يا آمال .. يا أخت الروح .. يا وردة العصيان
يا آمال .. يا أخت الروح .. يا وردة العصيان
طالعة بلون الدم ..
بطعم قوت الغلابة من خبيز الهم ..
وبريحة الأرض ساعة الرى ..
بالحزن والفرح اللى راح .. والجاى ..
طالعة ومين يوقفك ..
يا ويل عدوينك .
الأرض شرفك ودينك ..
وخولية الباشوات أهم راجعين ..
يخدوها بالقوانين ..
يخدوها بالعسكر ..
ويرجعوا اللى كان ..
وأنتى اللى واقفة لهم على رأس القيراط .. ددبان .
بتحقى حق الفقير ..
ضد الجشع .. والزيف ..
على قد ما أنتى ندية .. نسمة فى صهد البيوت ..
فايحة بطراوة الغيطان ..
على قد ما أنتى بهية .. وعفية فى الميدان ..
بالطرحة والنبوت .. صوتك سطع كالسيف ..
لما التقى الجمعان : الفقرا .. والعسكر ..
ولقيتى روح الغيطان بتهج .. وتفرفر ..
وأخضر الفرح دابل .. من صفار النوح ..
صرختى من عزم ما بك ..
دم البلد مسفوح ..
يا روح ما بعدك روح ..
وإيش فايدة الروح .. إذا عشنا فى صمت جبان ..
مايل ميزان العدالة .. فى البر يا جدعان ..
محتاج شهادة الشهيد .. تعدله عدلة ..
يا حربك العادلة ..
اللى فرضها عليكى .. خدم وأسياد الدولار ..
بتخوضها روحك علشان الأرض والعيل ..
لو بس مكانش .. ميزان البلاد ميل ..
وايه تعمل الحرة .. لو باتت ضناها جدعان ..
تنام ذليلة وقليلة فى زحمة الطايعين ..
ولا تهين عرضها فى زمرة الضايعين ..
ولا تقول كلمة تحدفها على الزنازين ..
ولا تضحى بحياتها وتعدل الميزان ؟
آمال .. يا أختى ..
وصلت رسالتك من المنيا .. لزنزانتى ..
شايف شهادتك بتروى الأرض .. والإنسان ..
ودمك الحر .. بيصحى كرامة النيل ..
يا وردة العصيان .
قصيدة كتبها حمدين صباحى يوم 7 مارس 1997 أثناء اعتقاله فى قضية تضامنه وقيادته لمظاهرات الفلاحين عام 1997 أثناء انتفاضة الفلاحين بسبب قانون العلاقة بين المالك والمستأجرين. وكانت للشهيدة امال العشرى
رد مع اقتباس
رد: يا آمال .. يا أخت الروح .. يا وردة العصيان
المفضلات