النهارده انا لسه راجع من مشوار هد حيلى بصحيح طبعاً هتسألونى كنت فين ياتيفه هقولكم
النهارده قلت ياواد اخطف رجلك على شرم زور الست هانم وشوفها محتاجه حاجه والا لأ اهى برضوا ستك وستكم وستنا كلنا وكانت فى يوم من الايام بتجبلكنا كتب ببلاش وهى اللى افتتحت كشك السجاير اللى على الناصيه بتاع فتحى العكر ابن خالتى **ماكدبتش خبر ورحت طيران بالتوكتوك على شرم سألت على عنوان الهانم والحقيقه تهت فى الاول لان البنسيون اللى قاعده فيه محدش عارفه من اهالى شرم الغلابه اللى راحوا هناك فى الفلل اللى عملتهلهم الحكومه نتيجه لزلزال 92وسكنتهم الحكومه على حسابها الله يعمر بيته نظيف عملهم قريه على اد حالها وعشان غباؤهم سماها القريه الذكيه عشان يكملوا تعليمهم فيها وياخدوا دروس محو اميه الشعب ربنا يكرمهم يارب **المهم ماطولش عليكم رحت للست الهانم لقيتها قاعده فى اوضه وصاله بمنافعهم وطبعاً منستش واجب الضيافه خدت معايا حتتين سيغه وكردان اصل الهانم تموت فى الدهب واهى حاجه تسد حيره الفقير وقت الزنئه سلمت طبعا عليها وكان حالها لايسر عدو ولا حبيب حاجه تقطع الألب لابسه جلابيه سودا مطرزه المهم قعدتنى وبدات تشكيللى اللى حصل من ولاد ستين فى سبعين بتوع التحرير واكتر حاجه زعلتها ان المصيبه جت من التحرير مع ان فيه العتبه ورمسيس واتهمت سواقين الميكروباس بانهم السبب عشان ركزوا على التحرير فصحوا عقول الشباب على الميدان
وسألتها سؤال مباشر طب الفلوس اللى الناس بتقول انها عندك جت منين؟
ردت بجد وانا بصدقها وقالت انها ست موفره دخلت جمعيتين واحده مع جارتها شاهيناز النجار والتانيه مع البت عيشه عب هادى وحلفت تلاتين يمين بالنعمه على عنيها وقالت احياة النبى ومن نب النبى نبى وانشالله اعدم الشعب ان الجمعيتين ب100جنيه ف الشهر وقبضتهم الاول وجهزت بواحده جمال والتانيه عملت مشروع المكتبه المعروف باسمى وكان فى الاول بتبيع المكتبه اساتيك وكراسات وجلاد ومساطر وربنا والحمد لله فتح عليا من اوسع ابوابه وبدأ المشروع يكبر ويكبر لحد ما اشتريت مكتبه اسكندريه بعرء جبينى وشاركت فاروق حسنى واشتريت المتحف المصرى وكل الفلوس اللى انت شايفها دى من المشروع مع حتتين السيغه اللى حوالى 2طن ونص عشان الايام وعشان الحاج لما يطلع على المعاش يبئوا سترنا
ضحكت ساعتها وقلت الفرق بينك وبين الشعب ان الشعب بيعمل جمعيه مع نفسه عشان تقبضى انتى الاول والتانى والاخر وانتى بتعملى جمعيه مع الشعب عشان تقبضى انتى برضوا الاول والتانى والاخر
والفرقبين جمعيتك وجمعيه الشعب ان الجمعيه عندك قصور ودهب وجمعيه الشعب طوابير زيت ورز
ردت وقالت انت وهم طز
خدت اول قطر ورحت راجع جرى
المفضلات