أولاً احب اقولكم ان الموضوع منقول
لكن من كتر ماعجبنى وحسيت انه تنبيه مهم
ليا وليكم ولكل بنت قولت لازم تشوفوه


الموضوع على لسان صاحبته



انتو مستعجلين على ايه ؟
ايه اللى يخليكى تعرفى واحد على النت والا من الشارع والا اى شخص غريب عنك - تعرفيه وتتكلمى معاه وتتعلقى بيه وتحبيه ؟
وممكن كمان الموضوع يتطور لأكتر من كدا وانتو فاهمين ودا برضه قراته فى مشاكل كتير
فى المنتديات

يا حبايبى الأسرة دى بيت بتبنوه مع بعض
على قد ما تراعوا ربنا فى علاقتكم على قد ما يبقى البيت قوى ومتماسك
دلوقتى عرفت واحد من ورا اهلى ووعدنى بالجواز

ادى طوبة فاسدة اتحطت فى البيت

نقولها مش ح يتجوزك تقولنا لا دا غير كل الناس
ولو حصلت المعجزة واتجوزوا بتبقى حياتهم جحيم
ما هو الطوب الفاسد دا كله يا اما يخلى البيت ينهار
او يبقى ضعيف وممكن اى عاصفة صغيرة تطيره

مسك ايدها فى الخطوبة
طوبة كمان فاسدة

طب راعوا ربنا وبيقابلها فى بيتهم بعد الخطوبة فى وسط أهلها
طوبة جامدة اتحطت فى البيت
وهكذا..
انتو فاهمينى ؟
ودا - على حسب خبرتى المتواضعة - سبب حالات الطلاق والعيشة المش مرتاحة والشكاااااااوى اللى باسمعها كل يوم من البنات والستات

يا حبيبتى ياللى عاوزه تتجوزى والجواز دا كل همك
انا عارفه ان دا حلم اى بنت وان انتى لما بتعملى علاقة مع شاب او تعرفيه حتى بيبقى هدفك الجواز
لكن هو مش بيفكر كدا
هو عاوز واحدة تشيل اسمه وتبقى ام لأولاده ودلوقتى بقوا شكاكين اكتر من اى وقت عشان حال البنات اللى كلنا عارفينه
تلاقى البنت من دول محجبة ومحترمة ولابسة طويل وممكن تكون بتحفظ قرآن كمان
لكن كان ليها ماضى مع شاب أو ارتكبت معصية أو عملت حاجة غلط
يعنى مش الجوهرة اللى هو بيدور عليها
الجواهر بقت نفيسة قوى فى زمننا دا
أغلبها عليها تراب من حد قبله لمسها وماعجبتوش

ح انصحكم نصيحتين من أخت ليكى فى الله :
1- هل عندك ذرة شك واحدة ان نصيبك وزوجك المكتوب عند ربنا جاى جاى ؟
ح تقولى لى لا طبعاً
ح اقولك لا عندك شك
عارفه ليه
عشان بتروحى تدورى على نصك التانى بطرق تغضب ربنا
وتخليه يؤخر عنك اللى كاتبه لك
ونسيتى
( إن ما عند الله لا ينال إلا بطاعته )
ح تاخدى بقى ازاى المفاجأة اللى ربنا مخبيها لك وانتى بتعصيه
اصبرى و حتنولى
وواحد متفصل عليكى بالظبط لا أكتر ولا أقل
ما هو من عند ربنا ومن اختياره هو
وهو أعلم بيكى وباللى يناسبك
مش انتى تروحى تعرفى لى واحد وتقولى باحبه وح اموت عليه وهو دا
وهو ماينفعكيش
اختيارنا احنا بيفشل
لكن اختيار ربنا لينا مضمون

2 - أنا كنت زيك كدا من حوالى سنة
فوقتنى كلمة معلمتى قالتها لى
قالتلى هو انتى حاطة آمالك كلها على راجل ؟
كل هدفك فى الحياة راجل ؟
طب وفين هدفك لنفسك ؟
ولدينك ؟
طب ح تتجوزى
ح تقف حياتك بقى ؟
هى دى غايتك من الحياة والوجود ؟
مش معنى كدا انى باقولك ما تتجوزيش
لكن ماتخليش حياتك كلها تقف على كدا
تنامى تقومى تحلمى بالعريس
حاطة ايدك على خدك مستنياه

طب افرضى اتأخر شوية ؟
يا ستى اعتبريه تايه فى الزحمة والمواصلات ومش عارف يوصلك
ح اعمل انا ايه بقى ؟

