facebook

النتائج 1 إلى 3 من 3

الموضوع: الكسعوم والفنعور والمشنقة

  1. #1

    مشرفة اقسام ذاكر معانا

    الصورة الرمزية stylooo
    تاريخ التسجيل
    Jan 2010
    الدولة
    القاهرة
    المشاركات
    1,163
    مقالات المدونة
    3
    معدل تقييم المستوى
    17


    I6ocity (36) الكسعوم والفنعور والمشنقة

    تعالوا نشوف زمااااااااااااااااااااان بحالا الآن....

    الكسعوم والفنعور والمشنقة


    يقول الأستاذ / وحيد العازب من حوالي أربعين سنة : لو نظر كل رجل إلى زوجته بنفس الرغبة التي ينظر بها إلى زوجة جاره، لانصلح حاله وحال جاره، وحال الأستاذ وحيد كمان، وقابلوني لو ده حصل.
    في يوم كان الجاحظ وهو كبير قد كده ومتجوّز وعنده عيال فاضي بيتسنكح في السوق، في زحمة السوق لم يرى الجاحظ من النساء إلا امرأة واحدة من بتوع زمان الحلوين الملظلظين دول، شافها واقفه بضهرها عند بتاع الكاكا، قرّب منها شويه وعمل نفسه بيشتري كاكا، لقاها متختخه على الآخر وقُزعه وشعرها أكرت ومنكوش وأسنانها عامله كده هه.
    نظر إليها طويلاً ثم إقترب منها وكبرت في دماغه إنه لا يفارقها طول ما هي في السوق، يمكن يلاقي فيها حته حلوة تتاكل النهار ده، لزق وراها وفضل يفلّي في كل حته عندها – إنتم عارفين إن عين الجاحظ على طول كانت وجعاه من قراءة الكتب الكبيرة بتاعة زمان ونظره على قده – ولما فلّاها كويس، لم يعجبه شكلها أبداً نيفر إيفر، ومع ذلك فضل لازق وراها، مش شايف غيرها في السوق النهار ده يعمل إيه يعني.
    تشتري الست حرنكش حبوب الجاحظ وراها، تشتري زعنبوط مطحون الجاحظ وراها، حتى عند بتاع السنكبوتات المستوردة الحريمي برده وراها.
    الدنيا حر والسوق زحمة والأسعار نار ومحدش طايق حد، لما الست زهقت منّه ومن نظرات عنيه اللي بتوجعه، ولسه وراها طبيخ ومكوى ووجع قلب، إلتفتت له الست ثم قالت بقرف وهي بتكّز على أسنانها اللي عامله كده هه: إتّاخر عنّي شويه يا جاحظ وإختشي ما احنش ناقصينك يابابا وإلا والله أنادي على أي عسّاس من العساسين اللي في السوق يجرجروك من الزلمكة بتاعتك. عساس يعني مخبر، وزلمكة يعني زلمكة
    لما سمع الجاحظ كلمة زلمكة إتنرفز على الآخر والموود بتاعه إتقلب وقال لها
    [ وإذا الوحوش حشرت ] إنت مفكرة نفسك مين؟ بصي لنفسك في المرايه، أنا أبص عليك؟ أنا شبعان خالص يا ماما، ويكون في علمك أنا نظري سته على سته، ولعلمك مراتي أم العيال بعمرك وهي في نظري أجمل جحيف على وش الأرض– جحيف يعني غزال.

