفة ليه ونفسى انام بدرى او انام شوية الضهر زى خلق الله بس للاسف برضو مش بعرف
وبعدين اقوم اعمل الغدا وبعدين يرجعو بالسلامة ونتغدى وتبدأ المعركة
الواجب
الدروس
المذاكرة(اللى بالعافية والخناق ودى اكتر حاجة تعبانى ومعذبانى فى حياتى)
وبعدين نتعشى ونشترى لزوم سندوتشات المدرسة واللبن(ليهم هما انا مش بشربه يعنى بينى وبينه سوء تفاهم)
وبعدين ينامو واقعد انا بقى
لو فى حاجة اعملها وساعات بطنش واخليها الصبح(يعنى اخبى عليكو)
واقعد شوية على المنتدىبس يوم السبت زى النهاردة كده بقعد على المنتدى متأخر شوية عشان متابعة مسلسل اجنبى اسمه(ghost whisperer) خيال اخر حاجة بقى واحدة بتشوف اشباح الناس بعد ماتموت
بيجى الساعة 10 ويخلص 11
كمان بحب مسلسل(grey s anatomy) مسلسل فيه كل حاجة تحفة ومجننى ونزلت كل حلقاته بكل المواسم من على النت
عايزة اقولكم انى اشتغلت 3 سنين وبعدين قلت اربى ولادى احسن
وفى واحدة صاحبتى من ايام الشغل بكلمها كل فترة بنسأل على بعض
لكن اصلا اصلا مش عندى غير صديقة واحدة بس
خلود
هى جارتى كمان على فكرة ساكنة فى الشقة اللى فى الدور اللى فوقينا
اللى يضحك بقى واللى ناس كتير بتستغرب بسببه ان فى بينا enter come) بنكلم بعض فيه كل مانزهق او نتعب من الشغل
هى كويسة وطيبة ومخلصة(مش عايزين قر ماشى)
وبس معنديش حد تانى اكلمه ولا اعرف حد تانى
نسيت اقولكو ان ولادى واحد فى اولى ثانوى عام وواحد فى خامسة ابتدائى
ادعولى ربنا يهديهم ويوفقهم لما فيه الخير
امين
دى الحاجات اللى افتكرتها عنى واللى محدش يعرفها واللى جت فى بالى دلوقتى
بكرة ان شاء الله افتكر واقول تانى
تصبحو على خييييييييييييير