زعلان انا يا مصر
د. أشرف نجم يكتب: زعلان أنا يا مصر
زعلان أنا يا مصر مش ليكى.. لأ منك
زعلان لأن العصابة بيسرقوا منك
أغلى ولادك يا مصر بيتخطف منك
دينك وعرضك وأرضك وكل شىء عنك
********
وأنت يا مصر تقولى للسارق الغدار
أهلا وسهلا فى أرضك شرفتنا فى الدار
وتطردى من حضنك الشرفا والأحرار
********
وحتى صوتك ودمعك بتبخلى بيهم
لو كنت واقفة معاهم كنتى تسانديهم
لكن كثير من ولادك قال ما لى أنا بيهم
وادى النتيجة يا مصر إنك فقدتيهم
********
ورغم زعلى يا مصر مش قادر أنساكى
أصل إنت حبك فى قلبى بياخدنى للقاكى
********
علطول بحاول أخبى لكن بيفضحنى
نظرة عيونى وكلامى ودمعة من جفنى
********
ليه بس دايما يا غالية بتكشفى المستور
وتخلى حبى وحنينى لحن حزين مكسور
وإيش راح يفيدك يا أمى قلب جريح مقهور
********
عهد عليا راح أرجع لحضنك الدافى
ورغم زعلى يا حبى راح أبقالك وافى
امسح دموعك بدمى وقلبى لكى صافى
وعجبى
رد مع اقتباس
المفضلات