اضحك كركر .. اوعى تفكر

[mervat_u]

ماهو لازم التغيير مش كله نكد..........مره واحد بخيل ابنه قال له لو نجحت يابابا هتجيب لي ايه قال له هجيب لك كره ونجح الولد وجاب له كره....الولد فرح وقال له طب لو نجحت السنه الجايه هتجيب لي ايه ؟ قال له هنفخ لك الكره ديه

[fagrmasr01]

أهلا أهلا ميرفت
نورتينا بنكتك عن البخيل.. بصراحة حلوة اوى
ومعاكى حق .. الضحكة والابتسامة مطلوبين
وياريت تشاركينا فى صنع البسمة وتداومى معانا فى اختيار النكت
وتنورينا بوجودك فى صفحتى اللى هدفها زرع الابتسامة
جمال ( فجر مصر )

[الامير عماد]

اتفضل استاذ جمال حبة نكت هدية مني ليك وللمنتدي واعذرني علي غيابي كان عندي ظروف كتيرة



مسطول راح المحكمة القاضى بيسأله انت متجوز مين؟قاله:واحدة ست,القاضى قاله
انت هتهرج؟ امال فى حد بيتجوز راجل , قاله :اه اختى

مسطول بيقول لصاحبه: يا اخى امبارح دخلت فيلم هندى هايل بتاع راجل وست ماشيين فى الشارع لقوا طفلة فى اللفة خدوها ربوها لغاية لما كبرت وفى الاخر طلعت امهم

مسطول ماشى فى الشارع فقابل واحد قاله: ازيك يا محمد انت اتغيرت اوى يا محمد عنيك ووشك وكل شكلك اتغير اوى يا محمد , رد عليه وقاله لكن انا مش محمد ... فقاله وكمان غيرت اسمك يا محمد

واحد باشا دار عليه الزمن وافتقر حب يشتغل اشتغل بياع فجر وجرجير , طول
النهار واقف فى السوق ولابس الطربوش وبينادى فجل ياحوش جرجير يا كلاب

صعيدى فى الجيش بيقول لعسكرى زميله فى الحرب :انت من دشنا؟ قال له لا .. راح ضربه بالنار وقال له تبقى من ديش العدو

واحد اسكندرانى لقى بنته راجعه البيت الساعة تلاته الصبح قالها كنت فين يا بت قالتله كنت بنتمشوا مع واحد صاحبى يابابا .. قالها خشى نامى احنا نحبوا الصراحة..

حشاش بيقول لزميله يااخى ماتيجى نروح فلسطين , قاله : ليه , قاله : نروح
نضربلنا حجرين

رئيس دولة صغيرة راح زيارة للصين, رئيس الصين بيقوله احنا عددنا 3 مليار , عدد سكان دولتكم كام. قاله: 30 الف , قاله طب مجبتهمش معاك ليه يا راجل ؟

مرة واحد بخيل اوى خبط فى حيطة اتعور جامد وقعد ينزف , شافه واحد عسكرى قاله:اشوفلك دكتور .. قاله : لا شوفلى حد يشترى منى الدم الى نازل ده

سألوا واحد بخيل جداجداجدا : تعمل ايه لو الدنيا برد. قال: اروح للدفاية ... قالوا: ولو الدنيا بردت اكتر؟ قال اقرب من الدفاية.. قالوا : ولو بردت اكتر؟ قال: الزق فى الدفاية .. فالوا : واو نزل تلج. قال :اشغل الدفاية بقى وامرى لله

[fagrmasr01]

الأمير فعلا أمير
برنس بحق يا أميرنا

ههههههههههههههههه

كل نكتة لوحدها ضحكة بصحيح ..تسلم ايدك
ويارب تدوم لنا مشاركاتك هنا وتفرحنا وترسم لنا ابتسامات و.... ربنا يسعد قلبك
تسلم يا اميرنا ياصاحب اجمل ضحكة
وأتمنى كل أعضا ءمنتدانا يشاركو ولو كل واحد بنكتة وابتسامة
أخوك جمال ( فجر مصر)

[اسامة22]

اية دا ياجماعة جمال افندي بنيلوك جديد
اية الحلاوة دي اية الطعامة دي
ايوة كدا افرح للدنيا تفرحلك
وبجد ضحكتني من قلبي
وانت ياعماد طلعت داعية كبيرة
تسلم ايدك