التفاصيل الكامله للتحقيقات مع الرئيس
نزل المحقق من سيارته الخاصه التى قادها من العاصمه الى القصر الرئاسى امام القصر مباشره وفور نزوله استوقفته عربيتان مصفحتان ومدرعه وعشرون ظابطاً برتب مختلفه وبعد ان تم تفتيش المحقق والتأكد من انه لا يحمل ايه اسلحه تم اصطحابه الى داخل القصر بصحبه بعض الظباط الى داخل القصر ثم دخل ردهه القصر الى ممر جانبى ثم الى حجره خاصه وتم غلق الباب عليه بعد التنبيه على المحقق على ان سياده الرئيس الان فى مباره للاسكواش وسينتهى منها بعد ساعه
انتظر المحقق اكثر من ثلاث ساعات وعندما طال الانتظار حاول ان يخرج من باب الحجره فوجدها موصده من الخارج فلم يجد بداً من الانتظار وبعد ساعه اخرى دخل عليه رجلاً اخبره ان الرئيس قادم لمقابلته فأعتل المحقق فى جلسته واخذ يعدل هندامه استعدادا لقدوم الرئيس وبعد اقل من عشر دقائق دخل عليه الرئيس مرتدياً حُله بنفسيجيه والعطر يفوح منها فهرول المحقق ماداً يده اليه فاشار الرئيس اليه بالجلوس وبدا التحقيق
المحقق//معلش يا سياده الريس انى جيت فى وقت مش مناسب بس اعمل ايه اهى اوامر بنفذها اتمنى انى ماكونش ازعجت ساعتك
الرئيس//لا لا مفيش حاجه بس ياريت تأصر عشان عندى جيم بعد ربع ساعه
المحقق وهو يعدل هندامه//لا ياسياده الريس مش هاخد من وقتك عشر دقايق اهو تسديد خانه وخلاص انا عارف مشغوليات ساعتك
يومأ الرئيس بالموافقه على كلام المحقق مشيراً الى سيجار فيلتقطها المحقق بسرعه البرق ويضعها فى فم الرئيس يتلوها باشعال قداحه موجوده على مكتبه ويشعل السيجار له
المحقق// ها ياسياده الريس نبدأ التحقيق والا ايه رايك استنى
الرئيس//تحقيق ايه ياولد انتم نسيتوا نفسكم والا ايه
المحقق//اسف ياريس اصدى الحوار
الرئيس //اه قول كده
المحقق//فيه بعض العناصر الفاسده الضاله بتتهم سيادتك ببعض التهم
الرئيس//زى ايه كده
المحقق//اولاً بيقولوا انك بعت غاز لاسرائيل فى صفقات مشبوهه
الرئيس//الشعب دا فعلاً متخلف غاز ايه وبلا ازرق ايه دا حوالى نئلتين تلاته من مخزن مسطرد محملين 150انبوبه ودول عشان الست متيلدا وليشع اللى ساكنين فى المستوطنات ومش لائيين حتى يسوا الاكل يعنى منؤفش مع الناس اللى دايما تؤف جنبنا فى الازمات وبتحمى ضهرنا من حسن نصر الله واعوانه
المحقق//تمام ياريس طب بعض الفئات الضاله بتتكلم عن ثروه نجلكم واسرتك تؤل ايه للخونه الحسادين دول
الرئيس//اديك قلت حسادين وشماتين كمان ميعرفوش ان دفتر التوفير اللى عملته لابنى وهو فى سنه سته وكان بيحرم نفسه من المصروف والحلاوه ويحوش ارش على ارش خلاه كده وبالنسبه للست الطيبه كانت على طول تدبر من مصروف البيت وتدخل جمعيات مع جارتها خالتك فردوس وتئبضها اول نفر مع كسوه صيدناوى وبيع المصنوعات هى اللى عملت اللى انت شايفه ده
المحقق//بس الناس بتئول ياريس ان نجلك كان شريك لمعظم رجال الاعمال ؟
الرئيس //طب وهو دا عيب واد مفتح ولهلوبه بيعرف الارش بيجى منين الصبح يذاكر وبالليل يشارك اومال عيله مكافحه
المحقق//ياسلام ياريس كلام كله حكم كله مواعظ بس الناس بتئول انك حرمتهم من الامن الغذائى
الرئيس//لا لا ملهمش حق اومال عربيات الكبده والسجق اللى مليه الشوارع دى تبقى ايه مش امن غذائى ده والا مش امن غذائى
المحقق//طب والاكل المسرطن؟
الرئيس// طب عيزنى اقيس صلابه الشعب ازاى وقوه احتماله دلوقتى لو هجم علينا عدو ولأنا خرعيين ومش بنستحمل هنعمل ايه انت ما تعرفش اننا خير شعوب الارض وبنقهر المرض لازم نعرف مدى تحمل الشعب مش كده والا ايه؟
المحقق//كده طبعاً ياريس هو انت تئول حاجه وحشه!!!!!!! بس فيه حاجه غريبه ياريس
الرئيس//خير؟!!!!!!!!!!