    لما سمعت المرأة كلمة جحيف وإنها مش جحيف خالص في عين الجاحظ اللي بتوجعه، ركبها خمسين نغموش - يعني عفريت، وعندها حق بصراحة، جحيف إيه بس.
    وهُب مسكت في خناقه وقطّعت أبة الجلابية بتاعته وبركت عليه ومسحت بأم الجاحظ بلاط السوق.
    ولولا إن أولاد الحلال تدخلوا، وخلصّوه وسلكوه من سنانها اللي عامله كده أهه، كانت الست قطّعته حتت وفتت وعملته مارتديلا بالمكسرات، زي بتاعة الحسن والحسين بالضبط
    لما هدأت الست الملظلظة فضلت تنهج وتكلم نفسها وهي ذاهبة لشراء نصف كيلو سفرجل من عند بتاع السفرجل وتقول: قال وحشه قال قال وحشه قال ...... وكل شويه تنهج يا عيني ثم تنظر إلى نفسها وتقول أنا مش جحيف أمال مين الجحيف هه مراتك يا جاحظ؟ اللي عامله زي الفنعور- يعني العود الناشف، طيب بص لنفسك الأول وإنت عامل كده زي الكسعوم - يعني الحمار، كسعوم متجوّز فنعور ههههههه، ثم قالت: [ وضرب لنا مثلاً ونسي خلقه ] وضرب لنا مثلاً ونسي خلقه........... ظلت ترددها حتى وصلت عند بياع السفرجل اللي نايم هناك في آخر السوق، وعنده سفرجل بالهبل حلو خالص وكبير ورخيص، لكن مفيش عنده سفرجل النهار ده.
    لا يجب على أي رجل عاقل بالغ متزوج أو عازب أو مخلوع أو حتى مخبول أن يصف امرأة وحشه بأنها وحشه، ببساطة ومن الآخر لأنه لا توجد امرأة في الدنيا وحشه ممكن تصدّق إنها وحشه.
    كان فيه خمس نسوان وحشين خالص من عينة الست بتاع الكسعوم اللي شوفتوها فوق دي يعيشون في جزيرة نائية في سعادة وانبساط وروحهم في روح بعض ومأنتمين خالص مع بعض، قاعدين لوحدهم قرفانين من الرجالة وعمايلهم السوده، قرروا إنهم يشنقوا أول رجل ينزل على أرض الجزيرة بتاعتهم بعد ما يذلّوه شويتين.
    بعد عشرين سنة جنحت مركب فيها رجل شكله مش متجوّز واستقرت عندهم في الجزيرة.
    النسوان الوحشين مسكوه وذلّوه يا عيني لحد ما استوى خالص وفرفر في إيديهم، ولما حان موعد الشنق سألوه نفسك في إيه قبل ما تتشنق؟ قال وهو بيطلّع في الروح نفسي نفسي نفسي إن أوحش واحدة فيكم هيّ اللي تيجي وتشنقني

    الحمد لله الرجل مازال على قيد الحياة حتى اليوم الأربعاء 18 ذو القعدة، وقد تزوج بأربعة من النسوان الخمسة على سنة الله ورسوله، أما المرأة رقم خامسة الزيادة، وعلشان الجوازة تنفع والمأذون يوافق، فقد قاموا جميعاً قبل عقد القران بدقيقة ومعاهم المأذون، ورموها في البحر.
    ***
    الجمال نسبي والقبح نسبي، وإذا شبعت أنت من الفول الصيني، وشبع غيرك من لحمة الموزه، في الآخر إنت شبعان وهوّ شبعان، وإنتم الاتنين شبعانين وكلها خِلقة ربنا، واحمدوا ربنا، وبلاش طفاسه وقلة أدب، أنا أكلم الجاحظ.


    مع إن كل الخلق من أصل طين ....
    وكلهم بينزلوا مغمضين
    بعد الدقايق والشهور والسنين ....
    تلاقي ناس أشرار وناس طيبين عجبي !!






  2. #2

    افتراضي رد: الكسعوم والفنعور والمشنقة

    رجالة عنيهم زايغة يا ساتر يا ساتر

  3. #3

    افتراضي رد: الكسعوم والفنعور والمشنقة

    هههههههههههههههههههههه

    وربنا انتى عسل ياستايلو

    فطستينى من الضحك ههههههههههه







    كل يوم اكتشف ان لا شيىء يشبهك..
    وانك أجمل من كل شيىء..


معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
Untitled-1