اخوانى واخواتى اعضاء وزوار قهوة المصريين










اولاً احب اشكر اخوانى واخواتى اللى ابدوا رأيهم


وجاوبوا على سؤالى فى الموضوع ده


سؤال بسيط ياريت اشوف اجاباتكم عليه؟ ‏( 1 2 3 )



واللى من خلال آرائكم وشجعتونى اكتر انى اعرض عليكم


الحملة دى




** مش هساير الهوجة وهغير الموضة **



واتمنى ان الحملة تلاقى قبول وتفاعل منكم



مش بردود بس ولكن بفعل



لأن الحملة مش هدفها بس القهوة لكن هدفها


كل البنات والشباب كمان



والحملة مش هيكون ليها فايدة غير لو انا وانت وانتى


اتفقنا على هدف واحد واتفقنا فى افعالنا على تحقيقه





الحملة مش خاصة للبنات بس وان كان البنات فعلا هما


الهدف الأساسى للحملة ولكن برضو الشباب الحملة موجهة


ليهم برضو



هبدأ بسم الله



أول شئ فى كل الردود اللى شوفتها اتفقتوا على اعتراضكم على موضة
اللبس اللى نازلة السنة دى واللى قبلها واللى بقت زايدة عن الحد بطريقة مخجلة


لبس لا يليق بمحجبة او حتى غير محجبة
لبس لا يصلح الا فى بيتك وادام زوجك مش ادام زوار كمان
طب هل ده ينفع !!

فى ردودكم برضو ذكرتوا ان كل اللبس كدة وان البعض اشترت مجبرة
عشان ملقتش لبس محترم يناسبها كبنت محجبة!!

البعض برضو قالوا لما اعترضوا كان رد البائع
الموضة كدة ياآنسة .. او هو ده اللبس اللى عاوزاه البنات !!

هل انا وانتى عاوزين المناظر دى؟
هل انا وانتى نقبل نمشى وكأننا سلعة كل من هب ودب يقدر يشوفها
وان وصل الامر فى بعض الاحوال يلمسها كمان!!





اسفة على الكلام ولكن بجد الموضوع خطير جداااااا








تعالوا طيب نفكر سوا الموضة دى بتطلع وتنتشر ازاى؟






الموضة بتطلع من بره وده مش كلام وخلاص
لأ كلنا اكيد بنشترى وبنشوف مصدر الملابس دى مكتوب ايه؟
يعنى الهدف اكيد واضح!!





طب بتنتشر ازاى بقى وازاى بتلاقى النجاح ده واللى
يحمس مصممين الأزياء انهم يبتكروا موضة جديدة
تعرى اكتر من السنة اللى قبلها؟



احنا .. ايوة احنا اللى بننشر الموضة دى وبنشجع كمان على الاسوء
لما انا وانتى وكل مجانين الموضة وبيجروا وراها نشترى
الموديلات دى كدة بنحققلهم نجاح انهم يبتكروا ويعروا اكتر
ماهو كل مابينزلوا بالجديد بيعجبنا ونشترى







كمان مصانعنا هنا لما بتلاقى موديل جديد مستورد نزل
وعجب الناس ده بيشجعهم يعملوا زيه
ونلاقى المنظر بالشكل اللى احنا شايفينه ده



هوجه دلوقتى كلمتين لكل بنت




اختى اللى عاجباها الموضة دى وبتجرى وراها
صدقينى جمالك وشياكتك مش فى جسمك وشكلك
فى اخلاقك واحترامك لنفسك وأهلك





اختى اللى نفسها تعجب الشباب وبتجرى ورا الاستايل
الشباب عمرهم ماهيحترموكى بالشكل ده
هيبص وهتعجبيه ممكن لكن كجسد مش انسانة




اختى اللى مجبرة على لبسها ده اثبتى على احترامك
ومتسايريش الموضة عشان مفيش غير الموجود
تقدرى تتصرفى وتفضلى بشكلك الجميل وانتى محترمة ومحافظة
على نفسك من اى نظرة حرام




اختى اللى نفسها تتجوز وواخدة اللبس وسيلة لعرض جمالها
على ابن الحلال
تفتكرى اللى هيتجوزك ده هيراعى الله فيكى ان كانت مقاييسه
لزوجته فى جمالها واستايل لبسها وشياكتها




اختى اللى نفسها تبقى احلى من صحابها وجاراتها وقرايبها
اللى عاوزة تغيظيهم دول اول ناس هينتقدوا شكلك
وينهشوا فى سمعتك








بأيدينا احنا نقدر نغير الموضة دى
كل واحدة فينا تقدر تتصرف وتحافظ على نفسها
من النظرة الحرام واللمسة الحرام
نقدر نحافظ على اخواتنا ونساعدهم يغضوا بصرهم
ويحفظوا لسانهم عن معاكستنا






لما الموضة دى مبتكريها ميلاقوش اى استجابة
ولا تهافت عليها وان اللى بيجذبنا اللبس المحترم
مش هنلاقى المناظر المبتذلة اللى شايفينها دلوقتى



المصانع غرضها المصلحة والمكسب
لما المصانع دى تلاقى مكسبها فى الشئ المحترم
هتتهافت على صناعة النوع ده ومع الوقت اللبس
الضيق والعريان هيختفى وبناتنا هتحافظ على نفسها
وشبابنا مش هيبقى ليهم حجة يعاكسوا او يتحرشوا بينا
هنقلل حالات الاغتصاب ومستقبل الاسر اللى بيضيع




يااخواتى كلنا متفقين ان حال البلد دلوقتى مش امان زى زمان
مش معقول كل اسرة بناتها بيخرجوا لشغل او دراسة
او غيره هيعينوا بودى جارد يحمى بناتهم
من البلطجية اللى بيفتنهم اللبس ده وبيخطفوا البنات





نعمل اللى علينا ونحافظ على نفسنا ونطمن اهلنا



نعمل اللى علينا ونقفل الطريق على اى واحد يفكر
يعاكس او يتحرش او يخطف واحدة مننا




انا كدة خلصت كلامى وبعتذر على طول الموضوع


واتمنى الاقى استجابة وتفاعل مش بس بالكلام
ونقدر كلنا بتصرفنا




نغير الموضة