المحقق//الناس بتقول ان الحكومه الاخيره كانت فاشله
الرئيس//اطع لسان اللى يئول كده ازاى تبقا فشله وفيها الشريف العفيف وفيها النظيف وفيها الرشيد دا العز كله فيها
المحقق//مش عارف ياريس بس بيقولوا انهم كانوا اصحاب نجلك
الرئيس//طب وفيها ايه انت مش ليك شله بتروحوا النادى مع بعض اهى دى شلته وقاللى والنبى يابابا عايز اعمل حكومه قلتلله ومالوا يابنى اومال كنتم عايزين ايه ازعل الولد وابيته غضبان ودمعته على خده
المحقق//لا ياريس معاذ الله مين يئول كده ربنا يخللى دمعه الباشا بس سؤال بيلح عليا ياريس هو صحيح انك كنت هتورثه البلد؟
الرئيس//لا طبعاً انا ضد التوريث بلد ايه اللى اورثهاله احنا فى بلد ديمقراطى الشعب هو الى يختاره وهو اختاره وبعدين مفيش حاجه اسمها توريث انما فيه بيع وشرا وهو اشترى وانا بعت وقرينا الفاتحه وبارك الله فيما رزق وجبرت والحمد لله
المحقق//طب رأيك ايه فى اللى حصل فى ميدان التحرير وهل فعلاً كان فيه اجندات خارجيه
الرئيس//طبعاً التحرير كان مليان اجندات ونتايج كتيره ومتنساش اننا كنا فى يناير يعنى اول السنه والشمرلى بدأ ينزل نتايج واجندات وانا ساعتها قررت انى اقفل الفجاله عشان امنع نزول الاجندات الى الاسواء
المحقق//هل الشيعه تبنوا قضيه الثوار ؟
الرئيس//اللى ارتكبه الشيعه وامريكا والعالم اكبر خطأ وحرام شرعا لان التبنى ذ كر فى القرأن ومعروف حرمانيته يعنى الثوره دى حرام شرعاً
المحقق//هناك اتهام صريح وواضح من الشعب او بعض الفئات المُضلله انك امرت بأطلاق النار على المتظاهرين؟
الرئيس//انا انا اخس عليهم بدل ما يشكرونى لما كانوا بقالهم يومين من غير حُما وسيبت عليهم خراطيم الميه
المحقق//طب وواقعه فتح السجون
الرئيس//دا كان عفو جماعى بمناسبه مولد السيده نفيسه شيلاه ياست مدد
المحقق//الناس بتتهمك بأن اسوأ انتخابات حصلت فى عهدك ونجح حزبك بالتزوير؟
الرئيس//الحق عليا اللى كنت بريحهم من هم المرواح والمجى للجان والوقوف طوابير وياترى اقول نعم والا لا وحبر فسفورى وطلع البطاقه واستنى النتيجه يا عم انا كنت مؤمن بأن شرا العبد ولا تربيته
المحقق//اتهام البعض لك بالكسب من خلال صفقات اسلحه ؟
الرئيس //وايه العيب فى كده الايد البطاله نجسه ومش عيب انى اجيب بضاعه من الموسكى والعتبه ومسدسات ميه وحرب اطاليا وبندقيه رش وابيع
المحقق// هذا وبناء على طلب الرئيس نظرا لاقتراب ميعاد الجيم اغلق التحقيق بعد ثبوت براءه الرئيس من التهم المنسوبه اليه وتغريم المدعى عليه وهو الشعب تكاليف 30سنه والحكم على من ادعى من الشعب بالعقاب ان يظل باحثاً عن حريته واغلق المحضر عاش الرئيس
رد مع اقتباس
المفضلات