ماهي أحسن قطعة في أراضي ابني بيتك في محافظة 6 اكتوبر

[الفيومي]

للأسف الشديد، كل الناس بتفكر بمنطق العشوائيات اللي معظمنا عايشين فيها، ما فيش حاجة اسمها أحسن قطعة، لأن كل المناطق مهندسة، ومخططة على أعلى مستوى، حدائق، شوارع واسعة، خدمات، مواصلات، وبالتالي الكلام على أحسن قطعة ما لوش معنى، لأن كلهم زي بعض تقريبا،
ويبدو ان الناس كلها بتتكلم على بعدها من القاهرة أو قربها من القاهرة، ولو المقياس ده سليم، تبقى بولاق الدكرور أحسن من الحي المتميز في 6 أكتوبر، وصفط اللبن أحسن من المعادي ومدينة نصر، طبعا ده كلام مش مظبوط، وبعدين الكلام على القرب من حي الأشجار أو استاد الزمالك كلام برضو ما لوش معنى، ويدل على قلة الخبرة، لأن ميت عقبة محيطة بالنادي الزمالك الحالي، هل ده معناه انها منطقة متميزة،
بالنسبة للأخ اللي بيقول المنطقة السادسة ما لهاش مميزات، اقول له: المنطقة السادسة قريبة جدا من الحي السادس، يعني بتركب عربية من الحي الساس بربع جنيه (اللي هي رايحة المستقبل) في خلال دقيقة واحدة بتكون في المنطقة السادسة، وطبعا من الحي الساس لغاية مسجد الحصري حوالي ثلاث دقائق، وده معناه انها قريبة جدا، الحساب بالطرق وليس بخريطة جوجل اللي هبلت الناس،
وأخيرا: يمكن تبقى شايف انك اخدت في قطعة بعدية أو غير مميزة، وبعدين تطلع أفضل قطعة على الأقل بالنسبة ليك، وعسى أن تكرهوا شيئا وهو خير لكم
ربنا هو اللي اختار واحمدوا ربنا انكم قدمتم في المشروع، أنا شخصيا لي اصدقاء بيعيطوا انهم ما قدموش فيه،
احمدوا ربنا، وتأكدوا أن كل القطع جميلة وبها جناين، وكفاية انك هيبقى عندك فيلا مستقلة، وفي أفضل مدن مصر (السادس من أكتوبر)
وربنا يوفق الجميع