سلامو عليكو يا ريس مرسي
بص بأه يا ريس انا جبت الواد ابراهيم ابنى اسم النبى حارسه وضامنه وقلتله تعالى يا ولا اما نكتب كلمتين للريس الجديد ربنا ينصره ويعينه على شيلته التقيله ونقوله حالتنا ايه
ونوديها للبتاع دهون بتاع المظالم ده اللى انت عملته يا ريس
بس الواد ابراهيم بعد ما كتب الكلمتين قالى
يا اما الريس مش هيقرا الكلام دهوت احنا نروح لافندى من المتعلمين يكتبلنا الكلمتين بالطريقة اللى بيحبها الريس عشان يفهمنا كويس



قوم اخدنى الواد ابراهيم اسم النبى حارسه وضامنه من ايدى ورحنا عند محكمة كده ولقينا واحد قاعد بشمسية وقعدنا معاه
وشاف الكلمتين بتوعنا وقال
حاضر يا امى
ارتاحى وانا هكتبهولك

بس طلبت منه يحط الكلمتين اللى قريتهم دول فى الاول بردك


سياده الرئيس
الدكتور \ محمد مرسي

هذه رسالة من السيده \ فتحيه السيد حموده
ام ابراهيم

سيادة الرئيس
نحن من قاطنى العشش الخشية المنتشرة فى انحاء الجمهورية
ابنى يعانى من كهرباء زائده فى المخ ويحتاج لعلاج شهري مكلف جدا
زوجى يعمل على عربية بطاطا فى محاولة منه لاطعامنا
ابنتى الصغري مصابه بشلل اطفال منذ الصغر ولا تقوى على الحركة

لقد اخترناك ودعينا الله ان تكون سندا وعونا لنا
لذا ارسل اليك هذه الرساله راجية الله ان تصلك وان تضعنا فى عين الاعتبار نحن قاطنى العشوائيات
نبحث عن ابواب رزق كي نحيا ولكى لا نكون عالة على المجتمع

اعذرونا ان كنا نشوه صورة مجتمعكم المتحضر
اعذرونا ان كنا نؤذيكم بملابسنا المهترئه
اعذرونا ان كنا نؤذيكم برائحتنا الكريهه التى اعتدنا عليها لندرة المياه
اعذرونا ان كنا نؤذيكم بجهلنا

ولكنها الاقدار..............
ان نتواجد بينكم وان نكون مصريين تحت رعايتك

سيادة الرئيس
نحن لا ندرك معنى دستور او ديموقراطية ولكننا شاركنا فى الثورة رغبة فى التخلص من حسنى مبارك
لما فعله بنا من تجاهل واقصاء


لا يعنينا مجلس شعبكم الذى تم حله ولكن يعنينا كيف سنحيا ونستمر على قيد الحياه
لا يعنينا من ريس الوزراء ولا اى وزير بقدر ما يعنينا ماذا سيقدم لنا فعليا

لا تعنينى المادة الثانية من الدستور التى اعيتكم بحثا ولكن يعنينى ان يراعى الله فينا من يحكمنا

لا اكترث بالنخب ولا الاحزاب السياسية ولا حتى حزبكم الحرية والعدالة
لانهم لم يصلوا الينا فى السابق فلن يصلوا الينا ابدا


كلمتى الاخيرة سيادة الرئيس

نحن لن نخون الله فيك ونتمنى ان لا تخون الله فينا
سنراعيك ونساندك وعليك ان تبذل كل ما فى وسعك لتحقيق مطالبنا