السلام عليكم ورحمة الله وبركاته
اهلا وسهلا بالحبايب الغاليين على قلبى ربنا يسعدكم كمان وكمان ببركة
الشهر الكريم شهر رمضان عنوان حدوتة اليوم
ايه ياترى نشوف أه دى بتقول (خليك ياجارى انت فى دارك وانا فى دارى)
معنى الكلام ده ايه يعنى ياجارى لا تيجينى ولا اجيك وكل واحد فى بيتو
لازيارت ولا سهرات ولا اى حاجه بالذمه ده كلام تقولو لجارك وانت فى الشهر
الكريم شهر رمضان وبتأدى فرض ربنا ايوه انا عارف ان ابن جارك ده ضايقك كتير
ده حتى اخد مسمار وخدش طلاء سيارتك وولدو التانى رمى الكره بتاعتو على
زجاج غرفة النوم وكسروا والست بتاعتو لما دخلت بيتك تكلمت على مراتك مع
نسوان الحى بتاعكو وقالت عليها انها ما بتعرفش تطبخ ومكياجها عامل زى
امنا الغوله بس ده كلو كوم واللى انت عاملو كوم تانى يعنى انت ماشاء الله عليك
راجل عاقل ومستواك رفيع وتعرف كلام ربنا كويس وقارئ للقرآن وتعرف قد ايه
كتاب الله وحديث الرسول صلى الله عليه وسلم بيأمروك بالاحسان للجار حتى الجار الوحش فده اللى انت عاملو ياحبيبى موش هوالحل لما تتقابل مع جارك وانت فى شهر رمضان وتدور وشك عنو وحتى السلام مايسمعوش منك وكأن بينكم ثار بايت يبقى
ماعملتش الصح وانت غلطان لما تروح للجيران التانيين وتقولهم كلام وحش عن جارك
ده تبقى مافرقتش عنو ياصاحبى بحاجه يعنى فيها ايه لو قلت عشان رمضان يلا نصلح الامور
مع الجار ده ونتوددلو ده ممكن يقلب الموضوع للكلام اللى بيقول مامحبه الابعد خلاف
وموش حانقول عداوه لانى مابحبش اشوف الكلمه دى بين مسلم ومسلم وحاتشوف




قد ايه الشئ الحلو اللى انت عملتو بيغير القلوب ويصفى النفوس ويمكن جارك ده يقول
لمراتو ياوليه والله استحيت من جارنا ده اللى هو انت الراجل ياستى مع كل اللى عملوه
ولادك وانت يأأم لسان طويل جانى اليوم وقالى سماح ياجارى احنا فى رمضان شهر التوبه والغفران وقالى ماعليش انا مسامحك من قلبى والله قد ايه ياحبيبى تكون رائع
ومتمسك بدينك وتعلم جارك ده خلق المسلم وجمال ديننا وجمال وروعة رمضان وممكن
جدا تهديه بالمعامله دى لاتباع الحق ويطل عليك حياء المسلم فى وشو ويقول عليك
الكلام الحلو اللى بيحبو قلبك ومراتو تيجى بيتك وتعتذر وتلعن ابليسها اللى مخليها رغايه
بتتكلم على الجيران وتبطل العاده الوحشه دى شفت قد ايه اللى انت قادر تعملو وشفت
النتائج اللى تحصل لو انت فكرت بعقلك شويه وقلت يعنى ايه الزجاج وصلحناه والسياره
رجعت زى ماكانت حلوه وجميله وخلينا عيشتنا جنب جارنا بما يرضى ربنا واهو بقى بيسأل علينا كل يوم ده حتى عازمنى النهارده على الفطار فى بيتو ولما سافرنا اول
امس يومين لقيناه بيحرس لنا البيت شفت الحياه قد ايه حلوه وشفت رمضان بيغير
فى الناس قد ايه لما تكون انت سفير الاخلاق فى الشهر الكريم ده وتحسس العباد
بأن رمضان يمسح كل الخطايا والذنوب والمشاكل والخلافات كمان ويصلح شأن المسلم
اللى يتقيد فيه بأوأمر ونواهى ربنا بالذمه مش كده احلى انا بأقولك كده وانت عارف ليه
طبعا عشان بحبك وعايزلك الخير ربنا يهدينا ويهديك






منقول