جهزى نفسك لتحمل المسئولية

كلنا بنحلم بالفرح والشبكة وكلام الحب والرومانسية
كل دا حلو
بس الجواز دا مشروع عمرك وطريقك للجنة أو .. للنار
ابدأى أهّلى نفسك معنوياً ونفسياً وبدنياً
بنات كتير لما تتخطب تقعد تتعلم الطبيخ وتتفنن فى أصناف الأكل
ماشى دا برضه مطلوب
بس قبلها كوّنى انتى نفسك
هو مش عاوز طباخة بس
هو عاوز انساااااااانة
عقل يفكر معاه ويحل له مشاكله بروية وهدوء
أم تحتويه وتحتوى بيته واسرته
جبل يشيله ويستحمل معاه كل كبيرة وصغيرة
والستات المتجوزين ح يوافقونى على كدا
وعلى فكرة
الكلام الحلو ح ييجى بس ما يبقاش دا همك
الراجل مش بيتكلم كتير زينا
ممكن عينيه تقولك أحلى كلام من غير ما ينطق
وإحساسك بيه يكون أكتر من لو قالوه لك بنفسه

عاوزين بيوت ثابتة بقى تعمر
أمال ح ننصر الدين دا إزاى ؟
أبوووس ايديكم بطلوا علاقات محرمة ومعرفة بشباب
استنى هدية ربنا ليكى
وفوقى من الدموع والحسرة على عمرك اللى ضاع وان السن اتقدم بيكى
{ قَالُواْ أَإِنَّكَ لَأَنتَ يُوسُفُ قَالَ أَنَاْ يُوسُفُ وَهَـذَا أَخِي قَدْ مَنَّ اللّهُ عَلَيْنَا إِنَّهُ مَن يَتَّقِ وَيِصْبِرْ فَإِنَّ اللّهَ لاَ يُضِيعُ أَجْرَ الْمُحْسِنِينَ } [ يوسف/90]

انا عندى 27 سنة على فكرة
وزيكم كدا
وعندى قلب برضه ونفسى احب واتحب
بس مش دا بس هدفى
عندى أهداف تانية

أقولك على حاجة ؟
اقعدى أهّلى نفسك نفسياً ومعنوياً وابدأى صلحى فى عيوب عندك
عشان ولادك الجايين ح يشربوا منك
واتدربى كدا على شوية حاجات
منها تحمل المسئولية
الإنصات لمشاكل الغير - ودا ح تلاقيه كتير قوى فى المنتدى دا
ماتبقيش عاطفية قوى ولو حد زعلك بكلمة تزعلى وتاخدى موقف
اتعلمى تكبرى دماغك
وابدأى تلتمسى لغيرك العذر
مثلاً صاحبتك ما اتصلتش بيكى وهى عارفه انك عيانة
معلش يمكن عندها ظرف اكلمها انا
ما هو جوزك برضه ح يبقى كدا
شغله وحياته مسيطرين عليه مش ح يعرف يكلمك كل يوم الصبح يقولك باحبك زى ما بيحصل فى الأفلام اللى بوظت لنا حياتنا وخلتنا نحس إن الجواز هو النهاية السعيدة لأى بنت
بعدها بقى البنت تندفن بالحيا وتيجى تقولى لها جواز تقولك بلا جواز بلا نيلة
صح والا لا ؟
البطل الوسيم بيحب البطلة الجميلة وينتهى الفيلم بجوازهم - مهما كانت العقبات ما هو ح يتخطاها عشان المؤلف عاوز كدا - وتنكتب كلمة النهاية عليهم وهما بيتجوزوا
كدا انحفر فى مخنا للأبد إن البنت عايشة أصلاً للجواز ولما تتجوز خلاص مافيش حاجة تانى ما هى دى النهاية زى الأفلام
ولازم كمان البطل يبقى وسيم زى الأفلام
معلش طولت عليكم لكن بجد انا باكلمكم ويعلم ربنا انى خايفه عليكم
وكنت زيكم كدا باعيط واملا الدنيا دموووووع ومرت عليا ايام وأنا تعباااااانة جداااااااً
لحد ما ربنا خلانى أشوف تجارب غيرى واعرف منها كل اللى قلته لكم دا

هنا خلص الموضوع
واتمنى ننتفع ولو بكلمة منه
وربنا يهدينى ويهدى بنات المسلمين يارب