ذكرياتنا مع رمضان(رمضان كريم)

**اميرة حبى انا** · 04-08-2009, 01:22 AM

كل سنة وانتم والامة الاسلامية بألف خير وصحة وسعادة
وكل عام وانتم لله اقرب
ايام ويهل علينا شهر رمضان المبارك

اعاده الله عليكم بالخير واليمن والبركات

الموضوع ده عملته عشان كل واحد/ه يحكيلنا ذكرياته وهو صغير/ة فى شهر رمضان
اكيد بتحصلنا فيه مواقف جميلة
ياريت كل حد عنده او له ذكريات مع اجمل الشهور
يدخل ويحكيهالنا

وانا هبدأ
عشان محدش يقولى اشمعنا
كل سنة وانتم طيبين
فى انتظار ذكرياتكم مع الشهر الفضيل

**fagrmasr01** · 04-08-2009, 01:55 AM

كل سنة وانتى طيبة يا أميرة
وكل اهل منتدانا بخير وسلام
وأمة الإسلام يارب تسترد نجمعها وصحتها وتتحسن الاحوال برجوعنا الى الله باذن الله
اعاده الله على الجميع
بالخير واليمن والبركات

ننتظر بدايتك وباذن الله كلنا بعد حضرتك على طوووول
كل سنة وانتى طيبة
كل سنة وانتم طيبين

**اميرة حبى انا** · 04-08-2009, 03:31 AM

كل سنة وحضرتك طيب وبخير وان شاء الله تكون فى احسن صحة ويتم الله شفاك ببركة رمضان
اللهم امين
احكيلكو انا بقى
افتكر فى رمضان وانا صغيرة لمتنا على الفطار ودايما انا واخواتى لما ناكل مع بعض لحد دلوقتى
نضحك ونهزر ونشد الاكل من بعض
وكنت بحب الفوازير اوى
المهم
الموقف اللى كان بيتكرر كل رمضان
السحور
واه من السحور
مكنتش بقدر اصحى خالص

يقوم حضرة الاستاذ اخويا يعمل ايه بقى
يرشنى بازازة ميه
كل يوم
30 يوم بصحى بالمية
واقعد ازعق واقول يا ماما سكتيه

تقولى طب قومى عشان تتسحرى
واقوم شايطة

بس لما نقعد عشان ناكل برضو كانت بتقلب ضحك وهزار ويبقى احلى سحور واحلى اكل

عمرى مانسيت الموضوع ده وكل رمضان احكيه لولادى واقعد اضحك
كانت ايام حلوة والله

Storm 1328975418839049085 12210206861826814126

ومرة كنت صغيرة اوى فى ابتدائى وكنا يوم الوقفة وكنا بنعمل الشقة واخويا ملأ ازايز المية ورايح يحطها فى التلاجة
وانا بمنتهى التلقائية والعبط
بشد منه الازازة عشان اشرب وهو يشدها لا وايه

انا مستغربة اوى واقوله ما تجيب اشرب فى ايه

فييين اخر ما ريقى نشف قالى يابت مش احنا صايمين
( مش يقولى من الاول ولا يسيبنى اشرب وانا ناسية وخلاص)

افتكر كمان فى رمضان جه متأخر
بمعنى
انهم بعد لما قالو غدا المتمم لشهر شعبان
الساعة 12 او 1 باليل قالو الهلال ظهر ورمضان بكرة
العمارة كلها صحيت وقعدت تهنئ بعضها
(للاسف مافيش الكلام ده دلوقتى)
ايامنا واحنا صغيرين حتى ولو كان فيها متاعب ومشاكل
كانت حلوة اوى
دلوقتى انا بستنى رمضان زى ماكنت عيلة

مافيش حاجة اختلفت
وبجيب الزينة اللى بتنور واعلقها فى البلكونة
واعمل لولادى الكنافة بالزبدة اللى كانت ماما بتعملهالنا
يااااااااااه

كانت ايام حلوة بشكل مالوش وصف
الحمدلله على كل حال
يلا كفاية كده ألا تزهقوا منى
عموما مسموح اننا كل مانفتكر حاجة نكتبها
مش شرط نكتب مرة واحده
اه
نسيت اقولكو
انى باكل قمر الدين مش فى اطباق زى كل الناس
باكله زى ماهو كده

وولادى طالعين زيى
كل سنة وانتم طيبين
ورمضان كريم

**خلود** · 04-08-2009, 12:19 PM

كل سنة وانتى طيبة يا أميرة
وكل اهل منتدانا بخير وسلام
وأمة الإسلام يارب نتجمع امه واحده كده وتتحسن الاحوال برجوعنا الى الله باذن الله
اعاده الله على الجميع
بالخير واليمن والبركات

بصى ياستى اكيد رمضان له ذكريات جميله مع الكل لانه من احلى شهور السن وافضلهم
بالنسبه لى انا بقى لانى اصغر اخواتى تلاقى بقى دلع الدنيا كله

طبعا صحيان اخر واحده وبالراحه كده وقومى ياحبيبتى الاذان هيأذن يلا

واكيد اللمه دى على الفطار حاجه تانيه تهريج بقى وضحك والعرقسوس والتمر

يااااااااااااااااااااااااااه افتكر ايه ولا ايه

ولما كنا نيجى نعمل بقى الكحك والبسكويت يبقى عيد لوحده تحسى الدنيا كله هيصه وامسك العجينه واشكل فيها مره عروسه ومره حصان واى شكل يجى على بالى اعمله

ونزهق ماما وانا اللى الف المكنه ياماما طيب استنى انا هنقش الكحك ويابنتى اسكتى يابنتى بطلى وانا طبعا لا بسكت ولا ببطل

ونشيل بقى ونودى الفرن ونفضل للصبح رايحين جايين لغايه النهار ما يطلع ونرجع بقى مهدودين نديها نوم للمغرب

وتيجى بقى لشراء لبس العيد وتبقى حكايه نفضل نلف ونخرج كل يوم لغايه ما نجيب اللى يدخل مزاجى

ياااااااااااااااااااااه مش بقولك افتكر ايه ولا ايه

دلوقتى بقى ولادى بيطلعوه عل عينى من صحيان ووجع قلب وتعبانه ياماما بقى دلع بنات بس برضو بنحب رمضان جدا وبنستناه كل سنه بشوق ولهفه

شكرا اميره على موضوعك اللى فكرنا باجمل ذكريات وطبعا كل ما افتكرحاجات تانى ارجع تانى واسجلها هنا ماهى دى احلى ذكريات واكيد كتيييييييييييييره جدا

**fagrmasr01** · 05-08-2009, 02:50 PM

هى اجمل الذكريات اللى عشتها سنين عمرى من الطفولة ولحد دلوقتى بصراحة باعيشها
زينة رمضان من قبل رمضان باسبوع ف الشوارع
ولحد دلوقتى ولادى بيزينوا الشارع كله
وليلة الرؤية بعد اول صلاة للتروايح
لازم الف على جميع المقاهى والمحلات المجاورة ابارك لهم بأول ليالى رمضان
واتصل بجميع اهلى واصحابى بالتلفون
واول يوم نتلم كلنا ف بيت الوالد الله يرحمه نفطر سوا مع اول شوب عرقسوس او تمر هندى مع شوب خشاف
ونصلى المغرب جماعة ونقوم نفطر
والبيت يكون زحام انا واسرتى وكل اخ واخت مع اسرته
وكلنا بنحب نلعب .. وانا اول واحد يلعب .. تحت اقدام ماما الله يرحمها

الموضوع: ذكرياتنا مع رمضان(رمضان كريم)

أدوات الموضوع

عرض